Сервер ЖЕПАРОВ: «Ливан билан ўйин... Менимча, ҳисоб 3:0 бўлади»
Ўтган ҳафта Ўзбекистон миллий жамоаси сардори Сервер Жепаров «Сеонгнам Ильва Чунма» клубининг тўлақонли аъзосига айланганидан хабарингиз бор.
Собиқ жамоаси «Ал-Шабаб» билан юзага келган можаро сабаб Сервернинг корейс клубидаги дебюти бироз орқага чўзилди. ФИФАнинг аралашуви билан ушбу ҳолат ярим ҳимоячимиз учун ижобий якунланди. Юзага келган вазият ва терма жамоамизнинг Ливанга қарши ўйини арафасида футболчининг фикрлари билан қизиқиб, "ИнтерФУТБОЛ" газетаси терма жамоамиз сардоридан эксклюзив интервью олди. Қуйида ушбу интервьюдан қисқача парча келтирамиз.
— Собиқ жамоангиз «Ал-Шабаб» устингиздан ФИФАга арз қилди. Эшитишимизча, ўз ўрнида сиз ҳам бунга жавобан халқаро футбол уюшмасига мурожаат этибсиз. Шу ҳақда гапириб берсангиз.
— Бу узоқ тарих. Шу пайтгача барчасига кўз юмиб келаётгандим. Лекин Гонконг билан ўйиндан сўнг вазиятнинг шу тахлит давом этиши яхшиликка олиб келмаслигини англадим. Клуб томонидан шартнома бандлари бузилаётгани ҳақида швейцариялик машҳур адвокат билан гаплашиб, ундан маслаҳат олдим. Юзага келган ҳолатни ётиғи билан тушунтирдим. Терма жамоа учун энг муҳим паллада, боз устига, сардор сифатида ўйин амалиётисиз қолаётганим клуб билан шартномани бир томонлама бузиб, ФИФАга арз қилишга мажбур этди. Ўйлайманки, бу тўғри қарор бўлди. Матбуотда ФИФА менга нисбатан дисквалификация чораси қўллаши хусусидаги хабарларни ўқидим. Шу ўринда қалам аҳлидан асоссиз маълумот бермасликлари ва бу орқали мухлисларда нотўғри таассурот уйғотмасликларини сўрардим.
— ЖЧ-2014 саралаши доирасидаги Ливанга қарши ўтадиган учрашув ҳақида нима дея оласиз?
— Аслида башорат қилишни ёқтирмайман. Лекин менимча, Ливанни 3:0 ҳисобида мағлуб этамиз. Ҳар қандай ҳисобдаги ғалаба учун 3 очко берилади. Муҳими, ишончли тарзда зафар қучсак, бу футболчилар руҳини янада кўтарарди. Кейин янги, жаҳон талабларига тўлиқ жавоб берадиган стадиондаги илк расмий учрашув ҳамюртларимиз хотираларида бир умр сақланиб қолишини истаймиз.
Камол НУР суҳбатлашди
Манба: www.interfutbol.uz
Киритилди: 11:07, 18.03.2013. Ўқилди: 7903 марта. Фикрлар: 37 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
