Бeйл "Реал"га келиб катта ютуқларга эришди. Тўққиз йил давомида, ҳужумчи, ютиш мумкин бўлган совринларни барчасига эга чиқди. Уэльс терма жамоаси афсонаси бешта ЕЧЛ совринини қўлга киритган. Унинг 2018 йилги финалда "Ливерпуль" дарвозасига урган голи эсингизда бордир?
2013 йилда Бeйл "Тоттенхэм"дан сотиб олинади. Аммо у, ўша пайтдаги ягона харид эмасди. Бeйл билан бирга Анчелотти жамоаси яна тўртта ўйинчи харид қилади. Қуйида улар ҳақида билиб оласиз.
Дани Карвахал
Аслини олганда Карвахал "Реал"га бегона эмас. У клуб академиясида тарбия топган. Ёш футболчи Моуриньо даврида, 2012 йили "Байер Леверкузен"га 5 миллион евро эвазига сотилади. Аммо "Реал" ҳам анойи эмас. Сотишдан олдин раҳбарият ҳимоячи битимига қайта сотиб олиш шартини ҳам киритганди. Бир мавсумдан кейин Карвахал 6.5 миллион еврога қайтариб олиб келинган эди. Шундан бери ҳар қанча мураббий алмашмасин, Карвахалнинг "Реал" асосий таркибидаги ўрни сақланиб қолмоқда. Негаки, у ишончли вакилдир.
Каземиро
2012 йилда Каземиро "Сан-Паулу" клубини тарк этади. Орадан бир йил ўтиб эса "Реал" ярим ҳимоячини 6 миллион фунт эвазига сотиб олади. Бу қарор ўзини тўлиқ оқлайди. "Реал" Бразилия терма жамоаси аъзосидан қарийб 10 йил фойдаланди. Айниқса, Каземиро 2015 йилдан кейин ўз даражасини намойиш этиб, Тони Кроос ва Модрич билан ажойиб трио ҳосил қила олди. Футболчи "МЮ" томонидан катта сумма эвазига сотиб олинди ва "Реал" бундан 10 баробар фойда кўрди.
Асьер Ильярраменди
2010 йилларнинг биринчи ярмида "Реал" трансферлар сиёсатининг асосида ёш испан футболчиларини сотиб олиб, уларни соврин юта оладиган суперюлдузларга айлантиришдан иборат эди. Аммо бу режа кўнгилдагидек амалга ошмади. Бунинг тасдиғи ўлароқ, 2021 йилги қитъа чемпионатида "Реал"нинг бирорта испан футболчиси Испания терма жамоасига кира олмаганини келтириш мумкин. Омадсизлар қаторида Ильярраменди ҳам бор эди. У Бейл билан сотиб олинади. Ўша пайтда 23 ёш бўлган ярим ҳимоячи "Реал Сосьедад"дан 32.2 миллион еврога харид қилинган. Раҳбарият уни Хаби Алонсо ўрнини эгаллайди деб умид қилган. Аммо бундай бўлмади. Ильярраменди икки мавсумдан кейин яна "Реал Сосьедад"га қайиб кетишга мажбур бўлганди. Бу ёзда футболчи "Даллас" клубига йўл олди.
Иско
"Реал"нинг юқорида келтирилган трансфер сиёсати асосида харид қилинган яна бир вакил Искодир. Футболчининг клубдаги даврини омадли ёки омадсизга чиқариш осон эмас. Иско "Малага"дан 30 миллион евро эвазига олиб келинганди. Иско Зидан даврида "Реал"нинг ЕЧЛдаги муваффақиятларида муҳим ўрин эгаллаган. Афсуски, сўнгги йилларда у кучайиш ўрнига ўз формасини йўқотиб қўйди. Натижада, унга "Реал"да ўрин қолмади. Иско бир муддатлик "Севилья"даги давридан кейин, ҳозир "Реал Бетис" билан бирга. Кўрамиз, унинг Андалусиядаги саргузаштлари қандай давом этаркин...
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
