Taniqli shoir, futbolning ashaddiy muxlisi Usmon Azim bir vaqtlar barchaga teng nur sochmagani uchun quyoshga «vigovor» e’lon qilgandi.
Shoir o‘sha she’riy bayonoti orqali aslida jamiyatdagi adolatsizliklarga qarshi isyonini ifodalagan, albatta. Holbuki, mintaqalar nuqtai nazaridan quyosh barchaga teng nur socholmasligi, bunga tabiiy imkon yo‘qligi barchaga, jumladan, shoirga ham ma’lum.
U kundek ravshan ma’lumotga boshqacha nigoh tashlayaptimi, demak, kosa tagida nimkosa bor...
Bir qator muxlislar O‘FFning Vadim Abramovga nisbatan chiqargan qaroriga munosabatimizni so‘rashganida, yuqoridagi mulohazalar ongu shuurimizda charx urdi. Shimoliy qutb ahli onda-sonda yuz ko‘rsatgani uchun quyoshdan o‘pkalashga haqlimi?
Yoki Afrika jazirama «siylov» uchun quyoshdan ranjisa, nima o‘zgaradi?! Hech narsa! Quyosh mangu ishida davom etadi, ya’ni Shimoliy qutbni mo‘l-ko‘l nurdan benasib aylab, yana va yana Afrika boshiga bemisl haroratini to‘kaveradi. Go‘yo adolatsizlikdek tuyuladigan bu tabiiy jarayon abadiy haqiqatdir.
Afrikaliklar qanchalar dod-voy solishmasin, quyosh Shimoliy qutbga ko‘proq nur sochmaydi. Eng to‘g‘ri yo‘l - shu bukilmas haqiqat qoshida bosh egish. Ishonchimiz komil, bu kabi e’tirozdan xoli haqiqatlarni Vadim Abramov ham yaxshi biladi.
Shunday ekan, qaror qabul qilinganidan so‘ng unga nisbatan norozilik bildirish, yumshoq aytganda, nomaqbul ishdir. «Ketingga tushsa, kekchayma!» deydi dono xalqimiz. Bu - «Gaping o‘tmadimi, so‘zing kesmadimi, jim tur, odob saqla, damingni chiqarma, chida!» degani.
Balki bu purma’no naql Vadim Karlenovichga noma’lumdir. Mayli, hechqisi yo‘q, asta-sekin o‘rganadi, ko‘nikadi. O‘rganmasa, ko‘nikmasa, tabiiyki, nomuayyan chetlatishning muddati cho‘zilaveradi. Tushunib turibmiz, mutaxassisning «Neftchi» muxlislari oldida yuzi shuvut.
U o‘zicha birinchi liganing ikkinchi jamoasini «pley-off»da yengish xayolida kelgusi mavsum rejalarini pishitayotgan pallada futbolimiz osmonida chaqmoq chaqnadi, go‘yo. O‘FFning oliy, ya’ni Superligada 12ta jamoa ishtirok etishi haqidagi qarori Vadim Abramovga yoqmadi, albatta
. Chunki u «Neftchi»ni oliy (super) ligada saqlab qololmagan murabbiy sifatida Farg‘ona futboli tarixiga kirdi. Hazm qilish alamli va qiyin achchiq tarix...
Ayniqsa, Vadim Abramov kabi taniqli mutaxassis uchun bu qaror taqdirning qaltis hazilidir. Bunday ko‘rgilikni qabul qilmaslik, e’tirof etmaslik yangi muammolarni keltirib chiqaradi va Vadim Abramov shunday jazoga duchor bo‘ldi.
Mutasaddi tashkilot qaroriga bo‘ysinish - ijrochilar uchun majburiy. Umummanfaat yo‘lida chiqarilgan qarorlarni muhokama etish va ma’qullamaslik hech qachon yaxshilikka olib kelmaydi. Faqat qudratli kuch sohibigina oqimga qarshi suzishi mumkin.
Vadim Abramov o‘zini shunday kuch o‘rnida ko‘rdi, chog‘i. Vaholanki, u birdaniga porlab, keyin so‘nib qolgan yulduzni eslatuvchi murabbiydek taassurot uyg‘otdi. Misol uchun, Osiyo kubogi-2011dan so‘ng sobiq olimpiyachilarimiz aynan Vadim Karlenovich rahbarligida 100 foizli imkoniyatni ko‘kka sovurishdi.
Keyinchalik bosh murabbiy ko‘rsatmasi bo‘yicha olingan sariq qartochkalar sabab, bosh jamoamiz jabrlandi. «Mirzo Ulug‘bek» tragediyasida ulug‘ bobokalonimiz aziz ayoli Feruzaga nisbatan «Seva-seva taloq qilaman!» deydi iztirob bilan. Bu - ilojsiz hollarda taslim bo‘lish lozimligini bildiruvchi foje xulosa.
Mirabror Usmonov izzat-hurmat ko‘rsatib, ikki jamoa taqdirini ham Vadim Abramovga ishonib topshirdi. Ikki minus harakat-natijadan keyin esa uning o‘zi murabbiyga chiqish eshiklarini ko‘rsatdi. Qisqasi, taqdir vaqtida Vadim Abramovni rosa siyladi va u buning uchun O‘FFdan minnatdor bo‘lsa arziydi.
Futbol federasiyasi yangi rahbariyati Vadim Abramov hurmatidan pishib yetilgan reja qarorini chetga surolmasdi. Mavsum avvalida eski rahbariyat tomonidan tasdiqlangan reglament esa bunday vaziyatda hech ma’no anglatmaydi.
Vadim Karlenovich shuni tushunsa, bas, olam guliston edi. U esa o‘zini ortiqcha haq sanab yuborgan va O‘FF yig‘ilishida ham vaziyatni o‘zgartirishga uringan, shekilli. Aks holda, bu tariqa keskin qaror chiqarilmasdi.
E’tibor bering, DAVOMI
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
