Ўзбекистон миллий терма жамоасининг ёрқин юлдузларидан бири Аббосбек Файзуллаев учун Россия Премьер-лигасидаги жорий мавсум мураккаб кечмоқда. 2023 йилда "Пахтакор" клубидан Москва армиячилари сафига кўчиб ўтган ҳужумкор футболчимизнинг самарадорлиги 2025 йил бошидан сезиларли даражада тушиб кетган. Ўтган мавсумларда ЦСКА таркибида етакчига айланган ва жамоасининг голли ҳужумларини ташкил этишда муҳим рол ўйнаган Аббосбекнинг бугунги ҳолати россиялик футбол экспертларининг ҳам диққат марказида.
Россиялик мутахассисларнинг Аббосбек Файзуллаев билан боғлиқ вазият ҳақидаги фикр-мулоҳазаларини тақдим этамиз.
Алексей Петрушин, "Динамо Москва" клубининг собиқ бош мураббийи:
"Файзуллаевнинг ўйинида пасайиш кузатилаётганини яшириш керак эмас. Сабаби, ЦСКА бош мураббийи Марко Николич қўллаётган ромб шаклидаги янги тактик схемага у мослашишига тўғри келмоқда. Бу машҳур "миланча ромб" тактикаси кўпчиликка яхши таниш бўлса-да, Аббос учун янги ва бунга тезда мослашиши осон эмас. Шунга қарамай, у жуда истеъдодли ва эътиборни тортадиган футболчи.
Шунингдек, Аббосбек терма жамоа ўйинларида кўп иштирок этмоқда ва бу унинг куч-қувватига таъсир қилаётган бўлиши мумкин. У ёш бўлишига қарамай, чарчоқ ҳис қилиши табиий ҳолат. Фақатгина Файзуллаев эмас, ЦСКАнинг бошқа футболчиларида ҳам кейинги пайтда чарчоқ аломатлари кўзга ташланяпти. Бунга мисол сифатида Иван Обляковни ҳам кўрсатиш мумкин."
Евгений Алдонин, ЦСКАнинг собиқ футболчиси ва мутахассиси:
"Кўпчилик Марко Николичнинг ромб схемаси Аббосбек Файзуллаевга мос келмай қолди, деяпти. Мен бу фикрга қўшилмайман. Чунки ромб – бу жуда ўзгарувчан ва мослашувчан тактика. Ўйинлар давомида жамоанинг тактик схемаси ўзгариши табиий ҳолат.
Файзуллаевнинг бугунги ҳолати унинг ўсиши ва ривожланишига туртки бўлади, деб ҳисоблайман. Аббос – мақсад сари интиладиган футболчи. У ўзининг юқори даражасини намоён қилиб бўлган ва мураббий ишончини қайтариб олиш учун яна ўзини кўрсатиши лозим. Жамоанинг етакчиси сифатида майдондаги ўйини орқали ўз мавқеини мустаҳкамлаши керак."
Александр Гришин, ЦСКАнинг собиқ футболчиси ва таҳлилчи:
"Агар футболчи яхши натижа кўрсатса, дарҳол унинг топ клублардан таклифлари борлиги ҳақида гапирила бошланади. Аммо Аббосбек Файзуллаев ҳақидаги гап-сўзларнинг қанчалик ҳақиқатлигини ҳали билмаймиз. Ҳозирча булар фақат миш-мишлар.
Аслида бу масалани трансфер амалга ошганидан кейин муҳокама қилсак арзийди. Файзуллаев ўзининг илгариги ёрқин ўйинларини қайта намоён қилиши керак. Ҳозирги ҳолати эса унинг Европага кетишига яқинлаштирмайди, аксинча, клубда ўзига бўлган ишончни қайтариши талаб этилади."
Эслатиб ўтамиз, Аббосбек Файзуллаев 2023 йилнинг август ойида ЦСКА таркибига қўшилганидан бери Россия чемпионати ва кубок мусобақаларида жами 65 та учрашувда қатнашиб, 8 та гол ва 21 та голли узатмани амалга оширган.
Шунингдек, 21 ёшли футболчи Ўзбекистон миллий терма жамоаси сафида 25 марта майдонга тушиб, рақиблари дарвозасини 8 маротаба ишғол қилган. Ҳозирда Transfermarkt портали унинг трансфер қийматини 8 миллион евро миқдорида баҳолаган. Аббосбекнинг ЦСКА билан шартномаси 2026 йилнинг ёзига қадар амал қилади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
