Ўтган йили мамлакатимиз президентининг фармонига мувофиқ Қашқадарё вилоятидаги Чироқчи тумани негизида Кўкдала тумани ташкил этилди.
Навқирон туман аҳли соғлом турмуш тарзига ошуфта эл. Бу ерда бирон бир тадбир ёки тантанали маросим йўқки улоқ-кўпкари, кураш, шунингдек, футбол мусобақаларисиз ўтса. Шунинг учун бўлса керак кейинги йилларда бу ердан «чарм тўп»га ошно янги авлод камол топаяпти. Унга монанд кўп сонли мухлислар ҳам футболдан завқ-шавқ олишмоқда. Шулардан бири Орифжон Абдуллаевдир.
- Орифжон, Кўкдала аҳлининг футболга шайдолигини нима билан изоҳлайсиз?
- Кўкдалага айни баҳорнинг шу кезларида келсангиз кўнглингиз яйрайди. Яшилликка бурканган қир-адирлар, кўзни қувнатадиган лола қизғолдағу чучмомолардан баҳра оласиз. Биргина сўнгги ойларда бунёд этилган 20дан ортиқ сунъий қопламали футбол майдонларидаги ёш-ялангларнинг шўх-шодон овози кўнгилларга ором, дилларга ҳузур-ҳаловат бағишлайди.
- Шундай ям-яшилликда сунъий қопламали майдонга не ҳожат?
- Тўғри, биз баҳорда табиий майдонларда тўп тепиб, қиш, ёз куз ойларида сунъий қопламали майдонлардан фойдаланамиз. Ахир қишнинг айни чилласи, саратоннинг иссиғи-ю, кеч кузнинг салқин ҳавосида копток ортидан югуришга нима етсин.
- Шу туман қишлоқларидан катта футболга кириб келганлар ҳам анчагина экан.
- Нимасини айтасиз. Ёшлигимиздан қир-адирларда тўп тепиб вояга етдик. Ўз вақтида «Машъал», «Насаф»да ўйнаган Кенжа Тўраев, Самандар Шодмонов, Ойбек Тўлаганов, Абдували Тўраев, Нурилла Қўнғуровлар ҳам қишлоқ футболидан катта аренага чиқишган. Эрта тонгда футбол ўйнашнинг гаштини ўз вақтида чуқур ҳис этганмиз.
- Сизни ҳам Мойлижар қишлоғи жамоасининг тиниб тинчимас моҳир ҳужумчиси дейишади.
- Унчалик эмас-ов. Ҳар ҳолда қишлоқдаги тенгдошларимизни тўплаб ўйинлар ташкил этиб турамиз. Касбим тақазосига кўра қашқадарё алоқа терма жамоасида 10 йил ўйнадим. Қаршидаги ҳаваскорлар лигасининг «Броссмед» жамоаси аъзосиман. Айни пайтда Наврўз байрамига «қишлоғимиз ор-номуси учун» турнирига тайёргарлик кўраяпмиз. Унда 15дан ортиқ жамоа иштирок этади. Шулар негизида туманимиз терма жамоасини шакллантирамиз.
- Фарзандларингиздан ҳам футболга меҳр қўйгани борми?
- Тўрт нафар фарзандим бор. Тўққиз ёшли ўғлим Умар «Насаф» махсус футбол мактабига қатнайди. Мураббий Анвар Давлетшиндан «чарм тўп»нинг сир-асрорларини ўрганмоқда.
- Бундан кўриниб турибдики оиладаги футболга бўлган иштиёқ туман даражасида ҳам ўзининг сезиларли натижасини бераяпти.
- Бўлмасамчи, туманимиз ҳокими Хуррам ака Жўраев футболга меҳр қўйган раҳбарлардан. У киши ўз вақтида «Насаф» ПФКда президент бўлиб ҳам фаолият кўрсатган. Футболни обдон тушунади. «Насаф»нинг ғалабаларидан илҳомланиб, мағлубиятидан афсус чекканининг гувоҳи бўлганман. «Бунёдкор», шашти баланд «Олимпик» ҳам раҳбаримизнинг эътиборида. «Навбаҳор» кучаймоқда, «Насаф», «Пахтакор», «АГМК»лар ОЧЛга шайланаяпти. Бу Ўзбекистон фахри, миллий, олимпия терма жамоамиз пойдевори деб бизни янги давонлар сари чорлайди. «Кўкдала номи ўзбек футболида порлаши керак» деб юксак мақсадлар сари маррани баланд олишга интилаяпмиз.
Ҳусан ТЕМИРОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
