Мана, янги футбол мавсумини ҳам бошлаб олдик. 2021 йил якунларига кўра, «Пахтакор», «Локомотив», «Қўқон-1912», «Бунёдкор» ва «Насаф» жамоалари матбуот хизмати фаолияти алоҳида эътироф этилганди. Шуни назарда тутган махсус мухбиримиз «Насаф» матбуот гуруҳи раҳбари Сардор Нурийни суҳбатга чорлаб, янги мавсум режалари хусусида гурунглашди.
- Сардор, матбуот хизмати кўп тармоқли бўлиб, ҳозирда унинг шакл-шамойилию, йўналиши тамомила ўзгарди.
- Жуда тўғри. Ахир интернет асрида яшаяпмиз, ҳар лаҳзада бирор янгилик чиқиб турибди. Хусусан, футболга тааллуқли сўнгги янгиликларга талаб катта. Дейлик, ўйинни истаган вақтда тўғридан-тўғри кузатиш имконияти туғилди. Шундай экан, клублар матбуот хизмати ҳам замондан ортда қолмаслиги, барчасини тезкор равишда йўлга қўйиши шарт. Акс ҳолда, мухлислар талабини қондиролмаймиз. Албатта, бу борада ҳали кўп изланишимиз, жаҳон футболи тажрибасини ўрганишимиз керак.
- 2021 йилги матбуот хизмати ютуқларини нима билан изоҳлайсиз?
- Мана, 3 йилдирки, пандемия шароитида яшаяпмиз, ишлаяпмиз. Бу ҳолат биринчи навбатда, санитария-гигиена қоидаларига қатъий амал қилишни тақозо этади. Шундан келиб чиққан ҳолда, мухлислар билан иложи борича тушунтириш ишларини олиб боряпмиз. Қаршидаги «Марказий» стадионида матбуот хизматига алоҳида жой ҳозирланган - овоз режиссёри, сухандон, шарҳловчи, ўйинни эфирга узатувчилар гуруҳи учун махсус хоналар бор. Интернет тармоғини сифатли ва тез ишлаши ҳам тўлиқ таъминланган. Ҳар бир ўйиндан олдин қайднома билан бирга жамоаларга доир статистик маълумотлар буклет шаклида тарқатилади. Учрашувдан сўнг матбуот анжумани шинам залда ташкил этилади. Албатта, бу ютуқлар замирида клуб раҳбариятининг катта эътибори турибди.
- Ҳали ҳам мухлислик маданиятига амал қилмайдиганлар йўқ эмас. Одатда бундай «мухлис»ларга қандай муносабат билдирасизлар?
- Ўйиндан олдин ҳам, унинг давоми ва танаффусда ҳам стадионда ўзини тутиш талаблари алоҳида эслатилади. Дейлик, қоидага хилоф хатти-ҳаракатлар ҳам мухлислар, ҳам клубга қимматга тушиши, бунга нисбатан кескин чоралар қўлланилиши мумкинлиги қатъий оҳангда таъкидланади. Бундай тарғибот-ташвиқот маълум даражада самара беряпти, албатта. Аммо трибуналарда тўлақонли тартиб ўрнатишда асло хотиржам бўлмаслигимиз керак.
- «Насаф»да ажойиб анъана шаклланган - клуби видеоускуналари ёрдамида ўйинларни тўғридан-тўғри «Спорт» телеканалига узатиш тажрибаси бор. Бу иш ўзини оқлаяптими?
- Албатта. Ахир ҳаммада ҳам «Насаф» ўйинларини стадионда кўриш имкони йўқ. Умуман олганда, учрашувларни клуб томонидан ҳам эфирга олиб чиқиш тажрибаси хорижда анча оммалашган. Ўзбекистонда ҳам клублар шу йўлдан борса, яхши бўларди. Қаршидан ўйинларни узатишда катта ижодий гуруҳ меҳнат қилади - тажрибали режиссёр Туроб Ҳайдаров, малакали тасвирчилар Шуҳрат Хўжаназаров, Отабек Эгамбердиев, Санжар Мўминов, режиссёр ёрдамчилари Ҳусниддин Раҳмонов, Улуғбек Каримов. Гуруҳимиз нафақат «Насаф», балки «Машъал», «Бухоро», «Динамо» ва «Шўртан» жамоалари ўйинларини ҳам эфирга узатишда фидоийлик кўрсатади. Бу ишимиз ПФЛнинг ташаккурномасида ҳам алоҳида эътироф этилди.
- Болалигингиздан «Насаф»га мухлислик қилган экансиз. Қарангки, бугун жамоа тизимида иш олиб боряпсиз.
- Мухлислик - бу унутилмас хотиралар. Ҳа, болалигимдан «Насаф» «жинниси»ман. Албатта, севимли клубимда ишлаш - мен учун ўзгача шараф. Жамоага қайсидир йўналишдан фойдам тегса, бас. Бобом, таниқли адиб Самар ота Нуров (Нурий) мени шундай тарбиялаган.
- 2022 йилги футбол мавсуми ҳар қачонгидан муросасиз кечиши тахмин қилинмоқда. «Насаф» вакили сифатида айнан нималарни кутяпсиз? Режалар қандай?
- Дарҳақиқат, бу йил чемпионатимиз ўзгача тус олса керак. Ҳар ҳолда, бирор жамоага осон бўлмаслигини бемалол тахмин қилиш мумкин. Буни клубларнинг тайёргарлик жараёни ва транфсерлари ҳам кўрсатиб турибди. Биласиз, «Насаф» кенг фронт бўйлаб кураш олиб боради. Айниқса, ОЧЛ саралаши «плей-офф» ўйини муҳим. Ҳа, жамоамиз суперкубокни «Пахтакор»га бой берди. Лекин бундан фожиа ясаш ноўрин. Олдинда муҳим ўйинлар кўп.
Режаларга келсак, мавсум олдидан «Марказий стадионида катта кўламда иш амалга оширилди. Жумладан, медиа марказ сифатли таъмирдан чиқарилди. Буёғига интернет журналистикасига катта эътибор қаратамиз. Иш сифатини кескин яхшилаш учун матбуот хизмати техник имкониятларини ошириш кўзда тутилган. Дейлик, интернет маъмури ўз дастурини тайёрламоқда.
- Демак, «Насаф» матбуот гуруҳи жаҳон тажрибасини ўзлаштириш учун ҳамон изланишда...
- Худди шундай. Замон ўзгаряпти, талаблар ўзгаряпти. Қаранг, ўзимизча Сурия, Ливан, Сингапур ва Ҳиндистон футболини назарга олмаймиз. Аммо ушбу мамлакатларда ривожланиш катта эканлигини унутмаслик керак. Ҳаммаси мазкур юртлар миллий жамоалари ўйинида кўзга ташланяпти. Уларда инфратузилма юксалиши билан ижобий силжиш кузатилмоқда. Албатта, бизда ҳам футболга давлат даражасида қаралаётгани эътирофга муносиб. Лекин матбуот хизмати йўналишида Яқин Шарқ мамлакатлари илғор тажрибасини ўрганишимиз шарт. Оддий мисол, араб клубларининг оддий ўйинида ҳам юзлаб журналист иш олиб боради. Бизда эса... Шундай экан, ҳали кўп изланишимиз лозим. Қачонки, футболни халқимизга холис ва шаффоф ҳолатда етказиб берсак, унга қизиқиш янада ошади ва бу умумманфаатга хизмат қилади.
Ҳусан ТЕМИРОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
