Bugun Uzreport telekanalida Ispaniya Primerasining 21-turida qoldirilgan "Selta" - "Real Madrid" uchrashuvi jonli efirda namoyish qilinadi.
Siz Toshkent vaqti bilan soat 23:50dan boshlab mazkur uchrashuvdan translyasiyani tomosha qilishingiz mumkin. Bahs esa soat 00:00da start oladi.
Uchrashuv prevyusi:
La Liga.
21-turning qoldirilgan uchrashuvi.
"Selta" - "Real Madrid"
Vigo. "Balaidos" stadioni. Soat 00:00
Hakam: Xuan Munera
17-may sanasida "Real" jamoasi uchun mavsum so‘ngidagi uch finaldan bittasi bo‘lib o‘tadi va unda madridliklar Vigoning "Selta" jamoasi mehmoni bo‘lishadi. Aslida mazkur uchrashuv fevral oyida, Ispaniya Primerasining 21-turida bo‘lib o‘tishi kerak edi, biroq Galisiya hududidagi noqulay ob-havo sababli noma’lum muddatga qoldirilgan edi.
Fevral oyida Edurardo Berisso shogirdlari hozirgiga nisbatan ancha yaxshi holatda edilar va har qanday raqib uchun noqulay jamoa hisoblanishar edi. Ammo Ispaniya Kubogida final uchun kurashda "Alaves"ga imkoniyat boy berib qo‘yilgach, vigoliklar bor e’tiborlarini Yevropa Ligasiga qaratishdi va ichki chempionat uchrashuvlariga deyarli ko‘z yumib qo‘ya qolishdi. Ammo "Selta" xalqaro maydonda ham aynan yarim final bosqichida "Manchester Yunayted"ga imkoniyatni boy berib musobaqa bilan xayrlashdi. Ichki chempionatga bo‘lgan e’tiborsizlik sabab endilikda "Selta" turnir jadvalida 13-pog‘onagacha paslab ketdi. Bu mavsum Berisso shogirdlari uzoq borsa 11-o‘ringa ko‘tarilishlari mumkin xolos. Lekin bu vazifa ham ancha mushkul. Ochiqchasiga aytadigan bo‘lsak, "Selta" bu bahsga unchalik ham yaxshi holatda tashrif buyurayotgan yo‘q. Ustiga ustak, Yevropa Ligasi ham futbolchilardan ancha kuch olib qo‘ygani aniq. Lekin "Selta" La Liga yetakchilariga qarshi tayyorgarlik ko‘rishni biladi. Bu mavsum vigoliklar "Barselona"ni ham "Real Madrid"ni ham mag‘lub etishga muvaffaq bo‘lishganini unutmaslik kerak.
"Real"ga to‘xtaladigan bo‘lsak, jamoa ayni dam yaxshi kayfiyatda mazkur uchrashuvga yetib kelmoqda va bu mavsum ikkita sovrin (Ispaniya chempionati va YECHL) uchun kurashda yaxshi imkoniyatga ega bo‘lib turibdi. "El Klasiko"dan so‘ng Zidan shogirdlari La Liga doirasida qatorasiga 4ta uchrashuvda g‘alaba qozona olishdi. So‘ngi turda esa "qirollik klubi" "Sevilya"ni qiyinchiliksiz 4:1 hisobida taslim etishga muvaffaq bo‘ldi. Bu madridliklar uchun mazkur mavsumdagi so‘ngi uy uchrashuvi edi. Endilikda "Real" chempion bo‘lishi uchun ikkita safar o‘yinida hech bo‘lmasa 4 ochko jamg‘arishi kerak bo‘ladi. Har qanday mag‘lubiyat jamoani chempionlikdan mahrum qiladi.
Mazkur uchrashuvga "Selta" tarkibda bir necha yo‘qotishlar bilan tashrif buyurmoqda. Jamoa hujumchisi Juzeppe Rossi jaroxat olgan. Shuningdek markaziy yarim himoyachi Nemanya Radoyaning maydonga tushishi ham so‘roq ostida. Toto Berisso mazkur o‘yin qaydnomasiga darvozabon Blanko, himoyachilar Ronkalya, Planas, Lemos hamda yarim himoyachi Seneni ham kiritmagan.
"Real" tarkibida esa Dani Karvaxal hamda Garet Beyllar jaroxat sabab o‘z jamoasiga yordam bera olmaydi. Shuningdek yana bir himoyachi Nacho ham diskvalifikasiya sabab mazkur uchrashuvni o‘tkazib yuboradi. Pepe va Xames Rodrigesning maydonga tushishi esa so‘roq ostida. Ba’zi xabarlarga ko‘ra kolumbiyalik futbolchi "Manchester Yunayted" bilan shartnoma tuzishni boshlab yuborgan. Zidan o‘tgan turda Marselo, Isko va Benzemaga hordim chiqarishga imkon berdi. Kazemiro va Modrich esa to‘liq uchrashuv o‘tkazishmadi. Ayni shu sabab "Real"ning asosiy tarkib futbolchilari mazkur bahsga jismonan toliqmagan holda yetib kelishmoqda.
Birinchi davradagi bahs.
27.08.2016. Madrid. Stadion "Santyago Bernabeu".
"Real" - "Selta" 2:1
Gollar: Morata, 60, Kroos, 81 - Orelyana, 67
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
