Avvalroq FIFA Toshkentning “Bunyodkor” futbol klubini 6 ochkodan mahrum qilgani haqida xabar bergandik. Stadion.uz O‘zPFL manbasiga asosan FIFAning “Bunyodkor”ga qo‘llagan sanksiyasi sabablarini ma’lum qiladi.
Dastlab, “Bunyodkor” ukrainalik futbolchi Sergey Simonenko oldidagi qarzdorlik masalasini shu vaqtgacha ochiq qoldirgan. Aynan mana shu sabab “Bunyodkor” joriy mavsum to‘plagan 6 ochkodan mahrum qilindi va o‘z-o‘zidan Namanganning “Navbahor” klubi Superliga-2018 musobaqasida bronza medallariga ega chiqdi.
“PFL bu boradagi talabi bajarilgani yuzasidan O‘zbekiston futbol assosiasiyasiga bildirishnoma taqdim etadi. O‘z navbatida O‘FA bu haqda Xalqaro futbol uyushmasi FIFAni xabardor qiladi. Professional futbol ligasi o‘z musobaqasida ishtirok etuvchi “Bunyodkor” klubini oxirigacha himoya qilishga qaror qildi. Aslida FIFA talabi shu yilning sentyabr oyidayoq bajarilishi shart bo‘lsa-da, PFL vaziyatni to‘g‘rilash uchun “Bunyodkor”ga ikki oyga yaqin vaqt berdi. Biroq Toshkent jamoasi bu ishni yopa olmadi.
Sergey Simonenko 2015 yilgi mavsumning birinchi davrasida “Bunyodkor” sharafini himoya qilgan. Ammo u O‘zbekistonni tark etgan vaqtda ham klub futbolchi bilan to‘liq-hisob qilmagan. Keyinroq ukrainalik futbolchi FIFAga shikoyat arizasi yozgach, “Bunyodkor” ikki marta — 2016 va 2017 yillarda Sergey Simonenko uchun O‘zbekiston banki orqali ochilgan plastik kartaga ma’lum miqdorda pul tushirgan. Biroq bu pullar futbolchiga qadar yetib bormagan.
“Bunyodkor” iddaosiga ko‘ra, o‘sha plastik karta ichida Simonenkoning pullari turibdi. Istasa, futbolchi Toshkentga kelib, uni olib ketishi mumkin. Yo‘qsa, o‘zining ishonchli vakilini yuridik kuchga ega bo‘lgan ishonchnoma bilan jo‘natishi kerak. Jamoaning o‘zi futbolchi uchun ochilgan plastik karta ishiga aralasha olmaydi. “Bunyodkor” va Simonenko bu borada bir yechimga kela olmadi. Masalaning hal bo‘lishi FIFA uchun ham, PFL uchun ham muhim. Biroq fakt shuki, FIFA tomonidan aybdor deb topilgan “Bunyodkor” vaziyatni yumshata olmadi.
Qolgan davr davomida PFL “Bunyodkor”ni himoya qila olmaydi. Birinchidan, chempionat yakuniga 2 ta tur qoldi. Ikkinchidan, O‘zbekiston futbol assosiasiyasi FIFA oldidagi majburiyatlarini bajarishi shart”, deyiladi O‘zPFL xabarida.
Ma’lumot o‘rnida, PFL komissiyasi ayni vaqtda futbol klublarini 2019 yilgi mavsum uchun lisenziyalash tizimi aks etgan reglament ishini deyarli yakunladi. Unga ko‘ra, 2019 yilgi mavsumda legioner futbolchilar xizmatidan foydalanadigan futbol klublari mana shu futbolchilar bilan hisob-kitobni O‘zbekiston so‘mida emas, o‘zaro kelishilgan xorijiy valyutada amalga oshiradi.
Shuningdek, legioner futbolchilar uchun qo‘yilgan talablar ham ancha yuqori bo‘lib, bunga qadar legionerlar bilan ishlash masalasida qator kamchiliklarga yo‘l qo‘ygan futbol klublariga nisbatan sanksiyalar qo‘llaniladi va ular legioner futbolchi xizmatidan foydalana olmaydi. Qo‘shimchasiga, stadioni, bazasi, futbol akademiyasi talab darajasida bo‘lmagan jamoalar ham legionerlar bilan shartnoma imzolash huquqidan mahrum qilinadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
