Endilikda Italiya xalqi Venturaning nomini unutmasligi tabiiy. Ushbu murabbiyni afsuslanish va alam bilan yodga olishadi.
Zero Jampyero nafaqat terma jamoani «jarlikka qulatdi», balki o‘zini noloyiq tarzda tutdi. Soccer.ru shu bahona ayni holatga tushgan mutaxassislarni yodga oldi.
GREM TEYLOR va Angliya termasi (1990 - 1993)
Ushbu mutaxassis klubdagi faoliyati orqali Angliya futbolida dong taratgan. U «Uotford»ni to‘rtinchi diviziondan chempionshipga, so‘ngra yevrokuboklarga olib chiqdi. Murakkab ahvoldagi «Aston Villa» joniga oro kirdi.
Grem umumiy hisobda tumanli o‘lka jamoalari boshqaruvida mingdan ortiq o‘yin o‘tkazgan, shubhasiz, hurmatga loyiq shaxs. Ammo klub miqyosida muvaffaqiyat qozongan hamma mutaxassislar ham milliy termani cho‘qqilarga yetaklab, yulduzlar bilan chiqisha olish salohiyatiga ega bo‘lavermaydilar. Umuman, Ventura va Teylorning taqdiri ko‘p jihatdan o‘xshash.
Qariya Grem Angliya milliy jamoasi bosh murabbiyligiga noloyiq chiqdi va bu haqiqat Yevro-1992 saralashidayoq ko‘zga tashlandi. «Uch sherlar» faqatgina turkiyalik autsayderlar ustidan qozonilgan g‘alaba hamda vaziyat taqozosi evaziga qit’a chempionatiga yo‘l olishgandi. Final bosqichida esa hammasi yaqqol namoyon bo‘ldi: g‘alaba yo‘q, bitta gol, guruhdagi so‘nggi o‘rin.
Shu zahoti o‘zgarish qilish talab etilardi, ammo Angliya futbol assosiasiyasi Teylorga ishonishda davom etdi va bu noto‘g‘ri qaror ekani tezda oydinlashdi.
Grem termaning bosh yulduzi Gari Lineker bilan chiqisholmadi, JCH-1994 saralashida inglizlar Gollandiya va Norvegiya termalaridan keyingi uchinchi o‘rin bilan cheklanishdi.
Bu esa Angliyaning AQSH mundialiga bormasligini anglatardi. 40 yillik davr mobaynida ilk bor jahon chempionati futbolga asos solgan mamlakat vakillarisiz o‘tdi.
Anatoliy Bishoves va Rossiya termasi (1998)
Futbolchilar milliy jamoa bosh murabbiyi Sadirinning o‘rnida aynan Bishoves ishlashi lozimligini ko‘p ta’kidlashgandi. Ushbu mutaxassis qo‘l ostida sobiq ittifoq jamoasi Seul Olimpiadasida zafar quchgan va bu muvaffaqiyat hali yoddan ko‘tarilmagandi.
Shu bois 1998 yili Rossiya termasi taqdiri aynan unga ishonib topshirildi. Biroq Anatoliy Fyodorovich yorqin xotiralarni tezda o‘chirib yubordi.
Bishoves - ruslar milliy jamoasi tarixidagi eng yomon murabbiy, uning qo‘l ostida terma olti o‘yinning barchasini yutqazdi. Haqiqatan omadsiz faoliyat.
Vaholanki, futbolchilar saviyasi past emasdi, Oleg Romansev qo‘l ostida vaziyatning ancha o‘nglangani ushbu fikrni tasdiqlashi mumkin. Hattoki, Yevro-2000 saralashini uchta mag‘lubiyat boshlagan rossiyaliklar mo‘’jiza yaratishga juda yaqin kelishgandi.
Berti Fogts va Shotlandiya termasi (2002 - 2004)
Germaniya termasidagi sakkiz yillik faoliyati davomida nemislarni Yevro-1996 g‘olibligiga olib kelgan mutaxassis keyinchalik obro‘sidan foydalangan holda faqat tekin daromad orttirish va katta summaga ega shartnomalar qidirish bilan band bo‘ldi.
Shotlandlar uni Quvayt termasidan chaqirib olish chog‘ida bularni inobatga olmay, tavakkalga qo‘l urishgandi. Yevro-2004 saralashida Fogts qo‘l ostidagi Shotlandiya termasi Litvaga yutqazib, Farer orollari bilan ochkolarni bo‘lishib olishdi.
Ikkinchi o‘ringa esa murabbiy vatandoshlarining yordami evaziga ko‘tarilishdi: qit’a birinchiligi yo‘llanmasini naqd qilib ulgurgan nemislar o‘sha kezlari hozirgidek nom qozonishga ulgurmagan islandlarni yirik hisobda yengishgandi.
Keyinchalik shotlandlar Gollandiya termasiga 0:6 hisobida imkoniyatni boy berishdi. Shunga qaramay, Berti «yog‘li joy»ni saqlab qoldi, zero o‘zi ketishni o‘ylamas, shartnomani bekor qilish qimmatga tushishi esa ish beruvchilarni o‘ylantirib qo‘ygandi.
Biroq JCH-2006 saralashi start olgan bir pallada yirik summa ham shotlandlar ko‘ziga ko‘rinmadi: salbiy natijalar qayd etilavergach, asablar dosh bermadi, Moldova bilan o‘yin-ning durang bilan xotima topishi esa sabr kosasiga so‘nggi tomchi vazifasini o‘tadi.
Fogts qo‘l ostida Shotlandiya termasi FIFA reytingida rekord darajada pastlab, 77-o‘rinni egalladi. Germaniyalik mutaxassis esa pinagini ham buzmay, navbatdagi jamoasi bilan Afrika kubogida so‘nggi 25 yildagi eng yomon natijani ko‘rsatish uchun Nigeriyaga yo‘l oldi. So‘ngra Ozarbayjondan foydali ish topgan Berti bir necha yilni shu mamlakatda o‘tkazdi.
Stiv Maklaren va Angliya termasi (2006 - 2007)
Jamoani jarlikka yetaklagan yana bir angliyalik. Yevro-2008 final bosqichi yo‘llanmasi uchun Rossiya termasi bilan bahs yuritgan inglizlar Stiv Maklaren boshqaruvida ikki marta Xorvatiyaga yutqazishdi.
Ayniqsa, «Uembli»da o‘tgan hal qiluvchi o‘yinda qayd etilgan mag‘lubiyat hammasidan oshib tushdi. Ishqibozlar milliy jamoani Yevropa chempionatiga olib chiqolmagani uchun Maklarenni kechirolmadilar.
O‘shanda angliyaliklar «shok» holatiga tushib qolishgandi. Shunga o‘xshash vaziyat hozir italyanlarda kuzatilmoqda.
Klaudio Ranyeri va Gresiya termasi (2014)
Ha, bu mutaxassis nomi «Lester» tarix kitobiga yozilgan, u ko‘plab muxlislar qahramoniga aylandi. Ammo 2014 yili Ranyeri butun boshli millat nafratiga duchor bo‘ldi.
Klaudio Gresiya termasini qabul qilib olgan payt Yevropa chempionatidagi shov-shuvli g‘alabaga o‘n yil to‘lgan, biroz avvalroq, ya’ni JCH-2014da yunonlar Fernandu Santush boshchiligida guruh bosqichidan chiqishni uddalab, faqatgina penaltilar seriyasidagi omadsizlik tufayligina chorak final yo‘llanmasini Kosta-Rikaga boy berishgandi.
Mustahkam jamoa, shubhasiz. Gresiyalik ishqibozlar tajribali Ranyerining termani o‘z darajasida ushlab turishiga ishonishgandi, ammo italiyalik mutaxassis qo‘l ostida sharmandali natijalar ko‘paydi: Ruminiya, Shimoliy Irlandiya hamda Farer orollaridan qabul qilingan mag‘lubiyatlar, Finlyandiya bilan durang.
E’tiborlisi, greklarning Ranyeri davrida boshlagan muvaffaqiyatsizligi hamon davom etmoqda: Yevro-2016 yunonlarsiz o‘tdi, ular Rossiya mundialida ham qatnashishmaydi.
Dik Advokat va Serbiya termasi (2014) DAVOMI
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
