FIFA gala-oqshomida mavsumning eng yaxshi darvozaboniga atalgan FIFA Goalkeeper sovrini ilk marta o‘z egasiga topshirildi.
Taqdirlash marosimidan oldin xalqaro futbol uyushmasi rasmiy sayti ijodkorlari afsonaviy kiper Piter Shiltonni suhbatga tortib, uning bu masaladagi fikrlari bilan qiziqishdi.
Chunonchi, APLda 1000tadan ko‘p o‘yinda maydonga tushgan, JCH-90da Angliya termasining yarim finalga chiqishiga yordam bergan Shilton darvozabonlikning barcha sir-asrorlariyu, nozik jihatlaridan yaxshi xabardor.
Ma’lumot uchun aytish kerak, Piter 47 yoshigacha katta futbolda faoliyat yuritgan, qolaversa, naq 2ta 10 yillik davomida Angliya milliy jamoasida birinchi raqamli kiper rolini bajargan.
- FIFA talqinidagi mavsumning eng yaxshi darvozaboni maqomiga Janluiji Buffon, Keylor Navas va Manuel Noyer nomzodi ko‘rsatildi. Sizningcha, 23 oktyabr kuni Londonda o‘tadigan taqdirlash marosimida sovrin ulardan qay biriga nasib etadi?
- Avvalo, aytishim kerak, 3 nafar da’vogar orasida Keylor Navasni ko‘rib rosa xursand bo‘ldim. U avvalgi mavsum «Real»da o‘z vazifasini a’lo darajada uddaladi.
Oxirgi jahon chempionatida ham shaxsan men uchun aynan Keylor eng yaxshi darvozabondek ko‘ringandi. U ayniqsa, texnik tomondan kuchli, o‘ynash uslubi ancha qiziqarli.
Manuel Noyerga kelsak, tushunarliki, nemis kiperi - jahon kubogining amaldagi sohibi. Ochig‘i, Manuelning yetakchilik qobiliyatiga qoyil qolish kerak. Xullas, yana bir munosib nomzod. Ammo o‘ylaymanki, bu kurashda Janluiji Buffon yaqqol favorit.
- Demak, sizningcha, sovrin italyan faxriysi mulkiga aylanadi...
- Qarang, Buffon 40 yoshda qanday o‘ynamoqda? Butun faoliyatini olsak, shunchaki, fantastika. Tabiiyki, barcha kiperlar o‘yinlar davomida xato qilishadi, ammo eng yaxshilar kamroq adashishadi. Jiji esa shundaylardan biri, shubhasiz.
- Kutilishicha, Buffon JCH-2018dan keyin qo‘lqoplarini mixga iladi. Darvoqe, siz 40 yoshingizda 1990 yilgi mundialda Italiya termasiga qarshi kechgan 3-o‘rin uchun o‘yinda ishtirok etgansiz. Buffon ham endi shu yoshda JCHda o‘ynashi mumkin.
- Italiya-90 mundialiga borgunimga qadar inglizlar darvozasini 20 yil davomida qo‘riqlagandim va ketish fursati yetgandi. Qolaversa, xalqaro faoliyatimni yuqori saviyadagi turnirda yakunlashni xohlagandim.
O‘ylaymanki, bu juda muhim. Buffonga kelsak, qanday yo‘l tutishi uning o‘ziga bog‘liq. Men faqat bir narsani bilaman - xalqaro darajadagi faoliyatni tugatgach, klub futbolida yuqori ishtiyoqni saqlab qolish juda qiyin.
- FIFA Goalkeeper sovrini ilk marta topshiriladi. Bunga umumiy munosabatingiz qanday?
- Mohiyatan olganda, darvoza futboldagi eng muhim pozisiya sanaladi. Ha, hujumchilarning birinchi o‘ringa chiqishganiga ancha bo‘ldi. Chunki gol urish - futboldagi eng zarur san’at.
Ammo ko‘p narsa darvozabon o‘yiniga bog‘liqligini unutmaslik lozim. Misol uchun, eng hujumkor jamoa ham agar munosib kiperga ega bo‘lmasa, qandaydir sovrin yutishi dargumon.
- Angliya futbolida yaqin kelajakda bu sovringa da’vogarlik qila oladigan darvozabonlar bormi?
- Shaxsiy kuzatuvlarim asosida gapirsam, ayni payt Jek Batlend va Jorj Pikfordning salohiyati chakki emas. Ammo darvozabonlarning umumiy saviyasini ko‘tarishimiz shart.
Yaxshi bo‘lish va buyuk sifatini olish o‘rtasida katta farq bor - nozik chegara. Futbolchi avvalo, shuning mohiyatini tushunishi, chegara qayerda ekanligini bilishi zarur.
Mana, Jek qisqa vaqt ichida yetarlicha yorqin o‘yinlar ko‘rsatdi. Vaholanki, bir necha marta jarohatga bog‘liq muammolarga uchragandi. Endi shu ruhda davom etishi kerak. Shuningdek, ulkan tajriba sohibi Jo Xartni alohida e’tirof etishim joiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
