Ўзбекистон миллий терма жамоасининг собиқ ҳужумчиси, футболчилик фаолияти давомида нақ 18 (!)та клуб шарафини ҳимоя қилишга муваффақ бўлган Владимир Шишелов яна жонажон жамоаси - «Қизилқум»га қайтди.
Бир ойдан ошиқроқ вақт мобайнида машғулотларда иштирок этган тажрибали ҳужумчи «олтин изловчилар» билан бир йиллик шартнома имзолади. Биз билан бўлган суҳбатда Шишелов асосий мавзуга ўтишдан аввал болалик йиллари, шу кунгача футболчилик фаолиятида босиб ўтган йўлига қисқача тўхталди.
- Ўзим Краснодар ўлкасининг Апшеронск шаҳарчасида туғилганман. Тўрт ёшга тўлганимда эса ота-онам билан Ўзбекистонга кўчиб келдик. Ҳамма болалар сингари мен ҳам футболга меҳр қўйдим. Миллионлар ўйини билан профессионал тарзда 1996 йилдан шуғуллана бошладим. Айнан ўша йили футбол ортидан нон ейиш, кейинчалик оила тебрата олишим мумкинлигини тушуниб етдим. Фаолиятим Зарафшоннинг «Прогресс» (ҳозирги «Қизилқум») жамоасида бошланди. Илк мураббийим Виктор Пужалин бўладилар. Виктор Константинович қўл остида илк футбол сир-асрорларини ўрганганман. Мен ўзига яраша кичик рекорд эгасиман. Эътиборга молик жиҳати, шу кунгача бўлган 18 йиллик фаолиятим давомида оз эмас, кўп эмас, нақ 18та жамоа таркибида ўйнашга улгурибман. Бунақаси жуда кам бўлади.
- Ўтган йили Россия биринчи дивизиони клуби «Металлург-Кузбасс» шарафини ҳимоя қилдингиз...
- Ҳа, Новокузнецк шаҳрида футболни жуда севишади. Жамоамиз олдига лигадаги ўринни сақлаб қолиш вазифаси қўйилганди. Бу вазифа бажарилди, аммо молиявий муаммолар сабабли, клуб лигага қўйилмади. Шу боис, қолган барча футболчилар қатори мен ҳам «Металлург»ни тарк этдим.
- «Қизилқум»дан қачон таклиф тушди?
- Ўтган йилнинг ноябрь ойида клуб раҳбари Ҳамид Актамов ҳамда бош мураббий Юрий Лукин мени жамоага чақиришди. Декабрь ойида Навоийга келдим ва ўзаро музокаралардан сўнг келишувга эришдик.
- Зарафшонга бу галги ташрифингиздан нималарни кутяпсиз?
- Асосий мақсадимиз маҳаллий мухлисларни чиройли футбол билан хушнуд этиш. Ҳар бир учрашувга худди сўнгги ўйинга чиққандек тайёргарлик кўрамиз.
- Янги мавсумга тайёргарлик қандай кетмоқда?
- Якунланиб бораётган январь ойида катта ҳажмдаги тайёргарлик машғулотлари олиб борилди. Асосий урғу жисмоний тайёргарлик, тезлик, чидамлилик, югуриш машғулотларига қаратилди. Февраль ойида эса назорат ўйинларини имкон қадар кўпроқ ўтказишимиз керак. Шу орқали жамоавий ўйинни янада шакллантиришимиз керак. Чунки таркибда жуда кўп янги, шу билан бирга ёш футболчилар бор. Улар учун кўпроқ ўйин амалиёти зарур.
- Шартномани қанча муддатга имзоладингиз?
- Бир йилга. Агар ҳаммаси жойида бўлса, келишувни яна узайтиришимиз ҳам мумкин. Шундай бўлишига умид қиламан.
- Янги мавсумдан нималарни кутяпсиз?
- Фақат ижобий нарсаларни. Тўғри, «Қизилқум» совринли ўринлар учун кураш олиб бора олмайди. Лекин ўз мухлисларимиз ҳурмати чиройли ва мазмунли футбол намойиш этишга астойдил ҳаракат қиламиз. Ўз тажрибамни ёшлар билан ўртоқлашишни ҳам ният қилганман. Биз каби тажрибали футболчилар олдида ёшлар тезроқ камолга етишади.
- Клуб раҳбарияти жамоа олдига аниқ вазифа қўймаяптими?
- Ҳали бу ҳақда гап бўлгани йўқ. Ўйлайманки, клуб раҳбарларининг йиғилишидан сўнг бу ҳақда биз - футболчилар ва мураббийларга айтишади. Ҳар қандай ҳолатда ҳам футболчилар ўз мажбуриятлари - майдонда бор куч билан ҳаракат қилишлари керак.
- Сиз 2000-2007 йиллар оралиғида Ўзбекистон миллий терма жамоасига таклиф этилиб тургансиз. Терма жамоа либосидаги энг ёрқин ўйинларни эслай оласизми?
- Терма жамоа либосида майдонга тушган ҳар бир ўйиним мен учун қадрли. Чунки ўша учрашувларда мен Ватан шаъни учун ўйнаганман. Шу боис, алоҳида бир баҳсни ажратиб кўрсатмоқчи эмасман. Албатта, илк бор терма жамоа либосини кийган ўйинингизни ёддан чиқармайсиз. Ахир, ҳар кимга ҳам мамлакатнинг бош жамоасида ўйнаш насиб қилавермайди.
- Футболчилик фаолиятингизни якунлаш ҳақида ҳали ўйламаяпсизми?
- Бутсани михга илиш... йўқ, бу ҳақда ҳали ўйламадим. Ҳали ўйнаш учун иштиёқ ва кучим бор. Энг муҳими шу. Футболдан чарчаган ва зериккан куним фаолиятимни якунлайман.
- Ўзингиз ўйнаган жамоалардан орзудаги таркибингизни айтиб бера оласизми?
- 11 нафар футболчи ва бош мураббий, шундайми?
- Ҳа, худди шундай.
- Юқорида 18 йиллик фаолиятим давомида 18та клубда ўйнаганим ҳақида айтдим. Ҳар бир жамоада кучли ва ўз ўрнига эга бўлган футболчилар билан ўйнаш насиб қилган. Шунингдек, ўз ишининг уста мураббийлари қўл остида ҳаракат қилдим. Шундай экан, бирор бир футболчини, устозларим орасидан фақат бирини ажрата олмайман. Бу қолганларга нисбатан ҳурматсизлик ва нотўғри ҳам бўлади. Мени тўғри тушунасиз, деган умиддаман.
- Владимир Шишелов қайси клублар ёки терма жамоаларга мухлислик қилади?
- Биринчи навбатда Ўзбекистон миллий терма жамоасининг мухлисиман (кулади). Қолаверса, Англия футболига мафтунман. Туманли Альбиондаги тезлик ва шиддат, сўнгги сонияларгача бўладиган курашни бошқа чемпионатларда учратмайсиз. Пешқадам ва аутсайдер клуб ўртасидаги ўйинда ҳам ҳисобнинг қандай бўлишини олдиндан билиб бўлмайди.
- Ўйинларини мириқиб томоша қиладиган футболчингиз ҳам Англияданми?
- Очиғини айтсам, футболда кумирим йўқ.
- Бугунги кундаги энг кучли уч нафар амплуадошларингиз, яъни ҳужумчиларни айта оласизми? Бу сизнинг шахсий танловингиз бўлади.
- Криштиану Роналду. Учала ўринга ҳам португалиялик иқтидор эгасини қўяман. «Реал» ҳужумчиси ҳақли равишда «Олтин тўп» совринини қўлга киритди.
Камолиддин АЛИМОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
