O‘zbekiston milliy terma jamoasining yorqin yulduzlaridan biri Abbosbek Fayzullayev uchun Rossiya Premyer-ligasidagi joriy mavsum murakkab kechmoqda. 2023 yilda "Paxtakor" klubidan Moskva armiyachilari safiga ko‘chib o‘tgan hujumkor futbolchimizning samaradorligi 2025 yil boshidan sezilarli darajada tushib ketgan. O‘tgan mavsumlarda SSKA tarkibida yetakchiga aylangan va jamoasining golli hujumlarini tashkil etishda muhim rol o‘ynagan Abbosbekning bugungi holati rossiyalik futbol ekspertlarining ham diqqat markazida.
Rossiyalik mutaxassislarning Abbosbek Fayzullayev bilan bog‘liq vaziyat haqidagi fikr-mulohazalarini taqdim etamiz.
Aleksey Petrushin, "Dinamo Moskva" klubining sobiq bosh murabbiyi:
"Fayzullayevning o‘yinida pasayish kuzatilayotganini yashirish kerak emas. Sababi, SSKA bosh murabbiyi Marko Nikolich qo‘llayotgan romb shaklidagi yangi taktik sxemaga u moslashishiga to‘g‘ri kelmoqda. Bu mashhur "milancha romb" taktikasi ko‘pchilikka yaxshi tanish bo‘lsa-da, Abbos uchun yangi va bunga tezda moslashishi oson emas. Shunga qaramay, u juda iste’dodli va e’tiborni tortadigan futbolchi.
Shuningdek, Abbosbek terma jamoa o‘yinlarida ko‘p ishtirok etmoqda va bu uning kuch-quvvatiga ta’sir qilayotgan bo‘lishi mumkin. U yosh bo‘lishiga qaramay, charchoq his qilishi tabiiy holat. Faqatgina Fayzullayev emas, SSKAning boshqa futbolchilarida ham keyingi paytda charchoq alomatlari ko‘zga tashlanyapti. Bunga misol sifatida Ivan Oblyakovni ham ko‘rsatish mumkin."
Yevgeniy Aldonin, SSKAning sobiq futbolchisi va mutaxassisi:
"Ko‘pchilik Marko Nikolichning romb sxemasi Abbosbek Fayzullayevga mos kelmay qoldi, deyapti. Men bu fikrga qo‘shilmayman. Chunki romb – bu juda o‘zgaruvchan va moslashuvchan taktika. O‘yinlar davomida jamoaning taktik sxemasi o‘zgarishi tabiiy holat.
Fayzullayevning bugungi holati uning o‘sishi va rivojlanishiga turtki bo‘ladi, deb hisoblayman. Abbos – maqsad sari intiladigan futbolchi. U o‘zining yuqori darajasini namoyon qilib bo‘lgan va murabbiy ishonchini qaytarib olish uchun yana o‘zini ko‘rsatishi lozim. Jamoaning yetakchisi sifatida maydondagi o‘yini orqali o‘z mavqeini mustahkamlashi kerak."
Aleksandr Grishin, SSKAning sobiq futbolchisi va tahlilchi:
"Agar futbolchi yaxshi natija ko‘rsatsa, darhol uning top klublardan takliflari borligi haqida gapirila boshlanadi. Ammo Abbosbek Fayzullayev haqidagi gap-so‘zlarning qanchalik haqiqatligini hali bilmaymiz. Hozircha bular faqat mish-mishlar.
Aslida bu masalani transfer amalga oshganidan keyin muhokama qilsak arziydi. Fayzullayev o‘zining ilgarigi yorqin o‘yinlarini qayta namoyon qilishi kerak. Hozirgi holati esa uning Yevropaga ketishiga yaqinlashtirmaydi, aksincha, klubda o‘ziga bo‘lgan ishonchni qaytarishi talab etiladi."
Eslatib o‘tamiz, Abbosbek Fayzullayev 2023 yilning avgust oyida SSKA tarkibiga qo‘shilganidan beri Rossiya chempionati va kubok musobaqalarida jami 65 ta uchrashuvda qatnashib, 8 ta gol va 21 ta golli uzatmani amalga oshirgan.
Shuningdek, 21 yoshli futbolchi O‘zbekiston milliy terma jamoasi safida 25 marta maydonga tushib, raqiblari darvozasini 8 marotaba ishg‘ol qilgan. Hozirda Transfermarkt portali uning transfer qiymatini 8 million yevro miqdorida baholagan. Abbosbekning SSKA bilan shartnomasi 2026 yilning yoziga qadar amal qiladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
