Кўплаб мухлислар ҳалигача «Пахтакор» ва «Қайрат» клублари ўртасидаги шарқона «эл-класико»ни ширин хотиралар билан эслашади. Тўғри, ҳозирда вазият ўзгарган, аммо яхши бир турнир ташкил этишнинг иложи борку!
Турнирнинг тахминий иштирокчилари ва регламенти
Ўзбекистон, Қозоғистон, Қирғизистон, Туркманистон, Тожикистон. Аввалига синов турнир сифатида ўтадиган мусобақанинг илк иштирокчилари айнан шу терма жамоалар бўлиши бизнинг жамоалар учун айни муддао бўлиши аниқ. Жамоалар бир гуруҳда жойлашган ҳолда 3 та турда иштирок этишади ва кўпроқ очко тўплаган жамоа ғолиб бўлади. Кўринишидан соддадек туюлган турнир биз учун анча фойдали бўлар эди.
Турнирнинг фойдаси
Бу турнир узоқ масофаларга учиб бориб ўртоқлик учрашувлари ўтказишдан кўра анча фойдалироқ бўлиши аниқ. Айниқса, сўнгги йилларда қўшниларимизнинг футбол бобида анча ўсишга эришгани ҳам тахсинга сазовор. Бу ўз навбатида учрашувларнинг кескин ва томошабоп бўлишини таъминлайди.
Терма жамоамиз легионерларсиз таркиб билан иштирок этишса, бир нечта ички чемпионатимиздаги футболчиларни синаб олишимизга яхшигина имкон туғдирарди. ЖЧ саралашлари арафасида бу турнир маҳаллий футболчиларимизнинг савияси ва ҳолатини кўриб олиш учун қулай имконият.
Айниқса, сўнгги Осиё кубогидан кейин Қирғизистон билан ўртоқлик мақомидаги учрашувда иштирок этиш бу мухлисларимизда қизиқиш уйғотиши аниқ. Бу турнир Тошкент шаҳрида ўтказилиши шарт эмас. Водийдаги «Нефтчи» ва «Навбаҳор» стадионлари ёки воҳада бу учрашувларни бемалол юқори савияда ўтказа олишади.
Янгиланиш, янги ғоя, янги марралар
«Футболимиз ривожи учун янги ғоялар жуда ҳам муҳим», деганида Умид Аҳмаджонов нақадар ҳақ эди. Бу турнир нафақат футболчиларимиз, балки қўшни, қардош халқлар билан алоқларимизни яхшилаш йўлида ташланган спортча қадам бўлиб хизмат қилиши аниқ. Йиллар давомида узилиб қолган муносабатлар Ўзбекистон Президенти Шавкат Мирзиёев томонидан қайта тикланди.
Бу муносабатларни янада мустаҳкамлаш йўлида бу турнир бизга ҳам, қўшниларимизга ҳам фойдадан ҳоли бўлмас эди. Президентимиз томонидан тикланган дўстона алоқалар янада мустаҳкамланар, янги даражага кўтирлган бўлар эди.
Бу шунчаки янги ғоя, холос. Унинг амалга ошиш-ошмаслиги ҳам каттагина сўроқ остида турибди. Футболимиз ривожи учун янги ғоялар зарар қилмаслигини ҳисобга олсак, бу таклифни ,албатта, дўппини қўлга олиб, ўйлаб кўриш керак.
Я.У.
Матнда хатолик топсангиз, ўша хатони белгилаб, бизга жўнатинг (Ctrl + Enter).