Bugun 15 may kuni O‘zbekiston futbol assosiasiyasining sun’iy qoplamali maydonlarida umumta’lim maktablarining 2009 yilda tug‘ilgan o‘g‘il bolalar hamda 2007 yilda tug‘ilgan o‘quvchi qizlar o‘rtasida OFKning “Ommaviy bolalar futboli kuni”ga bag‘ishlangan festival bo‘lib o‘tdi.
Festival davomida yosh ishtirokchilar maydonda o‘zlarining mahoratlarini namoyish etdilar. Ishtirokchilar guruhlarga bo‘linib, har bir guruhga alohida murabbiy tayinlandi. So‘ngra har bir guruh o‘ziga ajratilgan maxsus jihozlangan joylarga borib, murabbiylari bilan birgalikda estafeta, to‘p muomalasi, to‘pni qo‘lda o‘ynash, yugurish hamda to‘p nazorati bo‘yicha mashg‘ulotlar o‘tkazishdi.
Futbol festivali davomida murabbiylar ishtirokchilarni futbolning sir-asrorlari bilan tanishtirishdi.
Qayd etish zarurki, bunday tadbirlar yosh sportchilarga katta sportga o‘zlarining ilk qadamlarini qo‘yishlariga hamda bo‘lajak musobaqalarga tayyorlanishlariga katta yordam beradi.
Tadbir so‘ngida ishtrokchilar sertifikatlar bilan taqdirlandilar.
“Futbol do‘stlik uchun” loyihasi doirasida butun dunyo bo‘ylab “Futbol va do‘stlik” kuni nishonlanayotgani haqida avval xabar berib o‘tgandik. Butun dunyo bolalari va ularning ota-onalari ushbu bayram munosabati bilan o‘tkaziladigan futbol bilan bog‘liq turli tadbirlarda qatnashyaptilar.
Toshkentda “Futbol va do‘stlik” kuni OFKning “Bolalar ommaviy futboli kuni”ga bag‘ishlangan futbol festivali doirasida o‘tkazildi.
Ushbu futbol festivalida “Futbol do‘stlik uchun – 2018” dasturining O‘zbekistondagi yosh elchilari — “Bundyokor” futbol maktabining o‘quvchisi, darvozabon Muslim Abdumannopov hamda yosh jurnalist Mardon Ma’rupov ishtirok etdilar.
Tadbir so‘nggida yosh elchi hamda jurnalist festival davomida tanishgan ko‘plab do‘stlarining hamda O‘zbekiston milliy terma jamoasining sobiq a’zolari Zayniddin Tojiyev va Eldar Magdeevning qo‘llariga do‘stlik bog‘ichlarini taqib qo‘ydilar.
Eslatib o‘tish joizki, “Futbol do‘stlik uchun” bolalar ijtimoiy loyihasi “Gazprom”ning “Gazprom - bolalarga” dasturi doirasida tashkillashtiriladi. Ushbu loyihaning maqsadi – bolalar futbolini rivojlantirish, bag‘rikenglik tuyg‘usini shakllantirish, turli mamlakat yoshlari o‘rtasida do‘stlik o‘rnatishdir. Ishtirokchilar targ‘ib qiladigan asosiy qadriyatlar – do‘stlik, tenglik, adolat, sihat-salomatlik, tinchlik, sadoqat, g‘alaba va urf-odatlardir.