Кеча Ўзбекистон Кубоги 1/16 финалдан ўрин олган «Чуст-Пахтакор» — «Металлург» учрашуви бўлиб ўтди. Тажрибали меҳмонлар ушбу учрашувда қийинчилик билан чустликларни мағлуб этиб, кейинги босқичга йўл олди. Айтиш керакки, ёш жамоалардан саналган «Чуст-Пахтакор» Олий лига вакилига етарлича муаммо туғдира олди. Лекин ўйнда барибир тажриба ўз сўзини айтиб, «Металлург» ғалаба билан ортга қайтди.
Биз ушбу баҳс якунига етганидан сўнг ҳар икки жамоа бош мураббийлари фикрлари билан қизиқдик.
Рустам Мирсодиқов («Металлург» бош мураббийи):
— «Чуст-Пахтакор» биринчи лига жамоаси саналади. Ҳар доим кубок учрашувларида 1-лига вакиллари олий лига клубларига қарши жиддий тайёргарлик кўради. Ўйиндан аввал шогирдларимга учрашув қийин ўтишини айтиб ўтгандим. Кутганимиздек, ўйин қийин ўтди. Шунга қарамай, ўз олдимизга қўйилган вазифани бажардик.
— Мезбон жамоанинг қайси футболчисининг ҳаракатлари Сизда илиқ таассурот қолдирди?
— Барчаси! «Чуст-Пахтакор» футболчилари майдонда жонларини жабборга бериб ҳаракат қилишди.
— Шогирдларингиз ўйиндан олдин берган кўрсатмаларингизни бажаришдими?
— Дастлабки бўлим кутганимиздек бўлмади. Иккинчи бўлимда иккита ўзгариш қилганимиздан сўнг ўйинимизда ўзгариш кузатилди. Шундан сўнг тўпни ўз назоратимизга олиб, ўйин сўнггида ғалаба тўпини киритдик.
Камол Жўнашев («Чуст-Пахтакор» бош мураббийи):
— Ўйин яхши ўтди. Шогирдларим ҳаракатидан қониқиш ҳосил қилдим. Барибир олий лига 1-лигадан бир поғона баландда туради. Шунинг учун тажриба ўз сўзини айтди. Ҳисобда ютқазган бўлсакда, шогирдларимга эътирозим йўқ. Бу бизнинг мавсумдаги дастлабки ўйинимиз. Чемпионат ҳали узоқ давом этади. Мақсадимиз чемпионатда муносиб қатнашиб, Чуст футболини Ўзбекистонга танитиш. Шу мақсад йўлида бошлаган ишимизни давом эттирамиз!
— Жамоа олдига қандай вазифалар қўйилган?
— Дастлабки вазифамиз — чемпионатнинг биринчи босқичида кучли саккизликдан ўрин олиш. Иккинчи босқичда эса раҳбарлар янги вазифа қўйишади. Асосийси рақобатбардош жамоани ташкил этиш.
— Таркибга янги қўшилган Мухтор Фозилов, Жерри Эмонгпаре каби футболчилар нима учун майдонга тушишмади?
— Улар ҳали тиббий кўрикдан ўтишганича йўқ. Яқин кунларда тегишли муолажаларни олишганидан сўнг яна сафимизга қўшилишади.
Дилшод Назиров («Чуст-Пахтакор» сардори):
— Бугун ғалаба учун майдонга тушгандик. Аммо рақиб олий лига жамоаси бўлганлиги ҳамда бу бизнинг ушбу мавсумдаги дастлабки ўйинимиз бўлганлиги боис ўзимизни тўлиқ кўрсата олмадик. Шундай бўлсада мураббийимизни кўрсатмаларини бажаришга ҳаракат қилдик. Лекин бироз омадимиз келмади. Ўйлашимча, «Металлург» иккинчи голни ўйиндан ташқари ҳолатда киритди. Шунга эътибор берилмади.
«Чуст-Пахтакор»ни ҳозирги ҳолатга келишига сабабчи бўлган инсон — жамоа бошлиғи Зокиржон Маҳмудҳожиевнинг фикрлари биз учун ҳам қизиқ эди.
Зокиржон Маҳмудҳожиев («Чуст-Пахтакор» жамоаси бошлиғи):
— Чиройли ўйин бўлди. Жамоамизни олий лига клубига кучи етмади. Шунга қарамай муносиб қаршилик кўрсата олдик. Таркибимиздаги айрим асосий футболчиларимизнинг бугун жамоага ёрдам бера олмаслиги ҳам ўз сўзини айтди. Чемпионатнинг биринчи турида «Пахтакор-2» ни қабул қиламиз. Ушбу учрашувда чиройли ўйин кўрсатиб, мухлислар ишончини оқлашга ҳаракат қиламиз!
— Тошкентнинг «Пахтакор» жамоаси «Чуст-Пахтакор»га ўз ёрдамини бериши ростми?
— Жамоамиз «Пахтакор»нинг фарм-клуби эмас. Лекин Тошкентнинг «Пахтакор» жамоаси бизга ўз ёрдамини бериб келмоқда. Шу кунларда ёшлар терма жамоамизнинг ҳужумчиси сафимизга келиб қўшилади.
«Чуст-Пахтакор» (Чуст) — «Металлург» (Бекобод) 1:2 (1:1)
Ҳакамлар: Р. Копадзе (Фарғона), А. Ўринов (Фарғона), Н. Тошматов (Фарғона), Р. Толибжонов (Фарғона).
Назоратчи: А. Маражабов (Андижон).
Голлар: Элдор Норматов (5) — Дилмурод Каримов (4), Шаҳзод Нурматов (81)
«Чуст-Пахтакор»: Музаффар Абдуллаев, Элёр Оҳунов, Сардор Асқаров, Даврон Маматов, Ҳасанбой Эргашев, Ҳумоюн Ибрагимов, Дилшод Назиров, Шуҳрат Ҳамидов (Бобур Расулов, 61), Элмурод Сотиволдиев, Элдор Норматов, Аҳмад Раимжонов.
«Металлург»: Маъмур Икромов, Одил Исабоев, Саидкамол Акбаров, Ҳикмат Ҳошимов, Дилмурод Каримов, Дониёр Одилов, Шаҳзод Нурматов, Сардор Расулов, Даврон Каримқулов, Руслан Вагапов, Жаводулла Ибрагимов (Ғулом Ҳалимтоев, 59)
Огоҳлантиришлар: Сардор Асқаров (86) — Ҳикмат Ҳошимов (57), Саидкомил Акбаров (60).
Чуст. 1253 томошабин.
Азамат УМАРОВ тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
