«Насаф» вакили Шерзод Насруллаев ҳужумга қўшилишни хуш кўрувчи ва бу ишни яхши уддалайдиган истеъдодли ҳимоячиларимиздан. 2021 йил унинг учун анча самарали келди: «аж-дарлар» сафида ОФК кубогида муваффақиятли тўп сурди ва якунда Ўзбекистон кубоги соҳибига айланди. Янги йил ҳам Насруллаев учун хушхабар билан бошланди - футболчи Сречко Катанец бошқарувидаги Ўзбекистон миллий жамоаси йиғинига жалб этилди. Махсус мухбиримиз шу баҳона БАА сафари олдидан Шерзодни алоҳида суҳбатга чорлади.
- Шерзод, аввало, Ўзбекистон миллий жамоаси таркибига киритилганингиз билан табриклаймиз.
- Раҳмат. Тушунарлики, ватан жамоаси либосида майдонга тушиш ҳар бир футболчининг асосий орзуси саналади. Албатта, йиғинда бор маҳоратимни ишга солиб, ишончни оқлашга ҳаракат қиламан. Хуллас, кайфият яхши, буёғига машғулотлар ва ўйинларда терма жамоа сафида ўйнашга муносиб эканлигимни исботлашим керак. Афсуски, 21 январь кунига белгиланган Япония термасига қарши ўртоқлик ўйини пандемия туфайли бекор қилинди. Лекин БААда 2та ўйин ўтказиш режалаштирилган. Демак, уларга астойдил тайёргарлик кўрамиз.
- Миллий жамоада сизни собиқ клубдошингиз Фаррух Сайфиев билан рақобат кутаётгани тайин. Бундан чўчи-майсизми?
- Соғлом рақобат ҳар бир футболчи учун - мотивация. Шундай экан, чўчишга асос йўқ. Муҳими, ҳозирга қадар айнан кучли рақобат ўлароқ, олдинга қадам ташлаяпман. Умуман, ким ўз устида кўпроқ ишласа, ўша кўзлаган маррасига етади.
- Хўш, айнан қайси амплуадошларингиз ўйинларидан сабоқ олишга мойилсиз?
- Кўпроқ Европа клублари ўйинларини кузатаман. Хусусан, «Ливерпуль» ҳимоячиси Робертсонга ҳавасим баланд. Унинг ҳужумга интилиши, тўпни жарима майдонига узатиб, кескинликни оширишига гап йўқ.
- Очиғи, Шерзод Насруллаев ўйинида ҳам ҳужумни қўллаб-қувватлаш хоҳиши яққол сезилиб туради.
- Чунки гол уриш ёки унга ҳаммуаллифлик қилиш истаги кучли. Ўтган мавсум Суперлигада «Сурхон», «Турон» ва «Машъал» дарвозасини нишонга олдим. ОФК кубоги турнирида эса «Хўжанд» (Тожикистон)га қарши кечган баҳсда ўзимни кўрсатдим. Асосийси, барча турнирларда кўплаб самарали узатмалар билан жамоам ютуқларига ҳисса қўшдим. Жумладан, кубок мусобақасида «Бунёдкор» ва «Пахтакор»га қарши кечган муҳим ўйинларда голга ассистентлик қилиш ёқимли бўлди.
- Тўп назоратига йўғрилган ҳаракатда қайси футболчи билан ўйинингиз яхшироқ қовушади.
- Ойбек Бозоров кейинги ҳаракатингизни тезда илғайди. Унинг чаққонлик, техник-тактик салоҳияти ҳар қандай футболчига қўшимча куч бағишлайди. Хуллас, Ойбек билан тандем сифатида ўйнаш анча завқли.
- 2021 йилги мавсум ғоят муросасиз кечди. Бироқ охирги турларда Қаршида «Локомотив»га имкониятни бой бердинглар ва «Насаф» якунда совринсиз қолди.
- Аслида ўша учрашувни яхши бошладик. Гарчи кубок ўйинидаги чарчоқ аломатлари яққол сезилган бўлсада, устунликка эришаётгандик. Бироқ Жўрабек Манноновнинг майдондан четлатилишидан сўнг бўшашдик. Охир-оқибат, қўйиб юборилган 2та гол соврин учун курашдаги имкониятимизни йўққа чиқарди...
- ОФК кубоги финалидаги мағлубиятни нима билан изоҳлайсиз?
- Рақибнинг тезкор голи ўйинга танланган тактик режамизни тамомила ўзгартириб юборди. Боз устига, у руҳиятимизга салбий таъсир кўрсатди. Асосийси, бундан тегишлича сабоқ олдик. Ўйлайманки, ушбу тажриба ёш жамоамизнинг халқаро даражадаги кейинги ўйинларида роса асқотади.
- Ўзбекистон кубогининг ҳар бир босқичида ўзига хос жанг кузатилди.
- Айниқса, сафарда АГМКга қарши кечган ярим финал баҳси эсда қолди: майдонда 10 киши бўлиб ўйнаш, пенальтидан фойдаланолмаслик, қўшимча бўлимлардаги голлар... «Пахтакор билан финал учрашувида ҳам шундай драма такрорланди.
- Мавсумда VAR тизимидан фойдаланилди. Бунинг самараси билиндими?
- Ҳа, тизим катта фойда берди. Хусусан, АГМК билан кубок ўйинида айнан VAR ёрдами билан адолатли қарорлар қабул қилинди. Бу тизим янги мавсумда ҳам жуда қўл келиши тайин, фақат тезкорлик оширилса, бас.
- 1998 йилнинг 23 июль куни Косон туманида туғилгансиз. Отангиз Инатулла Жуманазаров - нефть-газ саноати ходими, онангиз Шоҳиста опа - уй бекаси. Ўз ҳақингизда кенгроқ маълумот берсангиз.
- Оилада 3 фарзандмиз, икки опам бор. Косон шаҳридаги 5-мактабда таҳсил олганман. 2000 йилдан «Насаф» қошидаги махсус футбол мактабида Нурали Султонов ва Баҳодир Аннаматов қўл остида шуғулландим. Дебютим 2019 йили «Пахтакор»га қарши кечган ўйинга тўғри келди. 2020 йили 12та учрашувда қатнашдим. Якунланган мавсум эса чемпионат доирасида 22 марта майдонга тушдим.
- Ўйин жараёнида тез-тез ҳужумга қўшиласиз, бундай ҳолатда ҳимоянинг бўшаши панд беришидан чўчимайсизми?
- Ҳа, ҳимоячининг асосий вазифаси - орқа чизиқда бехато ўйнаш. Лекин замонавий футбол талаби шу - ҳимоячи орқада ишлаш баробарида ҳужумга қўшилиб туриши шарт. Ҳа, баъзан ортга қайтишга улгуролмаслигим ва бундан муаммо юзага келиши мумкин. Лекин фақат ортда ўйнаш билан ҳам иш битмайди-да...
- Яқинларингиз, маҳалла-куйдаги дўстларингиз сизга алоҳида мухлислик қи-лишса керак...
- Албатта. Хусусан, отам ўйинимизни имкон қадар Қаршидаги стадионда бевосита кузатишга ҳаракат қилади. Опаларим ва жиянларим эса ўйин куни телевизор қаршисига михланишади. Асосий мухлисим - онам. У учрашувларни ҳамиша катта ҳаяжон билан кузатади ва ўйиндан сўнг дарҳол қўнғироқ қилади: «Болам, қандайсан, ҳеч жойингга шикаст етмадими...?» Қўни-қўшни, маҳалладагилар ҳам менга бефарқ эмаслар, ҳар доим саволларга тутиб, омад тилашади.
- Жароҳат - футболчининг бош душмани. 2020 йили сиз ҳам бу душман жабрини синаб кўрдингиз...
- Эсимда, «Қўқон-1912» билан учрашувда 2:1 ҳисобида ғалаба қозондик, аммо жиддий жароҳатга йўлиқдим. Оқибатда нақ 2 ой майдонга тушолмадим. Шукрки, ҳаммаси ортда қолди, бу ҳам ўзига хос тажриба, барибир.
- Янги мавсум старти тобора яқинлашаверади. 26 февраль кунига Ўзбекистон суперкубоги учун ўйин белгиланган. Унда яна «Пахтакор» билан рўбарў келасизлар. Қолаверса, ОЧЛ саралаш босқичи ҳам бор.
- Бу йил мақсад жиддий. Мана, 5 январдан машғулотларга киришдик. Йигитларда кайфият ва иштиёқ баланд. Раҳбарият олдимизга қатъий вазифалар қўймоқда. Умуман, юксак ишонч бизни олға ундайверади.
- Эшитишимизча, 2022 йили шахсий ҳаётингизда ҳам катта ўзгариш бўлади.
- Насиб этса, эрта баҳорда уйланиш тараддудидаман. Хуллас, қўшалоқ орзу-мақсадлар билан янги йилдан қувончли дамлар кутаяпман. Ўз ўрнида газетангиз орқали барча юртдошларимизга омад тилайман. «Насаф»га нисбатан ҳурмат-эҳтиром учун ташаккур. 2022 йили ҳам «ИнтерФутбол» саҳифаларида янада ранг-баранг мақолалар кутиб қоламиз.
Ҳусан ТЕМИРОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
