Каратэ бўйича Ўзбекистон терма жамоаси аъзоси Садриддин Сайматов Бирлашган Араб Амирликларининг Дубай шаҳрида бўлиб ўтган “Премьер-лига Karate 1 – 2017” нуфузли халқаро турнирида ҳам олтин медалга сазовор бўлиб, Премьер Лиганинг кетма-кет учта босқичида зафар қучишни уддалади. 31 март - 2 апрель кунлари бўлиб ўтган мазкур мусобақада дунёнинг 76 мамлакатидан 900 нафарга яқин спортчилар иштирок этишди.
60 кг вазн тоифасида кумите баҳсларида иштирок этган ҳамюртимиз финалга қадар Давид Гчебугава (Грузия), Бехнаман Махзави (Эрон), Даниэль Баркинда (Швеция), Степан Ефименко (Россия), Ангело Кременцо (Италия) ва Самдан Эрай (Туркия)ларни мағлуб этганди. Ҳал қилувчи баҳсда эса Садриддинга туркиялик яна бир спортчи Айкут Кайя рўбарў келди. Финал учрашувида рақибини 8:5 ҳисобида мағлуб этган Садриддин Сайматов олтин медални қўлга киритиб, мусобақа ғолибига айланди. Ушбу вазн тоифасида бронза медаллари эронлик Амир Маҳдизода ва туркиялик Самдан Эрайларга насиб қилди.
Эътиборли жиҳати, Ўзбекистон миллий терма жамоасининг катта мураббийи Ўктам Бекпўлатовнинг шогирди, термизлик 19 ёшли Садриддин Сайматов ўзининг бу натижаси билан “Премьер Лига Карате 1 -2017” турнирида кетма кет учинчи олтин медалини қўлга киритди. Бунга қадар ҳамюртимиз йил бошидан бери Париж ва Роттердам шаҳарларида ўтказилган Премьер Лига босқичларида ҳам биринчи ўринни эгаллаганди.
Маълумот учун, Премьер Лига турнири жаҳон кубоги даражасидаги мусобақа бўлиб, бешта босқичдан иборат бўлади. Жорий йилда ушбу мусобақаларга Париж (Франция), Роттердам (Голландия), Дубай (БАА), Работ (Марокаш) ва Лейпциг (Германия) шаҳарлари мезбонлик қилади. Эътиборлиси, Премьер Лига босқичлари 2020 йили Токио мезбонлик қиладиган ёзги Олимпия ўйинларига қимматли рейтинг очколарини тақдим этади. Ҳозирда ўзбек каратэси тарихида биринчи марта ватандошимиз жаҳон рейтингида биринчи ўринда бормоқда ва ушбу натижасини сақлаб қола олса Токио 2020 Олимпия ўйинлари лицензиясига эга бўлиши шубҳасиз.
Таъкидлаш керакки, келаси ойда Ўзбекистон каратэ Миллий федерацияси Президенти Аламжон Муллаевнинг таклифига кўра Бутунжаҳон каратэ федерацияси (WKF) Президенти Антонио Эспиноза пойтахтимизга ташриф буюради. Ўз навбатида бу унинг Марказий Осиёга уюштирадиган илк сафари бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
