Tez orada Ganada hujumchi Asamoa Gyanga tegishli Baby Jet Airlines aviakompaniyasi faoliyat yurita boshlaydi.
Mamlakat prezidenti Nana Akufo-Addoning bayonotiga ko‘ra, futbolchi aviaxizmatlar uchun tegishli lisenziyani xarid qildi, hozirda so‘nggi yuridik hujjatlarni rasmiylashtirish ishlari olib borilmoqda.
Ayni dam shunisi ma’lumki, yangi aviakompaniya Gana hududida faoliyat yuritadi.
Hukumat anchadan buyon yangi korxonalar hisobiga sog‘lom raqobatni yuzaga keltirish, buning uchun ichki yo‘nalishlardagi aviachiptalar bahosidan qo‘shimcha qiymat solig‘ini (17,5 foiz) chiqarib tashlashni rejalashtirgandi.
Gyan birinchilardan bo‘lib ma’murlar chaqiruviga javob berdi va albatta, qo‘shimcha imtiyozlarga ham ega bo‘ldi.
Shuncha mablag‘ qayerdan olinmoqda?
Hujumchi Asamoa Gyan ko‘pchilik muxlislar xotirasidan ko‘tarilgan bo‘lsa, ajabmas. Axir u 2011 yildan buyon Yevropaning top-chempionatlarida ko‘rinish bermay qoldi.
Ana shu o‘tgan vaqt mobaynida Gyan Osiyo maydonlarida to‘p surib, kattagina daromadga ega bo‘ldi. Avvaliga BAAda «Al-Ayn» sohiblarini o‘z sermahsulligi bilan rom etdi - 83ta o‘yinda 95ta gol urdi! Abadiy eng yaxshi to‘purar maqomini uchta chempionlik tojlari bilan bezadi.
Maosh ham shunga yarasha yashin tezligida oshib bordi: bir yillik ish haqi 6 mln. dollar (bonuslari bilan 8 mln.) keyinchalik yiliga 13 mln. (bonuslari bilan - 15 mln. dollar). Shu tariqa Asamoa eng ko‘p daromad oladigan futbolchilar o‘nligiga ko‘tarildi.
Vaholanki, u APLni tark etganida ko‘pchilik uni ochko‘zlikda ayblagandi. Gyan tanqidlarga xotirjamlik bilan javob qaytardi: birinchidan, taklif o‘ta manfaatli bo‘lgani uchun rad etishning iloji bo‘lmadi. Ikkinchidan, Angliyada ish haqining 50 foizi soliqlarga sarflanardi.
«Menimcha, bu insofdan emas. «Sanderlend»dan ketishimning sababi ham shu. Amirliklarda ish haqining hammasi to‘liq qo‘limga tegadi. Xitoyda esa soliqlar mavjud. Lekin tafovut juda katta. APLda oyiga 100 000 maosh olsang, senga 50 000 to‘lashadi. Xitoyda esa yuz foiz berishadi, soliqlar klub hisobidan».
Chin yurtiga Gyan 2015 yil yozida yo‘l olgandi. Hujumchining «Al-Ayn»dagi merganligidan hayratga tushgan «Shanxay SIPG» mutasaddilari yiliga 12 mln. yevro ish haqi belgilashdi.
To‘g‘ri, Asamoa Xitoyda amirlikdagi mahsuldorlikni ko‘rsata olmadi. Tez-tez yengil jarohatlarga yo‘liqib, 20ta uchrashuvda bor-yo‘g‘i 7ta gol urdi. Natijada yana BAAga qaytdi, ijara asosida 21 marta maydonga tushgan hujumchi 8ta gol muallifiga aylandi.
Shundan so‘ng manfaatli bitimlarga ega bo‘lmadi. Hujumchi hozirda Turkiyaning «Qaysarispor» klubi sharafini hmoya qilmoqda. Amaldagi shartnomasiga ko‘ra, Gyan har mavsum uchun 1,5 mln. yevro ish haqi olmoqda.
Biznes DAVOMI
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
