“Насаф” бугун бу йилги Coca Cola Суперлигасининг 2-тур учрашувини ўз майдонида Жиззахнинг “Сўғдиёна” жамоасига қарши ўтказади.
“Насаф” бугун бу йилги уй учрашувларини бошлаб беради. Учрашув “Марказий” стадионимизда соат 19:15да бошланади. Албатта, стадионга ташриф буюрган футбол ишқибозлари, янги мавсумнинг тантанали очилиш маросими иштирокчисига ҳам айланишади.
“Насаф” ва “Сўғдиёна” жамоалари миллий чемпионат доирасида бунгача ўзаро 38 маротаба куч синашган. Шулардан 30та ўйинда “аждарлар”нинг қўли баланд келган. 1та ўйинда ўзаро дуранг қайд этилган. Ўзаро учрашувларда 113 марта дарвозаларга гол киритилган. Тўплар нисбати бўйича устунлик ҳам жамоамиз томонида – 82:31.
Қаршида бўлиб ўтган ўзаро 19та учрашувнинг 16тасида “Насаф”нинг қўли баланд келган, 2 марта “Сўғдиёна” жамоаси ғалабага эришган. Қаршида ўтказилган ўзаро учрашувларнинг фақат биттасида, голсиз дуранг қайд этилган. Қаршидаги учрашувларда дарвозаларга жами 66та гол киритилган. Албатта, “аждарлар” кўпроқ гол уришга эришган - 49:17.
“Насаф” ўз тарихида бугун олий лигадаги 652-учрашувини ўтказади, бўлиб ўтган 361та учрашувда ғалаба, 126та учрашувда дуранг ва 164тасида мағлубиятга учраган. Тўплар нисбати: 1165 – 725ни ташкил этади.
Жамоамиз устози Рўзиқул Бердиев бош мураббийлик фаолиятида, ўз шогирдларини бугун миллий чемпионат доирасидаги 185-учрашувда майдонга бошлаб тушади. Агар “аждарлар” ғалабага эришса, бу жамоамиз устозининг 110-ғалабаси сифатида тарихдан жой олади.
Бугунги учрашувда жамоамизга омад ва ғалаба ёр бўлсин, деймиз!
Азиз мухлисларимизни эса “Марказий” стадионимизга чорлаймиз ва ажойиб футбол учрашувини томоша қилиб, яхши хордиқ чиқаришини таклиф этамиз!
Матнда хатолик топсангиз, ўша хатони белгилаб, бизга жўнатинг (Ctrl + Enter).