«Krasnodar»ni uch yil boshqargan Oleg Kononov Rossiyaning taniqli murabbiylaridan biriga aylandi. «SSF» nashriga intervyu bergan 50 yoshli mutaxassis jamoadagi faoliyatini yodga oldi.
- O‘tgan mavsum yakunida «Bavariya»ga stajirovkaga borgandingiz. Taassurotlar qanday?
- Jamoa bosh murabbiyi Karlo Anchelotti bilan uchrashdim. Unga bir nechta savollar berdim. Italiyalik mutaxassis undan oldin ishlagan Pep Gvardiolaning ishiga yuqori baho berdi. Aytishicha, Pep futbolchilarni funksional va taktik jihatdan yaxshi tayyorlagan. Shuningdek, Karlo ispaniyalik murabbiy paytidagi seleksiya ishlarini ham maqtadi.
- Yana qaysi jihatlar e’tiboringizni tortdi?
- Mashg‘ulotlardagi holat yoqdi. Hamma bir yoqadan bosh chiqaradi. Aytgancha, u yerga Anatoliy Timoshuk bilan borgandim. Uni «Bavariya»da hamon hurmat qilishadi.
- Anchelotti Gvardiolaning «bagaji» haqida ham gapirdimi?
- To‘g‘risini aytsam, «oldingi murabbiyning bagaji» nima ekanligini tushunmayman. Umuman, bu haqda gapirish noo‘rin. Futbolchi bugun bir mutaxassis bilan ishlayaptimi uning qarashlarini qo‘llashi lozim. Ertaga boshqasi kelsa, uning aytganlarini bajarishga majbur. Murabbiylar hech qachon bir-birlarining ishlarini takrorlashmaydi.
- Yaqinda «Chelsi»da ham stajirovka qildingiz. Ikki klubni solishtira olasizmi?
- Aslida, bosh murabbiylarning ishlarini solishtirish kerak. Antonio Kontening mashg‘ulotlari uzoq davom etadi. Agar mashqlar soat 11:00da boshlansa, bazada futbolchilar soat 9:00dayoq to‘planib bo‘lishadi. Ular «nagruzka»larga individual tarzda tayyorgarlik ko‘rishadi. Keyin har bir futbolchi kamida bir yarim soat shug‘ullanadi. Anchelotti esa «Milan»dagidan farqli o‘laroq, taktikaga kamroq vaqt ajratadi. Konte futbolchilarning individual mashg‘ulotlariga ko‘proq e’tibor beradi.
- Siz aytganingizdek, Pavel Mamayev Monte-Karlodagi mojarodan keyin o‘ziga kelmadi. U ijtimoiy tarmoqlar orqali sizdan shunday gaplarni kutmaganini aytgandi. Ayni paytda o‘zaro munosabatingiz qanday?
- O‘shandan keyin Pavel bilan gaplashmadim. Lekin oramizda hech qanday mojaro yo‘q, deb hisoblayman.
- Mamayevning xarakteri og‘irligini bilamiz. U bilan qanday ishlagansiz?
- Murabbiy hamisha diplomat bo‘lishi shart emas. Axir ishimiz doimiy stress, asabiylikdan iborat. Biz Pavel bilan keragicha suhbatlashib olganmiz. Mamayev ko‘p mehnat qildi, mashg‘ulotlarda o‘zini ko‘rsatdi. Yakunda natija berdi va u Rossiya terma jamoasining asosiy o‘yinchilaridan biriga aylandi. Kichik mojarolarni suhbat orqali hal qilardik. Ba’zida bu natija bermasdi va qattiqqo‘llik qilishga to‘g‘ri kelardi. Fyodor Smolov kelganidan so‘ng Pavel klubning yetakchisiga aylandi. Ularning dueti 2015|2016 yillar mavsumi bezagiga aylandi. Ular o‘yin va natijadan rohat olishardi. Biz esa nostandart harakatlaridan. Xalk - Dzyuba, Promes - Ze Luish, Mamayev - Smolov bu uchta duetning qarama-qarshiligini tomosha qilish rohat bag‘ishlagan.
- Mamayev futbolchi sifatida «Krasnodar» uchun kerak edi. Siz uni asosiy tarkibdan haydaganingizda buni o‘ylamadingizmi?
- Hozir qandayligini bilmadim-u, mening davrimda Pavel haqiqatan ham jamoaning yetakchi o‘yinchilaridan edi. U tarkibda yo‘qligida muammolarga duch kelardik.
- Fyodor Smolovning real bahosi qancha?
- «Krasnodar» rahbari ham shuni o‘ylayotgan bo‘lsa kerak. Ammo matbuotda yozilayotganidan ikki baravar qimmat turadi.
- Demak, 20 million yevro. U Germaniya chempionatiga mos keladimi?
- Germaniya chempionatida futbol ancha tezkor. Fyodor ham bunday o‘yin rejimini ushlab tura oladi. Yanada o‘sishi uchun unga ikkita jamoa mos keladi - «Bavariya» va «Borussiya» (Dortmund).
- Nima uchun u so‘nggi ikki-uch mavsumdan buyon ko‘p gol uryapti?
- Barchasi uning istagiga, jamoa o‘yiniga, jamoadoshlariga, murabbiy va rahbariyatga bog‘liq bo‘lib qoldi.
- Sizning qo‘l ostingizda o‘ynagan yana bir futbolchi - Roman Shirokov. Avvaliga uning xarakteri borasida xavotirga tushmadingizmi?
- Roman kelishi bilanoq gaplashib oldik. Bizga uning tajribasi va iqtidori kerak edi. Boz ustiga, Shirokov biz namoyish etayotgan futbolga osongina moslashdi. Ayrim futbolchilar va rahbarlar Romanning oliftalik qilishidan cho‘chishgandi. U - katta professional. Boshqa yigitlar ham uning ortidan borishdi. Mamayev, Ari, Vanderson, Joaozinyo, Ahmedov, Kaleshin, keyinroq Pereyra, Izmaylov va Labordelar qiziqarli o‘yin namoyish qila boshlashdi.
- Shirokov siz bilan o‘yin taktikasini muhokama qilarmidi?
- Barchasini bo‘lmasa ham qilib turardi. Roma hamisha jamoa haqida o‘ylagan.
- «Krasnodar»dan o‘zingiz ketdingizmi yoki haydashdimi?
- O‘zaro kelishgan holda qaror qabul qilganmiz. Bu borada boshqa hech narsa demayman.
- Ko‘pchilik uchun bu kutilmagan bo‘ldi.
- Fikringizga qo‘shilaman. Chunki, murabbiy har doim ham o‘zi iste’foga chiqavermaydi.
- Ikki nafar yordamchingiz ham bosh murabbiy bo‘lishdi. Sizningcha, Andrey Tixonov yoki Igor Shalimovdan qay biri ko‘proq muvaffaqiyat qozonadi?
- Andrey bilan ko‘p ishladim va u haqda ancha-muncha gapira olaman. Tixonov iqtidorli va yosh. O‘z yo‘lini endi boshladi. Menimcha, Shalimov ochiq inson emas. Lekin u futbolchi va murabbiy sifatida katta tajriba to‘plagan. Barchasi ularning o‘zlariga bog‘liq.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
