2006 йилги жаҳон чемпиони, октябрь ойида Ўзбекистон терма жамоаси бош мураббийи этиб тайинланган Каннаваро "Tuttosport" нашрига берган батафсил интервьюсида ўз мураббийлик истиқболлари ва ёз фаслидаги мақсадлари ҳақида гапирди.
Июнь ойида Лучано Спаллетти ишдан олингач, Италия терма жамоаси бош мураббийи лавозимига номзодлар орасида Каннаваро ҳам тилга олинган эди. Охир-оқибат бу вазифа унинг собиқ жамоадоши Женнаро Гаттузога насиб этди. Гаттузо март ойида бўлиб ўтадиган ЖЧ плей-офф ўйинларида «скуадро адзурри»ни майдонга бошлаб чиқади.
Каннаваро Италия, Польша ва Ўзбекистон ҳақида: «Кутишдан чарчадим»
Каннаваро Tuttosport'га Италия терма жамоаси бўйича музокаралар бўлганини, аммо ўзини ҳақиқий номзод сифатида ҳис қилмаганини айтди.
«Ростини айтаман. Буффон билан гаплашганман, лекин амалда мен номзод сифатида кўрилмаганман, — деди Каннаваро. — Футболчи сифатида ўтмишим жуда ажойиб бўлган, аммо эҳтимол, мени кўпроқ плакатдаги қаҳрамон сифатида кўришгандир. Мураббийликдан воз кечмайман, ишимни давом эттираман. Гаттузонинг танловларини қўллаб-қувватлайман, у жуда кўп ўрганадиган инсон».
Шунингдек, Каннаваро Италиядаги вазиятдан кейин Польша терма жамоасини бошқариш имконияти бўлганини, аммо у бу таклифни рад этганини ҳам маълум қилди.
«Ҳа, мен бир қадам қолганда “йўқ” дедим. Ўзимни тайёр ҳис қилмадим ва бу хато бўлди, Хитойдан қайтганимдан кейинги энг катта хатом. Балки Италияни кутиб, рад этгандирман. Бу менинг ғоям эди, аммо ҳеч нарса бўлмади ва охири кутишдан чарчадим».
Шу билан бирга, Ўзбекистон терма жамоаси бош мураббийи сифатида Каннаваро жаҳон чемпионатига йўлланмани кафолатлаган, буни эса Гаттузо ва Италия ҳали уддаламаган.
«Ўша Германиядаги ғалабадан 20 йил ўтиб, яна жаҳон чемпионатига қайтаман, — деди у. — Америкада бўладиган мусобақада иштирок этувчи барча мураббийлар билан учрашувда бўлиш жуда ажойиб ҳис эди».
Ўзбекистонда илк учрашув қандай ўтди?
«Улар мени биринчи марта кўрганида ҳайратда қолишди. Мен уларни тушундим ва вазиятни енгиллаштириб, музни эритдим. Нима учун саралаб олишдан ўтишганини биламан. Улар жуда чидамли терма жамоа, ўзбеклар эса иродали халқ.
Менда вақт жуда кам, тезкор ечимлар топишим керак. Кўп ўйинларни кўрдим, мамлакат бўйлаб саёҳат қилдим. Энди чемпионат тугади ва биз ўзбек футболчилари иштирок этаётган бошқа лигаларни кузатамиз. Уларни ҳар ҳафта қўнғироқ қилиб ҳолидан хабар оламан, айниқса, итальян тилини анча яхши биладиган Шомуродов билан. У ҳозир Туркияда, «Истанбул Башакшеҳир»да ўйнаяпти».
Жаҳон чемпионати гуруҳ босқичида Ўзбекистон Колумбия, Португалия ва эҳтимол, ДР Конго билан баҳс олиб боради.
Бу «осон юриш эмас» деган фикрга Каннаваро шундай жавоб берди:
«Йўқ, албатта осон эмас, лекин ўша ўйинларга тайёр ҳолда етиб борамиз. Аввало Колумбияга қарши ўйнаймиз. Дўстим Асприлья аллақачон қўнғироқ қилдим, у менга баъзи маслаҳатлар берди».
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сурхон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
