«Арсенал»нинг шундоққина «Тоттенхэм»нинг тумшуғи остидан Эберечи Эзени харид қилиш йўлидаги муваффақиятли уриниши ижтимоий тармоқларда шиддатли шов-шувларга сабаб бўлди. Бироқ бу дастлабки ҳодиса эмас. Мазкур клублар шунга ўхшаш маккорона ҳийлаларга аввал ҳам дуч келишган. Келинг, яхшиси энг қизиқарли воқеаларни эсга олайлик.
Эммануэль Пети «Арсенал»га
1997 йилнинг ёзида Эммануэль Пети «Арсенал» таркибига қўшилганида, Фабрицио Романо Неаполдаги яслини тарк этиш арафасида эди. 2018 йилда франциялик афсона Daily Mirror мухбирига берган интервьюсида шундай деганди: «Тоттенхэм» менга контракт таклиф этганида, ўйлаб кўриш учун икки кун муҳлат сўрагандим. Лекин улар кейин юз берган воқеани кутмагандилар. Лондонга етиб келгач, меҳмонхонага боришим учун «шпорлар» такси ҳаққини тўлашди. Мен эса Арсен Венгернинг уйига йўл олгандим. Энди бу ўтмиш тарихи».
Михаил Мудрик «Челси»га
Яқинда Мудрикни топ-футболчиларга қиёслашган ва Европадаги келажаги порлоқ қанот ҳужумчиларидан бири дейишганди. Украиналик футболчининг номи 2022|2023 йиллар мавсумининг биринчи ярмида ҳар куни трансферларга оид гап-сўзларда зикр этилганди. Михаил ўзининг «Арсенал»га муҳаббатини ижтимоий тармоқларда ошкор этган, «тўпчилар» уни қишки трансфер дарчасида харид қилишга тайёрдек эдилар. Бироқ тўсатдан «Челси» янада манфаатлироқ таклиф билан пайдо бўлиб қолди.
«Шахтёр»нинг бош директори Сергей Палкин бу борада шундай деганди: «Тўловлар муддати, бонуслар тури ҳар хил. Ҳа, бонуслар ҳақида истаганча гапириш мумкин, лекин улар амалий бўлиши шарт. Бу масалада «Челси» нисбатан жиддийроқ ва адолатлироқ бўлди. Мудрикнинг «Стэмфорд Бриж»даги ишларини инобатга олганда, бу ҳодисани ўзи учун омадли ҳисоблаши мумкин».
Жон Оби Микел «Челси»га
Яна «Челси». Бу воқеа «кўклар»нинг кейинги йиллардаги олди-сотдилари учун эталон мақомини олди. Микел ўсмирлик чоғида «МЮ» билан шартнома имзолаганди. Бироқ «Челси» аралашиб қолди. Мазкур ҳодиса жирканч судлашувга айланиб кетиши ҳам мумкин эди. Лекин сэр Алекс Фергюсон бу ишга аралашишдан воз кечиб, Микелнинг танловини қабул қилганди.
Мойзес Кайседо «Челси»га
Молиявий нуқтаи-назардан олганда, энг йирик илинтириш. 2023 йилда эквадорлик ярим ҳимоячини ўз сафига қўшиб олиш учун 100 млн. фунт стерлингдан кўпроқ бўлган ўз тарихидаги рекорд трансферни таклиф этганди. «Қизиллар»нинг саъй-ҳаракатлари «Челси»ни таклифлар қийматини тенглаштириб, келишувни расмийлаштиришга мажбур этганди. Якунда танлов Кайседода тўхтади. Мойзес ўтган мавсумни аъло даражада ўтказди.
Sky Sportга берган интервьюсида футболчи шундай деганди: «Челси» билан узоқ вақт музокара олиб бордим. Рад этишнинг иложи бўлмади, чунки улар мени қўллаб-қувватлашарди. «Брайтон»ни тарк этиш қийин бўлгани учун ёзда жуда қийналдим. Сўнгги паллада «Ливерпул»дан қўнғироқ бўлди. Бироқ мен «Челси»га розилик бергандим».
Рой Кин «МЮ»га
Воқеани баён этиш навбатини Киннинг ўзига берамиз. У жуда ажойиб. Рой бор ҳақиқатни Overlap Live эфирида сэр Кенни Далглиш билан ҳамкорликда ошкор этганди: «Битта ёки иккита вариант туфайли омадим келди. Мен «Блэкберн» вакиллари қўлларини қисиб, шундай дедим: «Эшитинглар, мен жамоангизга ўтаман. Контракт маъқулланган, деб ўйлайман. Ирландияга қайтганимда, «Юнайтед»дан қўнғироқ қилишди. «Блэкберн» билан шартнома имзолайман, деганимда, хатога йўл қўйгандим. Албатта, «Юнайтед»га ўтганимга афсусланмайман. Кенни Далглишни ҳамма ажойиб йигит дейди. У менга қўнғироқ қилди. Табиийки, у Блэкбернга бормаслигимдан хабардор эди: «қулоқ сол, мен норозиман, ахир биз қўл олишган эдикку». Мен жавоб қайтардим: «Мени кечир, Кенни...биласанми, эртага дам олишга кетяпман. Узр, вақтим зиқ». Мен Айя-Напага жўнамоқчи эдим. Онт ичаман, у менга шундай деганди: «Сени ўша ерда топиб оламан». Очиғини айтганда, Айя-Нападаги икки ҳафта давомида барча барларни тинтиб чиқдим. У мени топиб олишига ишонгандим!»
Пол Гаскойн «Тоттенхэм»га
Бу воқеани ҳамма билади. «МЮ» ўз сафига «Ньюкасл»даги навқирон Газзани қўшиб олдим, деб ўйлаганди. Лекин «Тоттенхэм» «қизил иблислар»ни ортда қолдириб, Полнинг ота-онасига уй, опасига солярий олиб беришни ваъда қилганди.
«Бассейн ёнида ётганимда, қўрғироққа жавоб қайтаришим учун телефон беришди. Раис Мартин Эдвардснинг айтишича, «Тоттенхэм» Пол билан шартнома имзолаб, унинг ота-онасига Лондоннинг шимоли-шарқидан уй совға қилганини айтди», - деганди Фергюсон марҳум журналист Дэвид Фростга берган интервьюсида.
Виллиан «Челси»га
Бир пайтлар «Ливерпуль» савияси пасайиб кетган «Анжи»нинг бразилиялик вингерига даъвогар бўлганини ҳозир кўпчилик унутиб юборган. Лекин айнан «Тоттенхэм» 2013 йилнинг ёзида Виллиан билан келишувга эришишга муваффақ бўлганди. Бироқ футболчининг «Уайт Харт Лейн»га ўтиши ОАВда эълон қилинган паллада, саҳнада «Челси» пайдо бўлди.
Рестлинг услубидаги ринг ва мусиқа оҳанги жўрлигида саҳнага чиқиб келаётган Роман Абрамовични тасаввур қилинг. Виллианга шунчалик кучли молиявий усулни қўллашдики, у яшин тезлигида «Стэмфорд Бриж»га бориб қолганди. Энди бу рўйхатдан Эберечи Эзе жой олади. Қизиқ, «Арсенал»да уни нималар кутмоқда?
Содиқ СОБИР тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
