«Arsenal»ning shundoqqina «Tottenxem»ning tumshug‘i ostidan Eberechi Ezeni xarid qilish yo‘lidagi muvaffaqiyatli urinishi ijtimoiy tarmoqlarda shiddatli shov-shuvlarga sabab bo‘ldi. Biroq bu dastlabki hodisa emas. Mazkur klublar shunga o‘xshash makkorona hiylalarga avval ham duch kelishgan. Keling, yaxshisi eng qiziqarli voqealarni esga olaylik.
Emmanuel Peti «Arsenal»ga
1997 yilning yozida Emmanuel Peti «Arsenal» tarkibiga qo‘shilganida, Fabrisio Romano Neapoldagi yaslini tark etish arafasida edi. 2018 yilda fransiyalik afsona Daily Mirror muxbiriga bergan intervyusida shunday degandi: «Tottenxem» menga kontrakt taklif etganida, o‘ylab ko‘rish uchun ikki kun muhlat so‘ragandim. Lekin ular keyin yuz bergan voqeani kutmagandilar. Londonga yetib kelgach, mehmonxonaga borishim uchun «shporlar» taksi haqqini to‘lashdi. Men esa Arsen Vengerning uyiga yo‘l olgandim. Endi bu o‘tmish tarixi».
Mixail Mudrik «Chelsi»ga
Yaqinda Mudrikni top-futbolchilarga qiyoslashgan va Yevropadagi kelajagi porloq qanot hujumchilaridan biri deyishgandi. Ukrainalik futbolchining nomi 2022|2023 yillar mavsumining birinchi yarmida har kuni transferlarga oid gap-so‘zlarda zikr etilgandi. Mixail o‘zining «Arsenal»ga muhabbatini ijtimoiy tarmoqlarda oshkor etgan, «to‘pchilar» uni qishki transfer darchasida xarid qilishga tayyordek edilar. Biroq to‘satdan «Chelsi» yanada manfaatliroq taklif bilan paydo bo‘lib qoldi.
«Shaxtyor»ning bosh direktori Sergey Palkin bu borada shunday degandi: «To‘lovlar muddati, bonuslar turi har xil. Ha, bonuslar haqida istagancha gapirish mumkin, lekin ular amaliy bo‘lishi shart. Bu masalada «Chelsi» nisbatan jiddiyroq va adolatliroq bo‘ldi. Mudrikning «Stemford Brij»dagi ishlarini inobatga olganda, bu hodisani o‘zi uchun omadli hisoblashi mumkin».
Jon Obi Mikel «Chelsi»ga
Yana «Chelsi». Bu voqea «ko‘klar»ning keyingi yillardagi oldi-sotdilari uchun etalon maqomini oldi. Mikel o‘smirlik chog‘ida «MYU» bilan shartnoma imzolagandi. Biroq «Chelsi» aralashib qoldi. Mazkur hodisa jirkanch sudlashuvga aylanib ketishi ham mumkin edi. Lekin ser Aleks Fergyuson bu ishga aralashishdan voz kechib, Mikelning tanlovini qabul qilgandi.
Moyzes Kaysedo «Chelsi»ga
Moliyaviy nuqtai-nazardan olganda, eng yirik ilintirish. 2023 yilda ekvadorlik yarim himoyachini o‘z safiga qo‘shib olish uchun 100 mln. funt sterlingdan ko‘proq bo‘lgan o‘z tarixidagi rekord transferni taklif etgandi. «Qizillar»ning sa’y-harakatlari «Chelsi»ni takliflar qiymatini tenglashtirib, kelishuvni rasmiylashtirishga majbur etgandi. Yakunda tanlov Kaysedoda to‘xtadi. Moyzes o‘tgan mavsumni a’lo darajada o‘tkazdi.
Sky Sportga bergan intervyusida futbolchi shunday degandi: «Chelsi» bilan uzoq vaqt muzokara olib bordim. Rad etishning iloji bo‘lmadi, chunki ular meni qo‘llab-quvvatlashardi. «Brayton»ni tark etish qiyin bo‘lgani uchun yozda juda qiynaldim. So‘nggi pallada «Liverpul»dan qo‘ng‘iroq bo‘ldi. Biroq men «Chelsi»ga rozilik bergandim».
Roy Kin «MYU»ga
Voqeani bayon etish navbatini Kinning o‘ziga beramiz. U juda ajoyib. Roy bor haqiqatni Overlap Live efirida ser Kenni Dalglish bilan hamkorlikda oshkor etgandi: «Bitta yoki ikkita variant tufayli omadim keldi. Men «Blekbern» vakillari qo‘llarini qisib, shunday dedim: «Eshitinglar, men jamoangizga o‘taman. Kontrakt ma’qullangan, deb o‘ylayman. Irlandiyaga qaytganimda, «Yunayted»dan qo‘ng‘iroq qilishdi. «Blekbern» bilan shartnoma imzolayman, deganimda, xatoga yo‘l qo‘ygandim. Albatta, «Yunayted»ga o‘tganimga afsuslanmayman. Kenni Dalglishni hamma ajoyib yigit deydi. U menga qo‘ng‘iroq qildi. Tabiiyki, u Blekbernga bormasligimdan xabardor edi: «quloq sol, men noroziman, axir biz qo‘l olishgan edikku». Men javob qaytardim: «Meni kechir, Kenni...bilasanmi, ertaga dam olishga ketyapman. Uzr, vaqtim ziq». Men Ayya-Napaga jo‘namoqchi edim. Ont ichaman, u menga shunday degandi: «Seni o‘sha yerda topib olaman». Ochig‘ini aytganda, Ayya-Napadagi ikki hafta davomida barcha barlarni tintib chiqdim. U meni topib olishiga ishongandim!»
Pol Gaskoyn «Tottenxem»ga
Bu voqeani hamma biladi. «MYU» o‘z safiga «Nyukasl»dagi navqiron Gazzani qo‘shib oldim, deb o‘ylagandi. Lekin «Tottenxem» «qizil iblislar»ni ortda qoldirib, Polning ota-onasiga uy, opasiga solyariy olib berishni va’da qilgandi.
«Basseyn yonida yotganimda, qo‘rg‘iroqqa javob qaytarishim uchun telefon berishdi. Rais Martin Edvardsning aytishicha, «Tottenxem» Pol bilan shartnoma imzolab, uning ota-onasiga Londonning shimoli-sharqidan uy sovg‘a qilganini aytdi», - degandi Fergyuson marhum jurnalist Devid Frostga bergan intervyusida.
Villian «Chelsi»ga
Bir paytlar «Liverpul» saviyasi pasayib ketgan «Anji»ning braziliyalik vingeriga da’vogar bo‘lganini hozir ko‘pchilik unutib yuborgan. Lekin aynan «Tottenxem» 2013 yilning yozida Villian bilan kelishuvga erishishga muvaffaq bo‘lgandi. Biroq futbolchining «Uayt Xart Leyn»ga o‘tishi OAVda e’lon qilingan pallada, sahnada «Chelsi» paydo bo‘ldi.
Restling uslubidagi ring va musiqa ohangi jo‘rligida sahnaga chiqib kelayotgan Roman Abramovichni tasavvur qiling. Villianga shunchalik kuchli moliyaviy usulni qo‘llashdiki, u yashin tezligida «Stemford Brij»ga borib qolgandi. Endi bu ro‘yxatdan Eberechi Eze joy oladi. Qiziq, «Arsenal»da uni nimalar kutmoqda?
Sodiq SOBIR tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
