Bir yil oldin Kilian Mbappe hamda Usmon Dembele kabi futbolchilar ko‘pchilik uchun notanish edi, hozirda esa ularning narxi 100 million yevrodan ancha baland turadi.
Quyidagi maqola orqali xuddi shunday mashhurlikka erishishi taxmin qilinayotgan yuksak iqtidor egalari bilan tanishishingiz mumkin.
Dani SEBALYOS, «Real»
Yarim himoyachi, 21 yosh
Madridning «Real» klubi transfer mavsumlarida ortiqcha xarajatlarga qo‘l urmayapti. Kazemiro va Asensio kabi kamtar, ammo omadli xaridlardan so‘ng «Betis»dan Dani Sebalyos hamda «Atletiko»dan Teo Ernandes sotib olindi.
Dani hujumlarga rang-baranglik qo‘shib, Xamesning muxlislar yodidan tezroq chiqib ketishini ta’minlashi mumkin. Umuman, Sebalyos haqiqiy universal, yarim himoya markazi va qanotlarda bemalol o‘ynay oladi.
Teo esa endigina 19 yoshni qarshilaganiga qaramay, oxirgi «klasiko»ning so‘nggi daqiqalarida muxlislarga ko‘rinish berib ulgurdi.
Lorenso PELLEGRINI, «Roma»
Yarim himoyachi, 21 yosh
«Roma» Leandro Paredes bilan juda xotirjam tarzda xayrlashdi va asosiysi, bundan afsuslanmadi. Uning transferidan tushgan mo‘maygina mablag‘ evaziga esa «Sassuolo»dan o‘z tarbiyalanuvchisi Lorenso Pellegrinini qaytarib oldi. U
shbu futbolchi hozir Italiyaning eng iqtidorli vakillaridan biri hisoblanadi.
Maydonni ko‘ra olish qobiliyati, texnika, pas aniqligi va noodatiy iqtidor... Eng muhimi u yanada o‘sishga erishish uchun muntazam harakatda.
Pellegrini kelajakda «Roma»ning hozirgi vaqtdagi yorqin yulduzi Raja Nainggolan kabi futbolchi bo‘lib yetishishi mumkin.
Alessandro MURJA, «Lasio»
Yarim himoyachi, 21 yosh
Italiya «A» seriyasi grandlarining diqqat markazida turgan yana bir ajoyib futbolchi. «Lasio» akademiyasida Murja va Jozef Minala juda yaxshi tanilgan. Alessandro o‘tgan mavsum «burgutlar» safida o‘zining debyutini o‘tkazganidan so‘ng ko‘plab klublar etiboriga tushdi.
Unga eng asosiy da’vogar - «V» seriya vakili «Salernitana» jamoasi. Lekin «Lasio» Murjani sotmasligi ham mumkin. Bunga sabab sifatida Lukas Biglianing «Milan»ga o‘tib ketgani ko‘rsatilmoqda.
Karles ALENYA, «Barselona»
Yarim himoyachi, 19 yosh
«Barselona» akademiyasi ancha vaqtdan buyon ko‘zga yaqqol tashlanadigan futbolchi yetishtira olgani yo‘q. Karles Alenya hozirda noyob marvaridlardan biridir.
Kuchli texnikaga ega serqirra yarim himoyachi o‘tgan mavsum Luis Enrike tomonidan asosiy jamoa tarkibiga jalb qilingandi.
Ammo hali o‘z o‘rniga ega bo‘lib ulgurgani yo‘q. Hozir jamoada qandaydir inqiroz davri hukm surmoqda va Karles mana shu vaqtda o‘ziga berilgan minimum imoniyatlardan foydalanib, «blaugranas» yetakchilaridan biriga aylanishi mumkin.
Trent ALEKSANDER-ARNOLD, «Liverpul»
Himoyachi, 18 yosh
«Liverpul» muxlislariga Nataniel Klaynning yo‘qligini bildirmayotgan ajoyib himoyachi. «Xoffenxaym»ga qarshi o‘yinda Aleksander-Arnold jarima zarbasini mukammal tarzda ijro etganini barcha ko‘rdi.
Ushbu harakatdan so‘ng raqib futbolchisi Mark Ut ham qo‘lini silkitgan holda yosh iste’dod sohibini olqishlab qo‘ydi.
Umuman, Trentning o‘rganadigan narsalari hali yetarli. Ammo shu yo‘sin davom etsa, kelajakda Angliya terma jamoasi sharafini himoya qilishi ham mumkin.
Edmilson FERNANDESH, «Vest Xem»
Yarim himoyachi, 21 yosh
Shveysariya futbolida yangi iste’dodli avlod yetishib chiqmoqda. Ulardan biri - joriy mavsum «Vest Xem» o‘yinlarida o‘zining «imzo»sini ko‘rsatishi kutilayotgan Edmilson Fernandesh (Jelson Fernandeshning amakivachchasi).
Uzun oyoqlar va baland bo‘y uning chiroyli o‘yin ko‘rsatishiga to‘sqinlik qilmaydi.Dimitri Payet jamoani tark etganidan so‘ng Fernandesh «bolg‘alar»ning eng yaxshi ijrochilaridan biriga aylandi.
APLni muntazam kuzatuvchilar chempionat davomida bunga o‘zlari ham guvoh bo‘lishlari mumkin.
Maksimilian FILIPP, «Borussiya» D.
Yarim himoyachi, 23 yosh
Bu futbolchi asosiy vaqtini jarohatini tuzatish bilan band bo‘ladigan Marko Roysning o‘rnini to‘ldirishi mumkin. Ammo Filipp o‘zining o‘yin uslubini Roysnikidan farqli deb hisoblaydi.
Maksimilian «Frayburg»ning o‘ng qanot yarim himoyasida to‘p surardi, biroq futbolchi hujumlarga tez-tez qo‘shilish hamda yarim himoya markazida o‘ynashni yaxshi ko‘radi.
Filipp shu yozda Germaniya yoshlar terma jamoasi bilan Yevropa chempionligini qo‘lga kiritdi. Mazkur musobaqa davomida texnik tomondan kuchli va aniq zarbalar bera olishini ko‘rsatdi.
Yann KARAMO, «Kan»
Hujumchi, 19 yosh
Liga 1 chempionati Gollandiya eridiviziyasidan Yevropaning eng iqtidorli futbolchilari ligasi maqomini tortib oldi. Fransiya elitasidan hozirda Kilian Mbappe kabi juda ko‘p yosh javohirlar yetishib chiqmoqda.
Ulardan biri - «Kan» jamoasining qanotlardan uyushtiriladigan hujumlarida asosiy figuraga aylanadigan Karamo. Uning o‘yinlarini kuzatish uchun hozirda ko‘plab skautlar tashrif buyurishmoqda.
Tez orada Yanning nomdorroq jamoa safiga o‘tishi kutilyapti. Harqalay, Karamo hozirgi klubida uzoq vaqt qolib ketmasa kerak.
Stiv MUNYE, «Xaddersfild»
Hujumchi, 22 yosh
Stiv Munye allaqachon o‘ziga sarflangan mablag‘ni oqlashni boshladi. «Xaddersfild» uning uchun «Monpelye»ga 13 million yevro to‘lagandi, bu summa premyer-liga debyutanti uchun shaxsiy rekord sanaladi.
Stiv APLning birinchi turida «Kristal Pelas» darvozasini ikki marotaba ishg‘ol qildi. Kuchli va yuqori texnika sohibi bo‘lgan beninlik hujumchi Angliyada o‘sishga erishib, kelajakda «Xaddersfild» g‘aznasiga mo‘may daromad keltirishi kutilmoqda.
Allan SEN-MAKSIMEN, «Nissa»
Hujumchi, 20 yosh
«Monako» bir qator futbolchilarini sotib, 150 million yevrodan ortiqroq summa ishlab oldi. Ular orasida ijara asosida «Nissa»ga (10 million yevro) yo‘l olgan Allan Sen-Maksimen ham bor.
Ushbu futbolchi kelajakda monegasklarni yanada boyitishi mumkin. Juda tezkor va aql bovar qilmas darajadagi texnikaga ega Allan o‘tgan mavsum «Bastiya» safida ajoyib o‘yinlar o‘tkazib, Fransiya chempioni safiga qo‘shilgandi.
Endilikda Sen-Maksimen italiyalik hujumchi Mario Balotelli bilan birgalikda nimalarga qodir ekanligini namoyish qiladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
