Yozgi ta’tilga chiqqan bolalar oromgohlarda maroq bilan dam olishmoqda. O‘zbekiston futbol assosiasiya va uning Farg‘ona viloyati bo‘limi hamda kasaba uyushmalari xamkorligida davom etgayotgan “Yoz - o‘tmoqda soz” futbol turniri qizg‘in ravishda bo‘lib o‘tmoqda.
Maktab o‘quvchilari o‘rtasida sog‘lom turmush tarzini targ‘ib etish, futbolni ommaviylashtirish hamda ularning bo‘sh vaqtlarini sport bilan oshno tarzda o‘tkazish maqsadida o‘tkazilinayotgan navbatdagi futbol musobaqasi Farg‘ona tumani “Yoshlarobod” qishlog‘ida joylashgan “Chaqmoq” oromgohida o‘tkazildi.
Umuman olganda, mazkur oromgohda o‘tkazilgan musobaqa boshqalaridan ancha farq qildi. Shu kunlarda oromgohda spartakiada sport o‘yinlari davom etayotganligi bilan bir qatorda, bolalar O‘FAning yozgi turnirini ham yuqori kayfiyatda o‘tkazishdi.
9-10 yoshli bolalar o‘rtasida o‘tkazilgan bellashuvlarda 2- o‘rinni 5-guruh bolalari qo‘lga kiritishdi. Chempionlik esa 7-guruhga nasib etdi. Navbatdagi bosqichda 13-14 yoshli maktab o‘quvchilari bellashdilar. Faxrli birinchi o‘rin 1- guruh yoshlariga nasib etdi.
Bahslar yakunlangach, takdirlash marosimi o‘tkazildi. Bolajonlarga kimmatbaho sovg‘alarni viloyat futbol assosiasiyasi birinchi vise-prezidenti Rasuljon Yuldashev tantanali ravishda topshirdi. Shu kabi musobaqalar boshqa oromgohlarda ham davom etmoqda.