2016 yil 28 may. Yevropa Chempionlar Ligasi finali. «Real» - «Atletiko». «Matraschilar»ning ishongan hujumchisi Antuan Grizmann 11 metrli nuqta yonida. Biroq uning zarbasidan so‘ng to‘p darvoza to‘siniga tegdi.
Yakunda «Atletiko» «shalpangquloq» kubokni boy berdi. Grizmann esa oradan ko‘p o‘tmay, yana bir yirik finalda mag‘lublik qismatiga ko‘ndi - Fransiya milliy jamoasi Yevro-2016ning hal qiluvchi bahsida Krishtianu Ronaldusiz qolgan portugallarga bas kelolmadi.
Alohida qayd etish kerak, Antuan joriy mavsumni ham ancha omadsiz boshladi va hattoki, o‘tkir tanqidlarga yuz tutdi. Muhimi, u xuddi qush qanot qoqqandek bir silkindiyu, yana avvalgidek xavfli hujumchi qiyofasiga kirdi.
Fransiya termasi vakili ayni payt o‘zini juda yaxshi his qilmoqda va muxlislar JCH-2018da haqiqiy Grizmanni ko‘rishlari xususida va’da bermoqda. Qisqasi, u Rossiyaga eng yaxshi sport formasi va ko‘tarinki kayfiyatda kelmoqchi.
Hujumchi L`Equipe nashri muxbirlari bilan suhbatlashar ekan, bu borada baralla gapirdi: «Maydonda doimo kulib to‘p suradigan o‘sha Antuan Grizmanni ko‘rishga shaylaning!».
- Boshida yoqimsizroq savol: Yevro-2016 finalida Portugaliya termasidan qabul qilingan mag‘lubiyat shaxsan sizga nechog‘li og‘ir botdi?
- Ochig‘i, birin-ketin 2ta finalni boy berish juda alamli: avvaliga CHLda g‘olib bo‘lish imkoniyatini qo‘ldan chiqardik, keyin Yevro-2016ning hal qiluvchi bahsida, boz ustiga, muxlislarimiz ko‘z o‘ngida ojiz qoldik.
Tushunarliki, bunday omadsizlikni xuddi dahshatli tushdek imkon qadar tezroq miyadan chiqarib tashlab, kelajakka qarash kerak. Biroq hammasi aytishga oson, amalda esa... O‘zimda sinab ko‘rdim, bu kabi mag‘lubiyatlar avvalo, ruhiy zarba hisoblanadi. Axir sovrin shundoq yoningda turganida, uni chetlab o‘tish osonmi?
Biz final yo‘lida qanchadan-qancha kuch sarflagandik, yakun esa... Deylik, Yevro-2016dan so‘ng butun hafta davomida final o‘yini haqida o‘yladim, miyamda uning vaziyatlari tinmay charx urdi. Shu asnoda mag‘lubiyat qanday yuzaga kelganini anglashga urindim.
Axir men bosh bilan 2ta gol urishim mumkin edi, keyin Jinyakning zarbasidan so‘ng to‘p darvoza ustuniga tegdi. Boz ustiga, avvalroq «Real»ga qarshi kechgan CHL finalida penaltidan foydalanolmagandim. Haligacha o‘sha zarbam va to‘sin ko‘z o‘ngimda. Bu men uchun bir umrlik dog‘...
- Umuman, oxirgi 2 yilda ham Fransiya termasini yetarlicha tanqid qilishdi. Tanqidlar adolatlimi?
- Yo‘q. Har holda, terma jamoamiz «Atletiko»ga nisbatan yaxshiroq o‘ynamoqda (kuladi). Albatta, hamma bizdan chiroyli futbol talab qiladi, axir terma jamoamiz tarkibida nomdor o‘yinchilar ko‘p.
Shunday ekan, muxlislar jamoamizdan doimo yanada ko‘prog‘ini kutishlari tabiiy hol. Lekin shaxsan men uchun asosiysi - natija. Futbol chiroyi esa ikkinchi masala hisoblanadi. «Atletiko»dagi o‘yinimga qarang: agar klubimiz 1:0 hisobida oldinga chiqib olgan bo‘lsa, orqada sof himoyachidek ter to‘kaman.
- Lekin amplua bo‘yicha hujumchi sanalasiz. Boshida bunday usulga ko‘nikishingiz qiyin kechgandir...
- Ha, hammasiga moslashishim uchun yarim yil ketdi. Mana, endi ushbu taktikani hattoki, yoqtirib qoldim. Hozirda himoyaviy harakatlardan shunchaki, zavq olaman. Ko‘nikib qolganim uchunmi, terma jamoada ham tez-tez orqaga o‘taman.
Bu borada murabbiylar hattoki, alohida ogohlantirishgacha borishdi: «Himoyaga qaytishda me’yorni ushla. Sening asosiy vazifang - oldinda shay turish». Biroq o‘z-o‘zidan tayanch zonasiga yordam berishga oshiqaveraman. Bu Simeonening kuchli ta’siri samarasidir.
- Yevro-2016da chempion bo‘lmadinglar, shunga qaramay, yanada tanildingiz. Mashhurlik xalaqit bermayaptimi?
- O‘zingizni katta e’tiborga tayyorlab bormasangiz, boshida rosa qiynalasiz. Turli fotosessiyalar, suratga olish jarayonlari... Gohida nima qilishni ham bilmay qolasiz. Lekin inson hammasiga ko‘nikish xususiyatiga ega.
Yaxshiyamki, maydon chetidagi ishlarim bilan opam (Mod Grizmann) shug‘ullanadi. Uning yordamisiz ancha qiynalishim turgan gap. Mana, jahon chempionatidan keyin ko‘plab homiylar bilan tuzilgan shartnomalar muddati tugaydi va yengilroq nafas olish imkoniyatiga ega bo‘laman (kuladi).
- Ha, oxirgi vaqtlarda shaxsiy ishlaringizni qarindoshlaringizga topshirib qo‘ydingiz. Xususan, opangiz va otangizga. Bu prinsipial ahamiyatga ega qarormi yoki...?
- Boshida barcha ishlarimni Erik Ola nazorat qilardi, biroq keyinchalik oramizdan qandaydir «mushuk yugurib o‘tdi» va hamkorlikni to‘xtatishdan o‘zga iloj qolmadi.
Shu lahzalarda oilaviy ko‘makka ehtiyoj sezdim. Zero, yaqinlarimga to‘liq ishonaman. Ular darhaqiqat, avvalo, mening manfaatimni o‘ylashadi.
- Ayni payt birgina futbol bilan cheklanib qolmayapsiz. Misol uchun, Lego Batman filmi qahramoni - Supermenga ovoz berdingiz. Shunday tig‘iz pallalarda ortiqcha yuklama olish shartmi?
- Ochig‘i, kino sohasida aytarli tushunchaga ega emasdim. Kinoloyihaga taklif etishganida esa, dabdurustdan ijobiy javob berdim: «Bu zo‘r-ku, roziman, albatta!» Chunki tabiatan yangiliklarga o‘chman.
Qolaversa, kino olami juda qiziqarli. Mana, ovoz berish jarayonida bevosita qatnashish orqali bu borada muayyan tajriba hosil qildim.
- JCH-2018 siz uchun ikkinchi mundial hisoblanadi. Tushunarliki, Rossiyada Grizmanndan ko‘p narsa kutishadi. Har holda, Braziliya-2014dagiga nisbatan yaxshiroq o‘ynashingiz talab etiladi.
- Mas’uliyat hamisha bosim yuklaydi. Lekin futbolchi umumiy munosabat va chetdan yangraydigan fikrlarga yengilroq qarashi kerak. Demoqchimanki, avvalo, futboldan shunchaki, zavq olishga urinsangiz, harakatlaringiz o‘z-o‘zidan yaxshi chiqaveradi.
Bordiyu, miyangizni turli xayollardan tozalay olmasangiz, unda hech vaqoga erisholmaysiz. Va’da beraman: Rossiyada hamma doimo yuzida tabassum bilan to‘p suruvchi o‘sha Grizmanni ko‘radi.
- Hozir bor e’tiboringiz bo‘lajak mundialga qaratilgan bo‘lsa kerak...
- Ha, maydonda aslida nimalarga qodirligimni to‘la-to‘kis namoyish etmoqchiman! Tayyorgarlikka kelsak, mashg‘ulotlardan so‘ng tiklanish muo-lajalariga ko‘proq vaqt ajratyapman, xususan, massajchi bilan kuchaytirilgan reja asosida ishlayapman. Zero, jahon chempionatigacha eng yaxshi sport formasiga kirishim shart.
- Fransiya terma jamoasini turnir favoriti sifatida tilga olish mumkinmi?
- Umid qilamanki, biz favorit ekanligimizni amalda ko‘rsatamiz. Hozircha hamma Germaniya, Ispaniya, Argentina va Braziliya terma jamoalarini asosiy favoritlar qatoriga qo‘shaversin. Shuningdek, bo‘lajak jahon chempionatida «syurpriz»larga guvoh bo‘lishimiz ham tayin. Bunga shubha qilmang.
- Bunday yirik forumlar odatda transferlar bozoriga katta ta’sir qiladi. Ayting-chi, Rossiyaga yo‘l olishdan oldin «Atletiko»dagi kelajagingizga oydinlik kiritish masalasi siz uchun nechog‘li muhim?
- Klubda qolish yoki qolmasligimni mundial startigacha hal qilamiz, albatta. Chunonchi, ortiqcha o‘y-xayollar turnir davomida xalaqit berishini aslo xohlamayman.
Agar keyingi taqdirim mavhumligicha qolsa, xotirjam to‘p surolmasligim mumkin. Chunki duch kelgan kishi savolga tutadi: «Falon klubga o‘tish variantiga qanday qaraysan? Bunisiga nima deysan?» Qolaversa, matbuot ham jim turmaydi - turfa xil xabarlarni tarqataveradi...
- Yevro-2016da eng yaxshi to‘purar bo‘lgandingiz. Xo‘sh, JCH-2018da o‘sha vaqtdagidan ham kuchliroq o‘ynay olasizmi?
- Harakat bor. Shunisi aniqqi, mundialga tajribaliroq futbolchi sifatida boraman.
- O‘yin sifati masalasida-chi?
- Bilmadim. Lekin tajriba muayyan vaziyatlarda sifatni oshirishga imkon bersa kerak. Hozircha faqat bir gapni dangal aytaman: Grizmann Rossiyaga eng yaxshi holatda yo‘l oladi.
- Demak, hozir eng yuqori sport formasidasiz, ammo mavsum boshida bunday emasdi...
- Tushunarliki, yozgi bayonotim («Manchester Yunayted»ga o‘tishi ehtimoli haqida) va unga bog‘liq voqealardan keyin faqat futbolga e’tibor qaratishim qiyin bo‘ldi. Umuman, zo‘r ishtiyoqda o‘ynay olmadim. Keyin mavsumoldi yig‘inlarida binoyidek ishladim, ammo...
Deylik, nazorat o‘yinlarida negadir golsizlikka uchradim. hattoki, mashg‘ulotlarga kelishim bilan mendan qachon gol urishim haqida so‘raydigan bo‘lim qolishdi. Mavsum boshlangach esa, «Jirona»ga qarshi uchrashuvda qizil kartochka oldim.
Aslida hakam menga nisbatan qoida buzilganini ko‘rib, penalti belgilashga chog‘langan edi, biroq nima bo‘ldiyu, fikrini o‘zgartirdi (referi hujumchiga avvaliga simulyasiya uchun sariq, keyin haqoratlagani tufayli darhol qizil kartochka ko‘rsatgandi).
Shu holat ham salbiy ta’sir qildi. Qisqasi, ma’lum muddat faqat milliy jamoada ko‘tarinki ruhda o‘ynadim, chunki termada hech kim bosim o‘tkazmasdi.
- Xususan, Bolgariya (1:0) va Belarus (2:1) terma jamoalariga qarshi bahslarda muhim gollarga mualliflik qilganingizdan qanchalik ilhomlandingiz?
- O‘zi aynan termada o‘zimga mutlaqo ishonib to‘p suraman - zarur payt gol ura olishimni bilaman. Zero, jamoada alohida muhit shakllangan va futbolchi o‘yindan chinakamiga bahra oladi. Oddiy aytganda, birov ortingizdan pichirlamaydi.
- Xo‘sh, joriy mavsumdagi qaysi lahza burilish nuqtasiga aylandiyu, «qora» kunlarga barham berdingiz?
- Inqiroz holatidan chiqib ketishimda avvalo, milliy jamoa murabbiylarining menga ishonishda davom etishgani muhim rol o‘ynadi.
Bundan tashqari, «Atletiko»da ham ishlar o‘nglandi va Diyego Simeone xohlaganimdek harakatlanishimga to‘sqinlik qilmadi. Yanvarda esa Diyego Kosta safimizga qaytdi. Muhimi, u bilan birga o‘ynashda alohida yengillik sezdim.
- «Sevilya» darvozasiga 3ta, «Leganes»nikiga 4ta gol... Oxirgi 10ta o‘yinda 11ta gol! Bunday samaradorlikni davom ettira olasizmi?
- Yuqori maromni saqlab qolish juda qiyin, to‘xtamasdan barqaror gol urish faqat Ronaldu va Messiga xos. Muhimi, hozirgi o‘yinimdan xursandman.
To‘g‘ri, gohida shunday o‘yin-lar bo‘ladiki, eng oddiy vaziyatlarda ham to‘pni yo‘qotaverasan, uni bo‘ysundirolmaysan. Demoqchimanki, o‘yinimga bog‘liq minus jihatlarni yaxshi bilaman. Shunday ekan, ular ustida ishlashim kerak.
- Misol uchun...
- O‘yinga kirishib ketishim qiyin, boshida hattoki, ketma-ket 3-4 marta xatoga yo‘l qo‘yishim mumkin. Shuningdek, ba’zan to‘g‘ri pozisiya tanlamaslik oqibatida zo‘r uzatmani ko‘kka sovuraman.
- Ronaldu va Messi anchadan buyon «Oltin to‘p»ga da’vogarlar ro‘yxatining oldingi ikki qatoridan joy olishmoqda. Siz esa bir yil ichida 3-o‘rindan 18-pog‘onaga tushdingiz. Bunchalik «qulash» og‘ir emasmi?
- Yo‘q, harqalay, bilinmadi. Jiddiy gapirsam, avvalgi mavsumda o‘zimni ko‘rsatolmadim. Shunday ekan, ranjishga asosim yo‘q.
- Lekin «Oltin to‘p» - futboldagi bosh maqsadingiz, shundaymi?
- Yana yo‘q. Asosiylari 2ta - jahon chempionati va CHLda g‘olib chiqish. «Oltin to‘p»ni esa navbatim kelsa, qo‘lga olarman. Tabiatan xudbinlikni yoqtirmayman, doimo jamoa manfaatini birinchi o‘ringa qo‘yaman. Individual ko‘rsatkichlar - ikkinchi masala.
Tan olaman, Yevropa chempionati bosh to‘purari maqomini olganim o‘zgacha hissiyot uyg‘otdi. Axir bu haqda 10 yildan keyin ham gapirishlari mumkin. Lekin men to‘purar bo‘lmasam ham, jamoamiz Yevropa chempioniga aylanganida, yaxshiroq edi...
Ma’lumot uchun
ANTUAN GRIZMANN
Tug‘ilgan sanasi va manzili: 1991 yil 21 mart, Makon (Fransiya)
Amplua bo‘yicha: hujumchi, «Makon» va «Real Sosyedad» klublari tar-biyalanuvchisi
O‘ynagan jamoalari: «Real Sosyedad» - 2009-2014; «Atletiko» - 2014-...
Yutuqlari: Ispaniya superkubogi sohibi - 2014; yoshlar o‘rtasida (U-19) Yevropa chempioni - 2010; YECHL finalchisi - 2016; Yevropa vise-chempioni - 2016
Fransiya terma jamoasidagi statistikasi: 51ta o‘yin, 19ta gol
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
