Хабарингиз бор, кеча Самвел Бабаян устозлигидаги Ўзбекистон миллий терма жамоаси Жаҳон чемпионати-2018 иккинчи саралаш босқичи, 7-тур ўйинлари доирасида Шимолий Корея термасига қарши баҳс юритди. Анчагина қизиқарли кўриниш олган мазкур матч якунида ғалаба ўзбекистонлик футболчиларга насиб этди – 3:1.
Шу ўринда эътиборингизни бир жиҳатга тортишни истардик: Кечаги ўйин давомида бир неча бор стадионни тўлдириб ўтирган мухлислар “Самвел Бабаян!, Самвел Бабаян!” дея ҳайқиришди. Бу нимадан далолат? Бабаяннинг бош жамоамиз устозига айланганида унинг мураббийлик салоҳиятига бироз иккиланиш билан қараган кўпчилик мухлислар ҳам эндиликда ушбу мутахассисига ишона бошлашдими?! Бизнингча, шундай!
Зеро Самвел Бабаян секин-аста миллий терма жамоада ўзгаришлар қила бошлади, у бош жамоамизга ўз фалсафасини сингдириб бормоқда. Натижада эса терма жамоамиз кўрсатаётган ўйин юртимиздаги футбол ишқибозларига манзур бўлмоқда! Нега, дейсизми?! Қани айтингчи, терма жамоамизнинг кечаги намойиш қилган ўйини қайси ўзбек футбол ишқибозига ёқмади? Қайси мухлиснинг кечаги ўйиндан сўнг кайфияти хуш бўлмади?!
Келинг, шу ўринда Самвел Бабаяннинг Ўзбекистон миллий терма жамоаси бошқарувига келгач амалга оширган ишларига қисқача тўхталиб ўтсак.
Тошкентнинг “Пахтакор” клубида фаолият олиб бориб келган ушбу мутахассис июн ойи охирида Ўзбекистон миллий терма жамоаси бош мураббийи этиб тайинланди. Самвел Бабаян ишни футболимиз жамоатчилиги вакиллари билан бирма-бир суҳбатлашиб олишдан бошлади. Дастлаб футбол клубларининг фан клублари фаоллари билан учрашув ташкил этилди. Яна Олий Лига жамоалари бош мураббийлари-ю журналистлар билан ҳам Самвел Бабаян алоҳида суҳбат қурди. Унинг нега ишни айнан барча билан бирга-бир гаплашиб олишдан бошлаганини дастлаб кўпчилик англамаган эди, рости. Мана энди барчамиз тушуниб турибмизки, Самвел Бабаян ўша пайтдаёқ узоқни ўйлаб иш тутган экан.
Яъни, кечаги ўйиндан сўнг ўтказилган матбуот анжуманида Самвел Бабаян таъкидлаганидек, терма жамоамиз Жаҳон чемпионатига чиқишини истар эканмиз, барчамиз бирлашишимиз лозим!
- Мени бош мураббий этиб тайинлашган пайти катта ғурурга тўлган эдим. Зеро мен бутун футболимиз тарихидаги энг зўр футболчиларга устозлик қилмоқдаман. Аммо сизлар (журналистлар)нинг орангизда бунга қўшилмайдиган қандайдир “ақллилар” бор. Истардимки, барчамиз бир мақсадни кўзлар эканмиз, бир-бирмизга ишонайлик. Барчамиз бирлашадиган вақт келди. Ишонинг, бу футболчилар бизда қачонлардир бўлган энг яхши ижрочилар. Уларни танқид қилиш ўринга қўллаб-қувватлашингизни сўраган бўлардим, - деди Бабаян.
Мана Самвел Бабаян сиз-у биздан нимани истамоқда?! Бирлашиш – барчанинг бир ўй, бир мақсад йўлида ҳаракат қилиши! Бизнинг мақсадимиз эса ҳозирча бизга ушалмас орзу бўлиб қолаётган мундиалга бориш. Нега Ўзбекистон терма жамоаси шу пайтга қадар Жаҳон чемпионатлари финал босқичларида иштирок этмаган? Чунки футбол жамоатчилиги вакиллари, журналистлар-у мухлислар доим ҳам “бир ёқадан бош чиқар”ган эмаслар… Келинг бу гал шундай қилишга уриниб кўрайлик, балки бу сафар мундиал йўлланмасини қўлга киритармиз!..
Келинг, нега терма жамоага бу футболчи чақирилди? Нега анави футболчи таркибдан четда қолди? Нега “ёши ўтган” ўйинчилар бош жамоага ҳамон жалб этилмоқда?, деган ва шунга ўхшаш саволларни бироз четга суриб турайлик. Келинг, бош мураббий ишига бу гал “аралашмай” турайлик… Келинг, миллий терма жамоамизни шунчаки ОДДИЙ МУХЛИС сифатида қўллаб-қувватлайлик! Таркибни танлаш, учрашувда майдонга кимни тушуриш каби масалаларда бош мураббийга маслаҳат бериш одатимизни бироз унутиб турайлик, ахир натижага барибир ўша бош мураббий жавоб беради-ку! Барчамиз Ўзбекистон миллий терма жамоасининг Жаҳон чемпионати финал босқичига чиқишини истар эканмиз, келинг бирлашиб БИР ЖАМОА бўлишга уриниб кўрамиз!
Ажаб эмас, айнан Самвел Бабаян сиз-у бизнинг ҳозирча ушалмаётган орзуимизни рўёбга чиқарса..!
Зоҳирбек Акрамхонов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
