Сир эмаски, спортни ривожлантириш йўлида спорт тиббиётининг аҳамияти беқиёс. Спортчининг мусобақага жисмоний томонлама тайёр бўлишида, тикланишида спорт тиббиёти муҳим ўрин тутади.
Шу сабабдан, Ўзбекистонда ҳам мазкур йўналишни ривожлантириш бўйича талайгина ишлар амалга оширилмоқда. Бугун Миллий олимпия қўмитасида ташкил этилган семинар ҳам бу йўлда навбатдаги қадам бўлди дейишимиз мумкин.
Жанубий Кореянинг «Чонг Ён» клиникаси ҳамда Тошкент тиббиёт академиясининг халқ тиббиёти, реабилитология ва жисмоний тарбия кафедраси томонидан ташкил этилган семинар турли касалликларни, жумладан умуртқа билан боғлиқ касалликларни халқ табобати ёрдамида даволаш мавзусида ўтказилди. Семинарда Жанубий Кореядан ташриф буюрган профессор Пак Жон Син, Ўзбекистон Республикаси соғлиқни сақлаш вазирлиги спорт тиббиёти бўйича бош мутахассиси Адиба Усманходжаева, спорт федерациялари шифокорлари, соҳа мутахассислари, реабилитологлар, талабалар ва бошқалар иштирок этишди.
Семинар давомида Жанубий Кореядан ташриф буюрган мутахассислар касалликларни халқ табобати ёрдамида даволаш бўйича маъруза ўтказишди. Шунингдек, буни амалиётда ҳам кўрсатиб беришди. Бундан ташқари, семинар қатнашчилари ўзларини қизиқтирган саволларга жавоб олишди.
Албатта, спортчининг муваффақиятга эришишида унинг соғломлиги, мусобақага тайёргарлик кўриши, машғулотлардан сўнг тикланиш жараёнларини тўғри ташкил қилиш катта аҳамиятга эга. Мамлакатимизда бундай амалий семинарлар ташкил этилиши эса спорт ривожига ўз ҳиссасини қўшиши шубҳасиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).