Diyego Simeone 7 yildirki, «Atletiko»da. U mudom jangga alohida shaylantirishga ehtiyoj sezadigan jamoani binoyidek boshqarib kelmoqda.
Argentinalik mutaxassis uchrashuvlar davomida sira tinmaydi - bor ovozi bilan baqirib, shogirdlarini o‘zi xos usulda quvvatlantiradi.
Ehtirosli murabbiy Fransiyaning L`Equipe nashriga bergan intervyusida aynan yurish-turishi, o‘zini tutishi haqida ham gapirdi.
«FUTBOLCHINING ENG YAXSHI HOLATI - QO‘RQUV»
- «Atletiko» yakshanba kuni o‘ynamasa, odatda vaqtni qanday o‘tkazasiz?
- Qizim va turmush o‘rtog‘im bilan Madrid tevaragidagi ajoyib bir joyga boramiz. Kunni imkon qadar maroqli o‘tkazishga intilaman, ammo futboldan butunlay forig‘ bo‘lishning iloji yo‘q.
Chunonchi, «Atletiko» o‘ynamagan taqdirda o‘g‘lim Italiyada maydonga tushishi mumkin (Jovanni - «Fiorentina» hujumchisi). Shuningdek, boshqa bir qator o‘ta ahamiyatli o‘yinlar bo‘ladi.
Shunday ekan, dam olish kunlari ham futbolni miyamdan chiqarib qo‘yolmayman. Yon daftarcham doim qo‘limda, axir aynan bo‘sh payt yangi g‘oyalar tug‘iladi.
- Demak, futboldan hamisha huzurlanasiz...
- Ha, futbol maydonini shu qadar yaxshi ko‘ramanki, asti qo‘yavering... Tabiiyki, g‘alabadan o‘zgacha quvonaman, o‘yin-oldi hayajon jonu dilim.
Ochig‘i, har bir uchrashuv arafasida qo‘rquvni his qilaman. O‘zim maydonga tushgan paytlar ham shunday edi. Xotirjamlik, ya’ni qo‘rquv yo‘qligi - o‘ta xavfli. Futbolchi uchun eng yaxshi ruhiy holat ham aynan qo‘rquvdir. U shundagina nimalarga qodirligini ko‘rsata oladi.
- Maydon chetida doimo «to‘lib-toshishingiz» mohiyati nima?
- Murabbiyning harakati o‘yinchilarga ham yuqadi. Agarda u tinchlanib qolsa, bilingki, o‘yin ritmi, jamoasini yo‘qotadi.
- Ammo tinmay baqirishingiz sabab, futbolchilar asabiylashishlari mumkin-ku.
- Mutlaqo nohaqsiz! Shaxsiy tushunchamga ko‘ra, maydon chetidagi faolligim yigitlarga ham yuqadi. Qaysidir futbolchi borini bermayotganini ko‘rsam, o‘zimni qo‘yarga joy topolmayman - ichimda nimadir yonadi. Axir uning sustligi tufayli butun jamoa jabrlanishi mumkin-da.
- Futbolchilik faoliyatingizda xuddi hozirgi holatingizga o‘xshash murabbiy bilan ishlashni xohlaganmidingiz?
- Har doim nimanidir o‘rgatishga qodir murabbiylar qo‘l ostida shug‘ullanishni istaganman. Eng yaxshi ustoz - eng talabchani. Insonning futbol va hayotda o‘zini tutishi o‘rtasida katta farq yo‘q.
Agar sen kundalik hayotda qat’iyatli, o‘ziga ishongan, haqiqiy jangchi bo‘lsang, maydonda ham shundayligingcha qolasan. Shuning uchun futbolchilarning insoniy fazilatlariga alohida e’tibor qarataman.
- Murabbiylik kasbini tanlashingizda aynan kim kuchli ta’sir o‘tkazgan yoki nima eng muhim turtki vazifasini bajargan?
- Eng muhim lahza - bu tug‘ilganim (kuladi). Jiddiy gapirsam, 26-27 yoshdayoq mashg‘ulotlarni qanday o‘tkazish kerakligini bilardim, miyamda o‘yinning aniq kartinasi shakllanib ulgurgandi. Xullas, diplom olishimdan oldin bu soha bo‘yicha ma’lum tushunchaga ega bo‘lganman.
Shuningdek, Ispaniya va Argentinada o‘ynash asnosida Bilardo, Basile, Byelsa, Eriksson kabi usta mutaxassislardan ta’lim oldim. Doimo o‘sish barobarida boshqalarga nimalarnidir o‘rgatishga intilardim. Umuman, futbolchilar bilan ishlash jarayonining o‘zi rohat bag‘ishlaydi.
Ko‘plab mamlakatlarda to‘p surdim va har bir o‘lka futboli ma’lum darajada ta’sir o‘tkazdi. Deylik, Argentina futboli sharofati bilan ehtirosli bo‘ldim, ispanlardan muomalani, italiyaliklardan taktikani o‘rgandim. Shu bois bo‘lsa kerak, jamoam turlicha o‘ynay oladi.
- Umuman, qaysi murabbiyning ta’siri kuchliroq bo‘ldi?
- Basile o‘z energiyasini o‘yinchilarga berishni bilardi. Byelsa - mashg‘ulot o‘tash bobida tengsiz. Bilardo - kutilmagan taktik yurishlar ustasi. U qanot himoyachisini markazda o‘ynanardi, hujumchini yarim himoyada.
- Murabbiylardan eshitgan qaysi maslahatni eng yaxshisi sifatida ko‘rsatasiz?
DAVOMI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
