Inqirozdan forig‘ bo‘lishga ulgurmagan nomdor jamoa hyech bo‘lmaganda yevrokuboklar hududidan joy olish uchun harakat qilmoqda. Ammo ko‘rilayotgan chora-tadbirlarning samarasi talab darajasida emas.
Shunday murakkab vaziyatda muxlisu-mutaxassislar jamoaning iqtidorli tarbiyalanuvchisi Patrik Kutronega umid qilishmoqda.
Yaqinda Jennaro Gattuzo o‘ziga xos topqirlik bilan yosh shogirdini mashhurlikning salbiy illatlaridan muhofaza qilishga urinib ko‘rdi:
«Biz Kutronega bosim o‘tkazmayapmiz. «Milan» tarkibida shuncha gol urishga ulgurgan eng yosh futbolchiga aylangani uning boshini aylantirib qo‘ymasligi lozim.
Buning uchun Patrik samarali to‘p surish bilan birgalikda hordiq chiqarishni ham o‘z joyiga qo‘ymog‘i darkor. Umid qilamanki, u maroqli dam olishda munosib hamroh bo‘la oladigan go‘zal va aqlli qayliqni tanlay oladi».
Mazkur e’tirofdan keyin «Milan»ning «Tvitter»i sohibjamol qizlar suratlari bilan to‘lib ketdi. Hozirda «rossoneri»ning asosiy umidi bo‘lib turgan yosh hujumchining shaxsiy hayoti hanuz shakllanmaganligi jamoa bosh murabbiyini jiddiy xavotirga solmoqda.
Patrik Kutrone «Milan»ning asosiy tarkibida ilk marta avvalgi mavsumda paydo bo‘ldi: so‘nggi tur arafasidagi «Bolonya»ga qarshi uchrashuvning ahamiyati unchalik muhim emasdi - jamoa yevrokuboklar hududidan joy olgani aniq bo‘lgach, Montella yosh hujumchiga besh daqiqa to‘p surish imkonini bergandi.
Bungacha bosh murabbiy tavakkalchilikka qo‘l urishga botina olmagandi. Oldingi ikki mavsumni Primaverada o‘tkazgan Patrik yuqori sermahsullikni namoyish etib, o‘rtacha har bir o‘yinda bittadan golni o‘z hisobiga yozib qo‘ygandi. Biroq «Milan» yozda «Portu»dan Andre Silvani xarid qildi.
Nikola Kalinichni esa keyinchalik sotib olish sharti bilan ijaraga oldi. Bir yo‘la ikki nafar markaziy hujumchining paydo bo‘lishi Kutrone uchun umuman imkoniyat qoldirmaydigan hukmdek edi.
Kim biladi deysiz, balki mutasaddilar ikki nafar o‘rtamiyonadan ko‘ra bir nafar yulduzni xarid qilganlarida, to‘g‘riroq bo‘larmidi? Oxir-oqibat, qishda Kalinichni Xitoyga sotib yuborishga urinishdi. Ammo futbolchi bunga rozi bo‘lmadi.
Silva esa «ishonchni oqlay olmadi» - «Milan» sport direktori Massimiliano Mirabellining fikri aynan shunday. Bundan tashqari, Kalinichning kelishuvi 22 avgustda rasmiylashtirildi, jamoa esa YELning saralash bellashuvlari bois mashg‘ulotlarni ancha barvaqt boshlab yuborgandi.
Italiyalik yosh iqtidor sohibi 3 avgust kuni maydonga tushish imkoniyatiga ega bo‘ldi va YELning saralash uchrashuvida gol urdi. U «A» seriyaning dastlabki turida ham o‘z nomini tabloga yozdirib qo‘ydi. Oradan 3 kun o‘tgach, YEL saralash bosqichining navbatdagi bahsida aynan Patrikning goli «Milan» g‘alabasini ta’minladi.
Yana 3 kundan keyin hujumchi «Kalyari»ga qarshi kechgan uchrashuvda hisobni ochdi. Biroq sentyabr oyida Montella Kalinichni yaxshi sport formasiga chiqdi, deb hisoblab, chempionat o‘yinlarida uni maydonga tushira boshladi. Silva bilan Kutrone esa kubok va YEL o‘yinlarida maydonga tushirildilar.
Shundan keyin Kutrone bir oyni golsiz o‘tkazdi, «Riyeka» darvozasi zabt etilgach, yana g‘oyib bo‘ldi. Chunki u muntazam ravishda maydonga tushmayotgandi.
Nihoyat, noyabrning oxirida mutasaddilar Montelladan voz kechishgach, voqealar rivoji keskin o‘zgarib ketdi. Chunki yangi bosh murabbiy Jennaro Gattuzo aynan Kutronega ko‘proq ishonch bildira boshladi. Albatta, birdaniga ko‘rsatkichlarni yaxshilashning iloji yo‘q edi.
Gattuzo esa mag‘lubiyatlar uning uchun pichoq tig‘idan ko‘ra kuchliroq azob ekanligini ro‘y-rost e’tirof etgandi. Aksiga olib, «Milan» so‘nggi pog‘onani band etib turgan «Benevento» bilan sulh tuzishga majbur bo‘ldi. Yana qay tarzda deng? «Milan» darvozasini raqib darvozaboni ishg‘ol etdi!
Lekin Patrik baribir maydonga tushish imkoniyatiga ega bo‘ldi. Jennaro Gattuzo rahbarligidagi ikki oy davomida 9 marta boshlang‘ich tarkibdan joy ola bildi va 7 marta raqiblarni gol bilan jazoladi.
Hozirda Kutroneni Filipo Inzagiga qiyoslash an’ana tusini olgan. Bu nafaqat xorijlik kasbdoshlarimiz, balki Luka Antoninidek futbol darg‘alarining e’tirofi. Bu borada Patrik «ofsayd» chizig‘ida samarali harakat qilishi, to‘pga birinchi teginish bilan raqib ta’qibidan qochib keta olishi bilan mashhur kasbdoshini eslatadi.
Uning uchun to‘pni raqib darvozasiga qay tariqa yo‘llashning farqi yo‘q: «Ludogores» darvozasini burchakdan uzatilgan to‘pni boshi bilan zarba berish orqali zabt etdi, SPAL ikki marta o‘ng oyoq bilan berilgan zarbani o‘tkazib yubordi, «Austriya»ga chap oyoq bilan, «Lasio»ga esa... qo‘l(!) bilan gol urdi.
Kutrone raqibni aldab o‘tishdan ko‘ra to‘pni bo‘sh hududga yo‘llash va raqiblar orasidan o‘tib, yana egallab olishni xush ko‘radi. Ochig‘i, yosh hujumchi bosh bilan zarba berish borasida maqtana olmaydi - yakkakurashlardagi samarali harakati 20 foizga teng.
Bu borada Kalinich undan ikki baravarga yaxshiroq ko‘rsatkichga ega. Italiyalik hujumchining asosiy ustunligi shundaki, uning sermahsulligi jamoaning o‘yin saviyasiga bog‘liq emas. 21 yoshgacha bo‘lgan mamlakat terma jamoasi tarkibida 5ta uchrashuvda 4ta gol urdi.
Patrik raqib himoyachilaridan qaytgan to‘plarni ilib olishda, ularning pozision xatolaridan unumli foydalanishda ajoyib mahoratga ega. Qisqasi, unda an’anaviy «to‘qqizlik»da bo‘ladigan barcha fazilat va kamchiliklar mavjud.
Lekin foydali ish koeffisiyenti o‘ta yuqori. «A» seriyadagi 5ta gol uchun atigi 13ta zarba sarfladi. YELdagi ko‘rsatkichi biroz kamtarinroq (19ta zarbadan 4ta gol) bo‘lsada, bu borada unga yaqinlasha oladigan mergan hozircha yo‘q.
Shuni qo‘shimcha qilish lozimki, 21 yoshgacha bo‘lgan futbolchilar orasida faqat Kilian Mbappe joriy mavsumda Patrikdan oldinda bormoqda: fransiyalik to‘purar 15ta gol uchun 33ta zarba ishlatgan, Kutrone esa 14ta golni 30ta zarbada amalga oshirgan. Vaholanki, bu italiyalik hujumchining debyut mavsumidagi natijasi.
Qolaversa, 4ta uchrashuvda 3ta gol ursa, Kiliandan o‘zib ketadi. Jamoaning kelajagini rejalashtirishda Massimiliano Mirabeli ehtiyotkorona ish tutmoqda: «Muntazam ravishda hukmronlik qilish va sovrinlarni qo‘lga kiritishning iloji yo‘q. Hozir yorqin g‘alabalar uchun mustahkam poydevor yaratishning ayni payti. Biz navqiron jamoani shakllantirdik».
Darhaqiqat, sport direktori vaziyatga to‘g‘ri baho bermoqda. Agar yozgi xaridlarni e’tiborga olmaydigan bo‘lsak, albatta. Biroq biz ikkinchi yoz fasliga tobora yaqinlashyapmiz - 30 yoshli Kalinich va Bonuchchining ishtiroki Jennaro Gattuzoning tobora yoshlarga ko‘proq ishonch bildirayotganiga soya sololmaydi.
Donnarumma, Romanyoli, Kalabria, KessYE, Kutrone 23ga, Chalxanoglu va Suso 25ga chiqib ulgurishmagan. Xullas, ko‘pchilikning hatto xayoliga ham kelmagan Jennaro Gattuzo «Milan»ni inqirozdan forig‘ qilishga yaqin turibdi. Bosh murabbiylik lavozimiga kelishi yanada salmoqliroq samara keltirishi ham mumkin.
Endi Mirabellidan «Gattuzo biz bilan yana 10 yil ishlasa, yo‘q demasdim» qabilidagi e’tiroflar yangraganida gap nimada ekanligi oydinlashadi. Sport direktori «Milan»ning ahil jamoaga aylanganidan mamnun. Gattuzo chindan ham pul emas, jamoa sha’ni uchun ishlayapti.
Uning maoshi o‘rinbosarlar jamoasidagidan (yiliga 120000 yevro) o‘zgargan emas. 20 yillik umrining 12 yilini «rossoneri» tizimida o‘tkazgan xaloskor Kutrone ham kamtarona ish haqi (250000 yevro) borasida e’tiroz bildirgan emas. Vaholanki, mahsuldorlik bobida Mbappe bilan yonma-yon ketmoqda.
To‘g‘ri, Gazzette dello Sport ma’lumotlariga ko‘ra, klub mutasaddilari yosh hujumchiga yangi shartnoma taklif etish ustida ish olib borishmoqda.
Maoshning oshirilishi xususida gap bo‘lishi mumkin emas. Murabbiy esa sermahsul shogirdiga aqlli, odobli «Milan» muxlisasi qayliq bo‘lishini tilamoqda.
Ma’lumot uchun
Patrik Kutrone
Yoshi: 20
Ampluasi: hujumchi
Bo‘yi: 183 sm., Vazni: 75 kg.
«Milan» tarkibidagi ishtiroki: 30ta o‘yin - 14ta gol.
2017|2018 yillar mavsumidagi maoshi: 250000 yevro.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
