Айримлар футболда дарвозабон бўлиш учун инсон «аҳмоқ» бўлиши керак деб ҳисоблайди ва улар қайсидир маънода ҳақиқатни айтади. Сиз бунда ўз қўлларингиздан унумли фойдаланишга, жамоани бирлаштириш ва ўзингизни ҳар нарсага тайёр тутишга ўрганишингиз керак бўлади. Дарвозабонлар ўз жамоалари учун катта ишни бажаришади. Айнан уларнинг ҳаракатлари сабаб ҳам кўп ҳолларда ғалаба (айрим пайтларда эса мағлубият) қозонилади. Қуйида эътиборингизга АПЛнинг 25 (29) турга қадар энг яхши деб топилган дарвозабонлари рўйхатини тақдим этамиз.
10. Уго Льорис («Тоттенхэм»)
Франция терма жамоаси аъзоси ушбу рўйхатда яқин-яқингача нисбатан баланд поғонада эди. Аммо сўнгги пайтлардаги кутилмаган хатолар Льорисни сал қолса, кучли ўнликдан тушиб қолишига сабабчи бўлди. «Вулверхэмптон» билан ўйиндаги иккита гол ҳам айнан Льорис «ташаббуси» билан юз беради. «Манчестер Сити»га қарши баҳсда ҳам Уго битта голни рақибларга совға қилган.
9. Каспер Шмейхель («Лестер»)
«Тулкилар»нинг жорий мавсуми режадагидек кетмаяпти. Аммо Шмейхель айрим паллаларда жамоаси жонига оро кирмоқда. Даниялик посбон «Лидс»га қарши ғалабали баҳсда ўйиннинг энг яхши футболчисига айланган эди. Умуман олганда, Каспернинг даражаси «Лестер»никига таққослаганда анча яхшироқдир.
8. Лукаш Фабьяньски («Вест Хем»)
Ушбу асрда «Арсенал» сафини тарк этган бошқа дарвозабонлар каби, Фабьяньски ҳам фақат ва фақат яхши тарафга ўзгариб борди. Айни дамда АПЛдаги 15 мавсумини ўтказаётган футболчи «Вест Хэм» сафидаги энг ёрқин вакиллардан бири бўлиб турибди.
7. Жозе Са («Вулвз»)
Сага «бўрилар» сафида ўта қийин вазифа юклатилган эди. Чунки у ажойиб формада бўлган Руй Патрисиунинг ўрнини эгаллаши керак бўлган. Аммо Са илк мавсумидаёқ жамоага тез ва сифатли мослашиб кета олди. Айни дамда эса унинг жамоаси АПЛдаги чақилиши қийин бўлган «ёнғоқлар»дан биридир.
6. Эмилиано Мартинес («Астон Вилла»)
Ушбу дарвозабон «Брайтон» футболчиси Нил Мопейга раҳмат айтиши керак. Негаки, айнан унинг Бернд Ленога ишлатган қўполлиги сабабли, 2020 йилнинг ёзидан Мартинес имкониятга эга бўла бошлаган эди. Айни пайтда Аргентина терма жамоаси аъзоси дунёнинг энг яхши дарвозабонлари сафидан жой олган.
5. Эрон Рамздейл («Арсенал»)
Рамздейлни ким ҳам «Арсенал»да порлайди деб ўйлабди дейсиз? Дарвозабон янги жамоасининг энг барқарор футболчиси бўлиб турибди. Яқин келажакда эса Рамздейлни Англия терма жамоасининг янги «биринчи рақами» кутмоқда.
4. Давид Де Хеа («МЮ»)
Де Хеа ўтган мавсум якунларига кўра, жамоада қолиши эҳтимоли кам футболчи сифатида кўрилаётган эди. Унинг ўрнига Дин Хендерсон имкониятга эга бўла бошлайди. Аммо ҳақиқий тажриба ва қобилият барибир ўз сўзини айтди. Айни дамда «МЮ» дарвозабони ўз жамоасини қутқаришдан чарчаётгани йўқ.
3. Эдерсон («Манчестер Сити»)
Пеп Гвардиола ўз фаолияти давомида қидирган дарвозабонини топган эди. Эдерсон «шаҳарликлар» таркибида энг яхшилардан бири бўлиб келмоқда. Тўғри, у энг зўр дарвозабон бўлмаслиги мумкиндир, аммо энг яхши ҳимоячи-дарвозабон! Бразилия терма жамоаси аъзоси Гвардиола томонидан кўп марта, айнан ҳимоячи ролида фойдаланилади.
2. Эдуар Менди («Челси»)
Сиз яна Петр Чех каби маҳоратга эга дарвозабонни «Челси»га келишини кутган бўлишингиз мумкин. Аммо, балки ундан ҳам яхшироғи келди. Яқиндагина ФИФАдан йил дарвозабони совринини қабул қилиб олган футболчи, қисқа вақт ичида ўзини кўрсата олди. Менди жаҳоннинг ва Африканинг энг яхши посбонига айланди. Шунга қарамай, «Бёрнли» билан кўрсатган номутаносиб ўйини сабаб, уни иккинчи ўринга қўйишга мажбур бўлдик.
1. Алиссон («Ливерпуль»)
АПЛнинг энг яхши дарвозабони дейсизми? Ҳа, биз бу номга Алиссонни лойиқ кўрамиз. Чунки унинг майдондаги вазифаси кенг қамровлидир. Етакчилик, етказиб бериш, ҳимояланиш ва реакцияда, айни дамда Бекерга етадигани топилмайди. Клопп эса ўз жамоасидан жавоҳирларни кашф этишда давом этади.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
