«Chelsi» Diyego Kostaga 300 ming funt miqdorida jarima solib, uni zaxira o‘rindig‘iga «mixlab» qo‘ydi.
Bu holatda Ispaniya terma jamoasi qanday yo‘l tutadi? Alvaro Morata asli braziliyalik «ispan» o‘rnini to‘liq bosa olarmikan? Quyida ikki hujumchining ustun tomonlariga nazar solib, bu savol javobini topishga urinib ko‘ramiz.
Samaradorlik. Antonio Konte munosabati, ya’ni Diyego Kosta xizmatidan qat’iy bosh tortayotganiga qarasak, «Chelsi» tarkibida uning o‘rnini bemalol bosishga qodir futbolchi borligiga shubha qolmaydi. Aslida italyan murabbiyi Romelu Lukakuni orzu qilgandi, biroq «Chelsi» bu to‘purarga yetisholmadi.
Londonliklar keyinchalik Pyer-Emerik Obameyang va Andrea Belottidan yuz o‘girib, Alvaro Morataga ishonch bildirishdi.
Buning asosiy sababi - uning samaradoligi. Alvaro avvalgi mavsum La-ligada 55ta qulay imkoniyat hosil qilib, 15ta gol urdi. Boshqacha aytganda, 1ta gol uchun o‘rtacha hisobda 89 daqiqa sarfladi, Diyegoda esa bu ko‘rsatkich 154,5 daqiqaga teng bo‘ldi.
Kostada qulay imkoniyatlardan foydalanish koeffisiyenti ham nisbatan past - 111ta vaziyatdan 20ta gol. Xullas, u bu borada 18 foizli natijaga ega (Morata xavfli vaziyatlarning 27 foizida gol urgan).
Ha, braziliyalik «ispan» muhim gollarga mualliflik qilishi va «Manchester Siti» kabi kuchli raqiblarga qarshi muvaffaqiyatli to‘p surishi bilan nom qozongan.
Ammo uning hisobida ham xuddi Moratadagi kabi autsayder jamoalar darvozasiga yo‘llangan gollar miqdori ko‘proq, baribir. Xullas, «Chelsi» murabbiyi-ning Kosta xizmatidan voz kechishiga sabab bitta - samadorlik ko‘rsatkichi.
Natija. Morata yaqqol ustun. Mana, u APL startidagi 3ta o‘yinda 2ta gol urdi. Umuman, Alvaro bu ketishda to‘purarlik maqomiga ham bemalol da’vogarlik qilishi mumkin.
Gollar muhimligi. Avvalgi mavsum Alvaroning 15ta goli «Real»ga juda qo‘l kelgani aniq. Zero, u aksariyat o‘yinlarda zaxiradan maydonga tushib, Zayniddin Zidan jamoasi joniga oro bo‘ldi.
Qolaversa, Garet Beyl jarohatlangan, Karim Benzema parhezga o‘tirgan va Krishtianu Ronaldu dam olgan paytlar tashabbusni qo‘lga olib, muhim gollar muallifiga aylandi.
Xullas, «Qirollik klubi»ning Morato gollarisiz chempion bo‘lishi amri-mahol edi. Diyego Kosta esa 20ta goli bilan «Chelsi»ga naq 15 ochko keltirdi. Garchi o‘rtacha hisobda Morata ustunroq bo‘lsa-da, Konte nafratiga uchragan hujumchi bu masalada APLning eng yaxshi ko‘rsatkichiga erishganini unutmaslik kerak.
Har holda, Kosta deylik, Garri Keyn, Serxio Aguero, Fernando Lyorente va Jeymi Vardiga nisbatan o‘z jamoasiga 2ta ko‘p ochko taqdim etdi.
Yo‘q, «Chelsi» faqat Kosta xizmatlari evaziga g‘alaba qozonganini ta’kidlash noo‘rin, ammo bu boradagi eng yaxshi ko‘rsatkich ko‘p narsadan dalolatdir.
Morata esa «Real»ga ochko keltirish bobida Ronaldudan ortda qoldi. Aniqroq aytsak, jamoa yetakchisi o‘z gollari bilan Alvaroga nisbatan 1ta ko‘p ochko taqdim etdi.
Natija. Durang. Kosta ham, Morata ham so‘zsiz, muhim sanalgan ochkolarni keltiruvchi zarur gollar urishni qoyillatadi.
«Ikkinchi qavat»dagi o‘yin. Diyego Kosta - kuchli, tajovuzkor kurashni yoqtiradi. Ammo «Chelsi» o‘tgan mavsum uning «ikkinchi qavat»dagi o‘yinidan naf ko‘rmadi, hisob.
Axir hujumchi 20ta golidan atigi 2tasini havoga sakragan holda urdiki, bu APLda o‘ynovchi goleador uchun juda oz.
Umuman, Diyego maydonning xohlagan nuqtasida bosh bilan yomon o‘ynadi - bor-yo‘g‘i 25 foiz «duel»ni o‘z foydasiga hal qildi, Moratada esa bu ko‘rsatkich 50 foizga teng.
Shunga yarasha, yosh ispanning har 3ta golidan biri «ikkinchi qavat»dagi kurash samarasidir. Oddiy aytganda, Morata bosh bilan o‘ynash masalasida Kostadan ancha ustun va o‘yin to‘g‘ri tashkil etilsa, londonlik fanatlar buning isbotini ko‘rishlari mumkin.
Natija. Morata g‘alabasi. Diyego ham bosh bilan ancha samarali o‘ynashi mumkin, ammo u kurashlarga juda kam kirishadi.
Ayyorlik va «fol»lar. Morata «Bernli»ga qarshi o‘yinning yarim soati davomida darvoza tomon 3 marta zarba berdi va ularning 2tasi aniq chiqdi. Taqqoslash uchun aytsak, Mishi Batshuayi 1 soat oralig‘ida shunday ko‘rsatkich qayd etdi.
Xulosa shuki, Alvaro keskinlikni yuzaga keltirish bobida Kostadan qolishmaydi. Biroq butun vaqt davomida ustunlik qilishga intilmaydigan va gohida 5 nafar himoyachi hamda 2 nafar kuchli markaziy xavbek bilan o‘ynaydigan «Chelsi»dek taktik jamoa uchun ayyorlik ham o‘ta zarur.
«Iflos tryuk»larga tayanish yaxshi emasmi? Ehtimol, ammo Angliyada sal boshqacha munosabat mavjud, baribir. Luis Suares va Diyego Kosta faoliyati buni to‘liq tasdiqlaydi.
Umuman, APLda ayyorona harakatlar orqali raqibning maydondan chetlatilishiga erishish, shuningdek, penalti ishlab olish holatlari ko‘p uchraydi.
Bu borada Kostaga teng keladiganlar kam, u avvalgi mavsum o‘z ishtirokidagi to‘qnashuvlardan 69 foizida «Chelsi» uchun jarima zarbasi ishladi. Alvaro esa bunday vaziyatlarda no‘noqroq - to‘qnashuvlarning deyarli yarmida «Real» zarariga hushtak chalindi. Demakki, u maydonda Kostadek ayyor emas.
Natija. Diyego Kosta g‘alabasi. Simulyasiyalar va «iflos o‘yin» ustasi ustun ekanligida ajablanarli tomoni yo‘q.
To‘p bilan nozik muomala. Albatta, bu masalada Morata ham, Kosta ham Neymar bilan tenlasholmaydi. Ammo har qayday hujumchiga texnika va nafis harakatlar zarurligi aniq.
Statistika bo‘yicha aytsak, Diyego Kosta raqibni aldab o‘tishga qaratilgan urinishlarning 41 foizini muvaffaqiyatli bajaradi, Moratada bu ko‘rsatkich yuqoriroq - 54 foiz.
To‘g‘ri, aldab o‘tish - to‘p bilan ishlashning bitta elementi, xolos. Zero, to‘pni aniq uzatish ham muhim. Aytish joiz, o‘yinning shu jihati bo‘yicha har ikki hujumchi ajoyib natijaga ega.
Avvalgi mavsum ko‘rsatkichlariga qarasak, Kosta raqobatchisidan atigi 3 foiz ortda, ammo tan olish kerak, APLda maydonning uchinchi qismiga aniq to‘p oshirish «Real» tarkibida La-liga o‘yinlarida shunday qilishga nisbatan qiyinroq.
Zarba aniqligi bo‘yicha esa Morata yaqqol ustun. Uning 63 foiz urinishi aniq chiqqan bo‘lsa, Kosta 53 foiz holatda to‘pga to‘g‘ri yo‘nalish bergan.
Natija. Morata g‘alabasi. Shuningdek, u to‘p bilan yumshoq muomalada bo‘ladi, texnikasi yuqori, tezkor, zarbalari ham aniqroq.
Sadoqat va fidoyilik. Alvaro qadrdon klubi - «Real»ni 2 marta tark etdi - unga asosiy tarkibda joy topilmadi. Diyegoga kelsak, Konte uni «Chelsi»ga hurmat nazari bilan qaramayotganlikda ayblamoqda.
Aslida ikki hujumchining bu masaladagi taqdiri o‘xshash. Chunonchi, ularning iqtidori vaqtida munosib baholanmadi va Kosta ham, Morata ham doimiy o‘yin amaliyoti borasida muammolarga uchradi.
Muhimi, barchasini «Albasete» hujumchisi sifatida boshlagan Diyego Angliya chempioni darajasiga chiqishni uddaladi, endi tarkibdan tashqarida qolmoqda.
Tushunarliki, hozir Moratada imkon ko‘proq - u o‘zini Angliyada ko‘rsatish ishtiyoqida yonmoqda va istiqboli ham chakki emas. Kosta aksincha, Londondagi «ob-havo»dan zada, shu boismi, ichki intizomni buzmoqda.
Natija. Morata g‘alabasi. Kosta italiyalik Konteni sevimli murabbiyi sifatida maqtamasa kerak. Axir u aynan Antonioning sovuq munosabati tufayli chetda qolyapti, ammo bunga avvalo, o‘zi aybdordir, baribir.
Jamoaga moslashish. Riyod Mahrez va N~Golo Kante kabi futbolchilar Fransiya quyi ligalaridagi faoliyatdan so‘ng APLda yetakchilar guruhiga qo‘shilishdi.
Shuni nazarda tutsak, «Yuventus»da binoyidek o‘ynash tajribasiga ega Morata Angliya futbol muhitiga moslashishda ortiqsa qiynalmasligi kerak.
To‘g‘ri, APLda jismoniy kuch birinchi o‘rinda turishi va eng baquvvat yigitlargina «yashab» ketishlarini unutmaslik kerak.
Kosta buni isbotlashga ulgurgan futbolchidir. Ya’ni u bir urinishda premyer-ligani zabt etgan hujumchilardan biri sanaladi.
Natija. Kosta g‘alabasi. Ammo bu vaqtincha, chunki Morata hali o‘zini to‘liq ko‘rsatish imkoniyatiga ega. Zero, Alvaro o‘ziga ishonchi mustahkam surbetroq hujumchidek taassurot uyg‘otyapti.
Taqqoslash hisobi: Kosta - Morata - 3:5. Morata oxirigacha shunday uynasa, unda hamma Konteni olqishlab, Kostaga ishonch bildirmasdan to‘g‘ri qilganini ta’kidlaydi.
Bordiyu, «Chelsi» halokatga yuz tutsa-chi? Misol uchun, «Chelsi»da murabbiy almashsa, hujumchi muammolarga uchrashi hech gap emas.
Har holda, ingliz bukmekerlari ishonch bilan bong urishmoqda: «Agar natijalar o‘xshamasa yoki yana qandaydir nifoq chiqsa, klub rahbariyati Kontega javob berishni paysalga solmaydi».
Alvaroning talab darajasida o‘ynamasligi esa nifoqni yuzaga keltirishi aniq. Zero, bu holatda hamma Diyego Kostani esga oladi...
Diyego Kosta va Morata o‘rtasidagi «jang» nafaqat rossiyalik milliarderga tegishli klub fanatlari, balki Ispaniya termasi o‘yinlari ixlosmandlarini ham befarq qoldirmaydi.
Agar «qizil furiya» muxlislari yulduzlar jamoasi ishtirokida sifatli futbol ko‘rishni istasalar, unda Diyego Kosta va Morataga birdek omad tilashlari zarur.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
