O‘z hayotining katta qismini futbolga bag‘ishlagan, uni sevgan, bu orqali esa qahramonga aylangan nomlar tarixda ko‘plab uchraydi. Zamonamizda ham bunday futbolchilar bisyordir. Shulardan bir – Edin Jeko. Mahsuldor bosniyalik hujumchi hali-hamon «Inter» bilan o‘z sarguzashtlarini davom ettirmoqda. Yigirma yildan buyon professional ravishda futbol bilan shug‘ullanuvchi o‘yinchi, qayerda bo‘lmasin, gollar urishdan charchamaydi. Uning klub miqyosida kiritgan gollari soni ayni kunda 306 tani tashkil etmoqda. Quyida Jeko faoliyatiga nazar tashlaymiz.
Bundesliga sensasiyasi
![](https://stadion.uz/images/news/dz_wolf.jpg)
Jeko o‘z hujumchi sherigi Grafite bilan bundan ancha yillar oldin «Volfsburg» tarkibida Bundesligani yondirgan. Shu sababdan bu juftlik hali ham «Wolfsburg Arena»da hurmat bilan eslanadi. Jeko 2008-2009 yilgi mavsumni 26 ta gol hamda 10 ta assist bilan yakunlaydi. Mavsumdagi hammasini hisoblaganda esa u «bo‘rilar» uchun 36 ta gol urishga erishgan. O‘sha paytda Edin Jeko 22 yosh edi. Shunga qaramay, futbolchi o‘z jamoasini Germaniya chempioniga aylantiradi. «Volfsburg»ning birinchi va oxirgi chempionligi aynan Jeko bilan qo‘lga kiritilgan edi.
Mavsum statistikasi:
42 ta uchrashuv;
36 ta gol;
12 assist;
Bundesliga tituli.
«Shaharliklar» bilan muvaffaqiyat
![](https://stadion.uz/images/news/dz_siti.jpg)
Edin 2011 yilda 37 million yevro evaziga APLga, «Manchester Siti»ga yo‘l oladi. U o‘sha yerda ham o‘zini eng yaxshi hislatlarini namoyish etadi. Hujumchi jami 189 ta bahsda maydonga tushirilib, 72 ta gol urishga erishgan. Eng asosiysi esa 2011-12 yilgi mavsumning so‘nggi turida ro‘y bergan edi. O‘shanda «shaharliklar»ga chempion bo‘lish uchun bitta g‘alaba zarur edi. Jeko esa «QPR»ga qarshi bahsda qo‘shib berilgan daqiqada gol urib, jamoasi g‘alabasini, bu orqali esa chempionlikni ta’minlaydi. Qanday hayajonli lahzalar-a!
APL statistikasi:
2 ta APL tituli
130 ta o‘yin
50 ta gol
11 ta assist
«Roma»ning yuragi
![](https://stadion.uz/images/news/dz_rome.jpg)
Jeko dahosi o‘z davrining eng yaxshi hujumchilaridan biri bo‘lgani bilan xarakterlanadi. U «Roma» safida kuchli beshlik chempionatlarining uchtasida 50 tadan ko‘p gol urgan ilk futbolchiga aylangan edi. Hujumchi poytaxt jamoasida hammasi bo‘lib 119 ta gol urishni uddalaydi. Bu borada «Roma» afsonalari Franchesko Totti (307) hamda Roberto Prusso (138) undan ko‘proq gol ura olgan, xolos.
Barhayot Edin
![](https://stadion.uz/images/news/dz_inter.jpg)
Ayni damda 35 yoshda bo‘lgan faxriy hujumchi «Liverpul»ga qarshi o‘yinda ham maydonga tushirilgan edi. Ushbu bahs u uchun turnirdagi oltmish ikkinchisi bo‘ldi. Edin Jeko hozirga qadar YECHLda 25 ta gol urishga erishgan. «Volfsburg», «Manchester Siti» hamda «Roma» safida turli xil ko‘rinish bergan Jeko, ayni damga kelib, Italiya chempionlari safida harakat qilmoqda. «Inter»ga bu mavsumda tajribali futbolchi juda ham zarur bo‘lib turgandi. Buni bilgan Edin Jeko ularga yordamga keldi. Endilikda, «Inter» bolqon o‘g‘lonining boy tajribasiga suyanib ish ko‘rmoqda. U Simone Inzagining jamoasida muhim rol bajaradi. Joriy mavsumda Jeko hisobida 33 ta o‘yindan keyin 14 ta gol mavjud.
Yutuqlar
![](https://stadion.uz/images/news/dz_bos.jpg)
Angliya kubogi, liga kubogi hamda ikki bor mamlakat chempionligi – Edin Jekoning tumanli albionni allaqachon zabt etganini anglatadi. U Germaniyada ham chempionlikka erishgan (2009). Shuningdek, 35 yoshli futbolchida bu mavsumda qo‘lga kiritilgan Italiya superkubogi ham mavjud. Ayni damda esa, Jeko o‘z jamoasi bilan 2022 yilgi Italiya chempionligiga intilmoqda.
Bosniya va Gersegovina termasining uzoq yillik sardori, o‘z yurti bayrog‘i ostida 118 marta maydonga tushgan va 60 ta gol urgan. Bu esa Bosniya futboli tarixidagi mutlaq rekord natijadir. Xulosa qilib aytganda, Edin Jeko zamonaviy futbolda o‘rnak olsa arziydigan figuralardan biri sanaladi...
Jaloliddin ISMATOV tarjimasi