Италияда барча жабҳаларни эгаллаб олган ёки ўз таъсири доирасида ушлаб тураётган мафия футболда ҳам ўз одамларига эга. Ҳарқалай, мен шундай деб ўйлайман. Бир неча йил олдин Италиянинг энг номдор клубига қарши бошланган ва ҳалигача давом этаётган яширин уруш ҳам шундан. Бошқа клубларга ҳеч йўл бермай, кетма-кет совринларни ютиб келаётган байроқдор клубни йўқ қилиш мақсадида сунъий вужудга келтирилган "Кальчополи" ҳам, алалоқибат янада кучлироқ бўлиб қайтган жамоани яна синдириш учун ўйлаб топилган ва бош мураббий Антонио Контенинг узоқ муддат дисквалификациясига олиб келган янги "Кальчоскоммессе" ҳам бошида мисли тўфон сингари мутлоқ осойишта, узоқдан бошланган, лекин пухта ўйланган аниқ режа бўйича амалга оширилган эди. Мен ҳозир ўтиб кетган бу мудҳиш воқеалар ҳақида, кўп вақт талаб қилиши туфайли, батафсил тўхталиб ўтмоқчи эмасман. Бироқ келажакда шу мавзуда батафсил ёзиш нияти йўқ эмас, чунки, Ўзбекистондаги футбол шайдоларининг кўпчилиги бу борада чуқур билим билан мақтана олишмайди ва шу сабаб кимдир қачондир буни очиб бериши кераклигини ҳис қиламан. Ҳозирги мақола ана шу ишларнинг давоми бўлиши мумкин бўлган, айни дамда бўлиб ўтаётган, лекин ҳозирча юзага чиқмаётган жараён ҳақида.
"Юве" ўтган йили ўзининг ўттизинчи скудеттосини қўлга киритгач, либослардаги юлдузлар сони ҳақида катта мунозаралар бошланиб кетди. Бир вақтлар клуб президенти саъй-ҳаракати ўлароқ йўлга қўйилган ҳар ўнта чепмпионликни либосдаги бир юлдуз билан белгилаш тизими бўйича олиб қаралганда, туринликларда ҳозир учта юлдуз бўлиши керак эди. Аммо, федерация раҳбари Абете ва "Интер" хўжайини Моратти қистовлари билан Аньелли муроса йўлини танлашга мажбур бўлди. Сих ҳам, кабоб ҳам куймасин учун эса жуда ўзига хос, антиқа ва шу билан бирга чуқур маънога эга тадбирни амалга оширди. Яъни, либосда баъзи корчалонлар истови инобатга олиниб, учта у ёқда турсин, битта ҳам юлдуз қолдирилмади. Лекин ўрнига, бир қараганда, ҳеч нима йўқдай, синчковлик билан қараганда эса, скоч ёпиштирилган бўлиб чиқди. Бу билан "баъзи бировлар" клуб оғзини юммоқчи бўлаётганига шаъма қилинган. Шунингдек, логотип пастида "30 sul campo" (майдонда - 30) деган ёзув жойлаштирилган. Ишқибозлар учун сотувга чиқарилган либосларда эса, учта юлдуз ўз жойида турибди.
Буни ўзига қаратилган қарши зарба, деб қабул қилган "корчалонлар" жавоб бериш ҳақида кўп ўйлаган бўлишса керак. Чунки, бундан олдинги амаллардан шу нарса маълум бўлган эдики, ҳар қанча синдиришга уринишмасин, бу ноҳақликларни кўриб турган халқнинг клубга бўлган меҳри баттар кўтарилиб кетаверарди. Янги "ўйин"да шу жиҳатни инобатга олиш керак эди ва шундай қилинди ҳам. Бу галги ўйин қоидаси бўйича, оммада "Юве"га нисбаттан нафрат ҳисини пайдо қилдириш керак эди ва бу йўлга энди ҳакамлар сафарбар этилмоқда. Бунинг учун, эътибор бераётган бўлсангиз, қора либос эгалари гўёки "Юве" фойдасига атайин хато қилаётгандек қилиб кўрсатилишяпти ва бу ишга алоқаси бўлиши мумкин бўлган казолар ўзини ақлбоварқилмас даражада бетараф, хотиржаъм тутишмоқда. Айнан мана шулар асл тиффозида навбатдаги катта бир уруш яқинлашаётгани ҳақида фикр-мулоҳазаларга олиб келяпти. Ишқилиб, ҳаммаси яхшилик билан тугасин.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
