Ўтган йили ўз ички чемпионатларида ғолибликни қўлга киритган икки жамоа бу йили Европанинг энг нуфузли турнирида, шу кеча тунда тўқнаш келади. Биринчи учрашув 6-апрель куни ўткизилган бўлиб, унда мезбонлар "Манчестер Сити" "Атлетико Мадридни" кичик (1:0) ҳисобида мағлуб этган.
Бу баҳсдан футбол мухлислари жуда кўп нарсалар кутмоқда, ўйинга бўлган эътибор жуда ҳам катта. Сабаби "Атлетико" ва "Манчестер Сити" ўртасида қарама-қаршиликлар кўп. Бири олов бўлса, бири муз. Бири баҳор бўлса, бири ёз. "Атлетико" ҳимоявий ўйинни танласа, "Манчестер Сити" доим ўйинни назорат қилиб, ҳужумкор ўйин кўрсатишни афзал билган. Таъкидлаб ўтиш жоизки, иккала жамоа ҳам ўзи танлаган услуб бўйича дунёнинг исталган жамоасига маҳорат дарси ўта олади.
ММАни тушунмаган одам Ҳабиб Нурмуҳаммедовни ёқтирмайди, футболни тушунмаган одам эса "Атлетико"ни. Чунки, тушунмаган одамга иккисининг ҳаракатлари зерикарли туюлади. Лекин ҳақиқий футбол ихлосманди учун "Атлетико"нинг ҳимояланиши бу — санъатдир.
Аввалги учрашувда "Атлетико" ҳимоявий ўйиннинг энг юқори даражасини кўрсатиб берди. Тўғри, меҳмонлар битта гол ўтказиб юборди, лекин бу ҳали ҳеч нарса ҳал бўлмаганини, ҳамма нарса иккинчи ўйинда аниқ бўлишига далолат қилади.
Бугун биз вахшийлашган, голга ташна бўлган "Атлетико"ни кўрамиз, фақат, битта гол ургунига қадар. Мезбонлар агар ҳисобда олдинга чиқиб олишса, яна ҳимоявий ўйинга ўтади, жамоа ўз "тарелкаси"га қайтади. Яна қарши ҳужумда ўйнайди. Фелишдек учқур тулпори бор Симеоне қарши ҳужум маркабига минади.
Гвардиола ўз жамоаси билан ички чемпионатда бир неча бор совринни қўлга киритиб бўлди. Гвардиола ушлай олмаётган энг катта ўлжа бу - Европа чемпионлар лигасининг бош совринидир. Аввалги йили жамоа совринга бир қадам қолганда, сўнгги тўсиқдан ўта олмай, иккинчи ўринни эгаллаганди. Бу йили эса "шаҳарликлар"нинг нияти анча жиддий. Мухлислар ҳам, раҳбарият ҳам Пепнинг қаршисига шу совринни қўлга киритишни кўндаланг қўйишган.
Гвардиоланинг "Манчестер Сити"си ҳеч қачон рақибга мослашмайди, рақиб уларга мослашади. Лекин бугун озгина истисно содир бўлиши мумкин. "Сити" бу сафар гол уришдан кўра, ўтказиб юбормасликка кўпроқ тиришадигандек гўё. Гвардиола Симеонени жуда яхши танийди, унинг услубини ҳам. Агар мадридликлар ҳисобни очиб олишса, аввалги ўйиннинг сценарийси такрорланиши мумкин.
Жавоб учрашувига келишдан аввал "Сити" ўзининг энг яқиб таъқибчиси билан дуранг ўйнаб, деярли нақд бўлган чемпионликни насияга айлантирди. "Атлетико" эса бор эътиборини шу ўйинга қаратгани учун "Мальорка" тарафидан жазоланди. Иккиси ҳам бу ўйинга қаттиқ тайёргарлик кўрган, ғалабани қўлга киритадиган жамоа кўп қон тўкишига тўғри келади.
Авазбек Мирсаитов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
