Хабарингиз бор, бундан бир неча кун олдин бутун футбол мухлислари буюк футбол афсоналаридан бири бўлган «Бавария» ҳужумчиси Герд Мюллердан айрилиб қолди. Унинг мақтана оладиган хусусиятлари бисёр: «Олтин тўп» соҳиби, Жаҳон чемпиони ва 18 йил давомида бошқалар орзу қилмаган даражадаги совринларни ютган ва кўплаб рекордларни янгилашга муваффақ бўлган шахс сифатида қадрли.
Stadion.uz қуйида Герд Мюллер билан боғлиқ бир қатор диққатга сазовор ҳолатларга қисқача тўхталади.
Олтин тўп
Етмишинчи йилларнинг дастлабки пайтлари «Бавария»нинг жаҳон бўйича тўлиқ гегемонлигида ўтди. Герд Мюллер эса ўша пайтлар жамоасининг ҳақиқий раҳнамоси бўлган. У 69/70 ва 70/71 йилги мавсумларда жами 81 та гол урди, Мексикада бўлиб ўтган жаҳон чемпионатида эса ўз ҳисобига нақ 10 та (!) гол ёздириб қўйди. Натижада у 1970 йили «Олтин тўп»ни қўлга киритади.
«Миллат тўпурари» бу йўлда Бобби Мур ва италиялик Луиджи Рива билан кураш олиб борди. Шундай қилиб, Мюллер ушбу совринни қўлга киритган биринчи немис футболчисига айланди. 1972 йили у бу рўйхатга яна бир бор номзод сифатида кўрсатилди, бироқ «Олтин тўп» бу сафар Франс Беккенбауэрга насиб этди.
Бундеслига рекорди
1971/72 йилги мавсумда Мюллерни тўхтатиб қолишнинг иложи бўлмади. Ушбу мавсумда Герд росмана голлар машинасига айланиб кетди ва унинг ёрдами билан «Бавария» мамлакат чемпионлигини қўлга киритди. Умуман олганда, мюнхенликлар ўша мавсум давомида 101 та гол уришганди ва уларнинг 40 таси бевосита Мюллерга тегишли бўлди. Бу эса бир мавсум давомида ички чемпионат доирасида урилган энг кўп голли серия дегани. Роберт Левандовскининг якунига етган мавсумда ушбу натижани янгиламагунига қадар юқоридаги рекордга ҳеч ким яқинлаша олмади.
1972 евро финалида дубл
1972 йилги Европа чемпионати Германия учун муҳим воқелик сифатида қайд этилди. Гап немисларнинг ғолиб бўлганлигида ҳам эмас аслида. Энди бутун футбол аҳли мана шу кундан бошлаб Германия билан ҳисоблашишни бошлади, уларга росмана кучли жамоа сифатида қарай бошлади. Ўз навбатида Герд Мюллернинг ҳам ҳаётида янги саҳифа очилди. Бу турнирдан сўнг у катта сиймога айланди, ўз номини бутун оммага ёйди. Евро-72 ярим финалида мезбон Бельгияга қарши иккита гол урди. Брюсселдаги финалда эса СССР билан баҳсга жиддий киришган Герд яна ўша ишини такрорлади ва дубл муаллифига айланди.
Натижада Мюллер 1954 йилдан бери биринчи марта мамлакатига йирик совринни тақдим этди. Шундан сўнг, ҳамма бу жамоадан қўрқиш кераклигини ҳис қила бошлади.
Афсонавий йил
1972 йили Мюллер ақлбовар қилмас рекордни қайд этди. Голлар уриш фишкасига айланган бу йигит бир календарь йили давомида жами 85 та гол уришни уддалади. Фақат 2012 йилдагина Лео Месси бу кўрсаткични тамомила янгилаб, 91тага ошириб қўйган.
Жаҳон чемпионати
Мюллер Бундеслига ва Европа чемпионлиги совринларини қўлга киритгач энди унинг биргина орзуси қолар эди - Жаҳон чемпионати. 1974 йилги мундиал эса бунинг учун ягона имконият эди. Айниқса, немисларнинг ушбу турнирдаги мезбонлик мақоми ва бундан аввалги катта турнирни ютганликларини ҳисобга олсак, мухлислар Германиядан катта натижаларни кутишган эди.
Аммо Мюллер жамоадошлари учун барчаси омадсиз тарзда бошланди. Шарқий Германия билан бир гуруҳда тушиб қолган ГФР ўзаро ўйинда ҳам азалий рақибларига имкониятни бой беради. Бироқ плей-оффларда ўзига келган немислар секин аста мухлислар ишончини оқлай бошлайди. Бунда албатта Мюллернинг ҳиссаси катта. Ниҳоят финалга қадар етиб келган Германия бу баҳсда Голландияни таслим этишни уддалади. Die Mannschaft сафидаги голларга Бретнер ва Мюллерлар муаллифлик қилишди. Герд жамоасига ғалаба келтирувчи голни тақдим этди. Шундай қилиб, унинг мамлакати иккинчи бор Жаҳон чемпиони унвонига сазовор бўлди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
