Сурхондарё вилоят болалар ва ўсмирлар футбол академияси директори Фурқат Мустафоқулов "Сурхон" клуби матбуот хизматига интервью берди.
— Футболчилик фаолиятингизни қачон бошлагансиз?
— Футболчилик фаолиятимни 13 ёшимдан бошлаганман. "Сурхон" клубида 1995 — 2000 йилларда тўп сурганман. Сўнгра оғир жароҳатдан кейин мураббий бўлиб футбол мактаб интернатида ишлаганман.
— Қачондан Сурхондарё вилоят болалар ва ўсмирлар футбол академиясига директор бўлдингиз?
— 2018 йил 20 июлдан бошлаб Сурхондарё болалар ва ўсмирлар футбол академиясида директор бўлиб ишлаб келмоқдаман.
— Бугунги кунда футбол академияда шароитлар қай даражада?
— Шароитлар ёмон эмас. Фақат шу табиий газ муаммо. Қишда болаларимиз бироз қийналишади.
— Футболчилар футбол академиясига қай тартибда танлаб олинади?
— Асосан селекция ишлари билан. 3 нафар селекционер мураббийларимиз бор. Футболчилар асосан умумий ўрта таълим мактабларидан, БЎСМлардан саралаб олинади.
— Академия директори сифатида келажакда нималарни ўзгартириш ниятингиз бор?
— Академияни моддий техникасини, базасини ривожлантириш, сунъий қопламали майдон қуриш, мурраббийларни малакасини ошириш, туманларда футболни оммавийлигини ошириш ниятим бор.
— Бугунги кунда Сурхондарёда футболчи етишиб чиқмаётганлиги нима сабаб бўлмоқда деб ўйлайсиз?
— Сурхондарё — футболчилар юрти. Ҳозирги кунда Ўзбекистоннинг бир қанча клубларида вилоятимизда етишиб чиққан футболчилар, Суперлига баҳсларида иштирок этиб келмокда. Ҳозирги кунда академиянинг 24 нафар ўқувчилари U-18 ва U-21 мусобақаларида ўйнаб келмокда. Ишонаманки, 1-2 йилдан кейин ушбу футболчилар асосий таркибга жалб қилинади.
— Футболчи бўлиб етишиш учун айнан футбол академиясида таҳсил олиш шартми?
— Ҳозирги кунда терма жамоаларимизга жалб қилинаётган асосий футболчилар "Бунёдкор", "Насаф", "Пахтакор","Машал", футбол академиялардан етишиб чиққан футболчилардир. Ҳудудий Академиялар ўртасида 4 та ёшлар тоифасида ўқувчилар ўртасида Ўзбекистон чемпионати, Кубоги ташкил қилинди. Ушбу мусобақалардан ўқувчилар терма жамоалар мураббийлари томонидан назорат қилиниб, сараланиб олинди. Ўқувчилар академияда таҳсил олиши шарт деб биламан.
— Бугунги кунда академияда таҳсил олган футболчиларнинг бирортаси Суперлига асосий ёки ўринбосарлар таркибида бўлса ҳам тўп сураяптими?
— Юқорида таъкидлаб ўтганимдек, академия таҳсил олаётган 24 нафар ўқувчилар "Сурхон" футбол клубимизда вилоятимиз шаънини ҳимоя қилиб келмокда.
— Академия майдони талаб даражасида эмас. Бу бўйича бирор чора-тадбирлар кўрилдими?
— Академияда 2та табиий майдон мавжуд. Ҳозирги кунда майдонлар талаб даражасида. Майдонни ҳозирги кунда суғориш ишлари олиб борилмокда.
— Академияда футболчиларнинг дам олиш хоналари талаб даражасидами?
— Академияда футбол ўйинларини таҳлил қилиш хонаси, ўқувчилар бўш вақтларида компьютер ўйнаши учун махсус хона, дам олиш учун алоҳида хоналар мавжуд.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
