Кеча ЎзПФЛ бош директори ва унинг ёрдамчиси “Металлург” клуби қароргоҳига борди
Улар биринчи навбатда “Ўзметкомбинат” АЖ бош директори (клуб президенти) билан учрашувда иштирок этган.
Олинган маълумотга кўра, комбинат стадион, база ҳамда клуб академияси учун ажратилган ер майдонини “Металлург” футбол клуби балансига ўтказиб берган. Демак, ўз стадионига эга бўлган клубларимиз сони яна биттага кўпайган (маълумотни яхшилаб текшириб олиш керак).
ПФЛ 2019 йилги мавсумдан бошлаб Суперлига клубларидан академия масаласини жиддий талаб қилди. Якунда “Пахтакор”, “Металлург”, АГМК ва “Бухоро” футбол клублари академиялар учун 1,25 миллиард сўм ўтказиб бериш бўйича келишувга эришди. Мазкур клублар шу йил ҳам ўз академиясини ишга туширмаса, 2020 йилда бу сумма икки баробар кўпайиб, 2,5 миллиард сўмни ташкил қилади (ундан кўра ўз академиясига эга бўлгани минг марта яхши).
“Металлург” томони масалани яхши тушуниб турибди. Ва ниҳоят шунча йил ўтиб, комбинат футбол академияси учун ер масаласини ҳал қилган. Шу йил қурилиш ишларини тўла якунлаш режага киритилган. Яъни, 2020 йилга қадар “Металлург” ҳам ўз футбол академиясига эга бўлади. Стадион майсаси ўтган мавсумдагидан анча яхшиланган, прожектор муаммолари ҳал этилган.
“Ўзметкомбинат”да 13 мингга яқин ишчи бор. Уларнинг бўш вақтларини мазмунли ўтказиш мақсадида стадионга жалб қилиш ҳам мумкин. Бош директорлар бу масалани ҳам ўзаро гаплашиб олган. “Металлург” футбол клуби томонидан 2019 йилги мавсум учун амалга оширилган ишлар билан ПФЛ расмий канали орқали батафсилроқ танишиш мумкин.
Диёр Имомхўжаев
Матнда хатолик топсангиз, ўша хатони белгилаб, бизга жўнатинг (Ctrl + Enter).