Сергей Ковалёв қамалади...ми?
Россиялик ва колумбиялик боксчилар - Сергей Ковалёв ҳамда Элейдер Альварес ўртасидаги чемпионлик жанги ўтказилишига саноқли кунлар қолганида россиялик чарм қўлқоп устаси борасида нохуш янгилик тарқалди.
18 январь куни TMZ Sports Ковалёвни жиноят содир этишда айбланаётганлиги борасида маълумот берди.
Журналистларнинг сўзларига кўра, россиялик боксчига бир аёлни дўппослаш бўйича айб қўйилмоқда. Хабарда айтилишича, Сергей 2018 йилнинг 9 июнь куни АҚШнинг Биг-Бэр (Калифорния штати) шаҳридаги тадбирда бир қиз билан танишиб, бир дўсти билан уни уйига кузатиб қўйишга қарор қилган. TMZнинг маълумотига қараганда, россиялик боксчи йўлда қизга ҳужум қилган. Бунга эса боксчининг қизга уни ёқтириб қолганлигини айтганлиги, у эса бунга рад жавобини берганлиги сабаб бўлганлиги айтилмоқда. Жабрланувчи қизнинг сўзларига кўра, шундан сўнг, Ковалёв уни дўппослаган. Бунинг натижасида эса қиз жиддий тарзда жароҳат олиб, бурни синиб, мияси чайқалган ва бўйин соҳаси лат еган.
АҚШ полицияси журналистларга боксчи қизга жиддий тан жароҳати етказишда айбланганидан кейин дарҳол қамоққа олинганлигини таъкидлади. Бундай хатти-ҳаракатлар учун эса Ковалёв 4 йил муддатга озодликдан маҳрум этилиши мумкин.
Ишни қайта кўриб чиқиш эса март ойида бўлади. Боиси, Ковалёв ўз айбини тан олмади.
Хабарларга қараганда, мазкур ҳодиса россиялик чарм қўлқоп устасининг колумбиялик боксчи Элейдер Альварес билан бўлиб ўтган биринчи жанги арафасида юз берган.
Эслатиб ўтамиз, ўша беллашувнинг 7-раундида Ковалёв нокаутга учраб, WBO таснифи бўйича ярим оғир вазндаги чемпионлик камаридан маҳрум бўлганди.
Кўпчиликнинг таъкидлашича, ўша жангда россиялик боксчининг жисмоний ҳолати яхши бўлмаган ва унинг унчалик ҳам таниқли бўлмаган, аммо бақувват бўлган Альваресдан мағлубиятга учрагани кўпчилик экс-пертлар учун кутилмаган ҳолат бўлганди.
Сергейнинг ўша жанг арафасидаги ҳолатини эса мазкур жанжал билан изоҳлаш мумкин. TMZ-нинг тахмини бўйича, спортчи тадбирда ўша қиз билан кун тартибига амал қилмаган ҳолда иштирок этиб, кейин танишган. Бунга эса ишонса бўлади. Боиси, Ковалёв олдин ҳам шунга ўхшаш муаммоларга дуч келган бўлса-да, анча чидамлилиги боис, бу унинг иштирокидаги беллашувларда унчалик ҳам билинмасди.
Бунга мисол сифатида эса Сергейнинг Андре Уорд ва Айзек Чилембга қарши кечган жангларини келтириш мумкин.
Қисқаси, Ковалёвнинг жисмоний ҳолати унчалик ҳам яхши эмаслиги олдин ҳам маълум эди.
Албатта, Р4Р (The Ring журнали) рейтинги бўйича иккинчи ўринни эгаллаб турган ва асосий 3та тасниф бўйича жаҳон чемпиони бўлган боксчининг Америка қонунчилигини бузиш билан боғлиқ жиддий муаммоси кўпчилик россиялик мутахассисларни хавотирга солмоқда. Бу ҳақда Ковалёвнинг менежери Эгис Климас ҳам таъкидлаб ўтди
- Ҳозир Сергейнинг кўз ўнгида жанг унга қўйилган айблов билан бошланмоқда. Умид қиламизки, Ковалёвда беллашувдан сўнг, судда барчасини ўз ўрнига қўйиш имконияти юзага келади, - деди боксчининг менежери Климас «360» телеканалига берган интервьюсида.
Унинг фикрига шунингдек, бокс бўйича Олимпиада чемпиони Егор Мехонцев ҳам қўшилади. Шунингдек, у нима учун мазкур ҳодиса олдинроқ эмас, нега айнан Сергейнинг реванш жангига саноқли кунлар қолганида кун тартибига олиб чиқилганлигига тушунмаётганлигини таъкидлади.
- Бу салбий ҳолат. Лекин мен аслида бу воқелик қандай юз берганлигини билмайман. Боксчи қизга ҳужум қилганмикан ёки қиз унга? Интернетда Ковалёв қизнинг бурнини синдирганлиги, яна танасининг айрим қисм-ларига жароҳат етказганлигини ҳам ўқидим. Балки қизнинг ўзи Сергейга ташлангандир ва маст бўлгандир? Буни ҳеч ким билмайди.
Нима учун бу жанжалли ҳодиса энди қўзғаталаётганлигини тушунолмаяпман. Балки қиз дўппосланган пайтда Ковалёв унинг ёнида бўлгандир? Шунинг учун қиз ҳамма айбни унга ағдаришга ҳаракат қилгандир?
Муҳим жангга тайёргарлик кўриш жараёнида сизда суд ва қамоққа тушиш хавфи юзага келса, қандай аҳволга тушишни тасаввур қилаверинг. Мен АҚШда қонунларнинг қаттиқлиги ва бундай ҳодисага қандай муносабатда бўлишларини жуда яхши биламан.
Боиси, мен у ерда яшаганман. Ушбу воқелик Сергей учун озодликдан маҳрум этилиши ва рингда қийналиб топган маблағларини сарфлаш билан якун топиши эҳтимолданхоли эмас. Лекин бу ёмон сценарий. Менимча, ушбу ҳодисанинг салбий томони бўлганида, ушбу воқелик эртароқ юзага чиққан бўларди, - деди Мехонцев «Чемпионат»га.
Аммо россиялик чарм қўл-қоп устасининг промоутери Кэт Дуванинг таъкидлашича, Сергейнинг Альваресга қарши кечадиган реванш жанги ўтказилади ва спорт атрофидаги бошқа воқеликларга спортчи баҳорда қайтади.
Ҳозирча мазкур жанжалнинг қаҳрамонлари борасида хулоса чиқариш қийин. Ковалёвнинг ўзи юз берган жанжалли ҳодиса бўйича ҳозирча ҳеч қандай баёнот бермади. Лекин ишонч билан айтиш мумкинки, бу ҳақда ундан Альваресга қарши кечадиган беллашув олдидан сўрашади. Ҳар қандай ҳолатда ҳам ушбу воқеликка март ойида ойдинлик киритилади. Шунинг учун Сергейнинг муҳим жанг олдидан совуққонликни йўқотмаслиги ва унга пухта тайёргарлик кўриши, кейин эса ўзининг боксдан ташқаридаги муаммолари билан шуғулланишига тўғри келади.
Айтганча, куни кеча Сергей Ковалёв камарини қайтариб олиш учун амалдаги WBO йўналиши чемпиони колумбиялик Элейдер Альваресга қарши рингга кўтарилди.
Жанг 12 раунд тўлиқ давом этди ва ғолиб боксчи очколар ҳисобига кўра аниқланди. Раундларнинг каттагина қисмида устунликка эга бўлган Ковалёв ҳакамлар қарорига кўра 116-112, 120-108 ҳисобида ғалаба қозониб, WBO чемпионлик камарини қайтариб олди. У ўтган йилнинг август ойида еттинчи раундда техник нокаут эвазига Альваресга имкониятни бой берганди.
Манба: stadion.uz
Киритилди: 12:11, 04.02.2019. Ўқилди: 4853 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
