Бугун Олий Лиганинг 29-тур учрашувларига старт берилади.
Олий Лиганинг ҳар бир турини ҳар доим ҳам бунчалик кузатиб боравермаймиз. Ҳар доим ҳам натижаларга қараб, очколарни ҳисоб-китоб қилмасдик. Ҳар доим ҳам ким очко йўқотаркин, ёки қайси жамоа ғалаба қозонади деб ўйинларни кузатмасдик. Аммо бу йил профессионал футбол лигамизда бир қатор диққатга сазовор ўйинлар учраб турибди. Айниқса, охирги турлар сиз-у бизга Олий Лигадан баҳра олиш имконини бермоқда.
“Насаф” – “Пахтакор”
“Насаф” Ўзбекистон кубоги-2015ни қўлга киритгач, навбатдаги совринга музейда жой йўқ шекилли, иккинчи кубок учун унчалик ҳаракат қилмади. Кубок билан сармаст бўлган қаршиликлар Олий Лигага ортиқча эътибор қаратишмади. Ёки Жиззахдаги финалда кўп куч сарфлашди чоғи, кейинги баҳсларда “аждарлар” доимги ўйинларини намойиш эта олишмаяпти. Буни чемпионат доирасида “Бунёдкор”га қарши учрашувдан ҳам билсак бўлади. Айнан “қалдирғочлар”га қарши беллашувдан кейин “Насаф” чемпионликдан умидини узиб, қолган баҳсларда ёшларга эътибор қаратмоқда. Бир сўз билан айтганда, Рўзиқул Бердиев шогирдлари бу йилги вазифани бажаришди. Осиё чемпионлар лигасига бериладиган йўлланмани Жизахда қўлга киритишди.
Энди Олий Лиганинг бу турида “Насаф” ўз майдонида чемпионат карвонбошчиси “Пахтакор”ни қабул қилади. Бу беллашувга бўлган қизиқиш жуда катта. Лекин юқорида айтиб ўтганимиздек, “аждарлар” ёшларга имконият яратиб, грандлар билан ўйин тажрибасини беридиган бўлишса, меҳмонларнинг мушкулини осон қилиб қўйишлари мумкин. Бу дегани, мусобақа тугашига бир тур қолганда, Нўмон Хасанов шогирдларини чемпионлик билан табрикласак бўлаверади. Иккинчи томондан, “Насаф” ўз майдонидаги охирги ўйинда мухлисларини яна бир бор хурсанд қилиш учун ғалаба қозонишни мақсад қилган бўлса, ажабмас.
SPORTS.uz тахмини 50-50
“Локомотив” – “Машъал”
Мусобақа якунига етай деганда, клубларимиз очколарини ҳисоб-китоб қилишга тушиб қолишди. Чемпионлик учун курашаётган “Локомотив” бугун “Пахтакор”га нисбатан анча осон рақибга дуч келади. Айтишимиз мумкинки, “темирйўлчилар” Тошкентда “Машъал”ни қабул қилишади. Бу беллашувда мезбонларнинг имконияти юқори эканлигини барча яхши билади. Ҳатто “Машъал”нинг ўзи ҳам. Олдинги турда Муборакда “Пахтакор” меҳмон бўлиб, қийин бўлган ғалабани қўлга киритди. “Машъал” “шерлар”ни қимматли 2 очкодан мосуво қолдиришига бир баҳия қолганди. Шунинг учун бугун муборакликлардан нимадир кутишимиз мумкин. “Машъал” бугун “Пахтакор”га қарши ўйинини намойиш этса, балки тошкентликлардан очко олиши мумкин дея фикр билдирганлар ҳам учраб туради. Лекин “Машъал” каби жамоалар мавсумда бир ёки икки марта шундай учрашувлар ўтказа олишади холос. Шу боис, мазкур қарама-қаршиликда “Локомотив” рақибини ютиш эҳтимоли юқори. Албатта, биз ҳам жуда хоҳлардик, грандларга бошқа клублар сюрпризлар тайёрлашларини. Бироқ…
SPORTS.uz тахмини 70-30
“Олмалиқ” – “Бунёдкор”
Бу қарама-қаршилик олдинги икки ўйин каби кўпчиликда қизиқиш уйғотмасада, томонлар учун бирдек аҳамиятли. Чунки “Олмалиқ” бу йил олдинги мавсумларга нисбатан пастроқ ўринни эгаллаб турибди. Шунинг учун охирги 2 турда ижобий натижалар қайд этиб, юқорироқ поғоналарга кўтарилишни мақсад қилган. Қолаверса, олдинги ўйинда “Сўғдиёна”дан учралган мағлубият тасодиф эканлигини исботлашга ҳаракат қилишлари аниқ. “Қалдирғочлар” эса ОЧЛ плей офф йўлланмасини бўлсада, иложи борича тезроқ нақд қилиш учун ғалаба қознишга интилишади. Бу вазифани охирги турга қолдиришни ҳеч ким истамаган бўларди. Айтишадику, қолган ишга қор ёғар.
SPORTS.uz тахмини 45-55
Бугун қандай натижалар бўлишини вақт кўрсатади. Яқин бир неча соатлардан кейин билдирилган фикрлар қанчалик тўғри ёки нотўғрилигини ўшанда билиб оламиз. Нима бўлганда ҳам Олий Лигада камдан-кам учрайдиган ҳолатни сабрсизлик билан кузатишда давом этамиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
