Uning bolaligi Amazonka changalzorlari bilan qo‘shni bo‘lgan shaharda o‘tdi, irodasi orzusidagi jamoa - «Barselona»dan minglab chaqirim uzoqlikda toblandi. Natijada u chinakam jangchi bo‘lib voyaga yetdi. Nihoyat, gal o‘z mahoratini namoyish etishga kelganida, kataloniyaliklar uning yo‘liga naqd 30 mln. yevrolik «poyondoz» to‘shab kutib olishdi. U esa bu hurmatga sermazmun o‘yin bilan javob qaytarishga kirishdi. «Futbol» nashri Xavi hamda Inyestadek afsonalarning munosib vorisi - braziliyalik Artur Melo haqida hikoya qiladi.
«Goyas»dagi ilk Qadamlar
2009 yil. Xosep Gvardiolaning «Barselona»si fantastik o‘yinlari bilan o‘z hukmronligini o‘rnatgan davr. Bu yoqda jamoa 6 imkoniyatni 6ta nufuzli sovringa aylantirgan paytda undan 5000 km. olisda bo‘lgan ashaddiy muxlisi «Goyas» o‘smirlari o‘rtasida dong taratib ulgurgandi. 13 yoshli vunderkind qalbini Xavi va Inyesta o‘yinlari zabt etgan, tez orada o‘zi ham ulardek to‘p surishga va’da bergandi. Arturni 4 yoshli paytida otasi klub akademiyasiga olib kelgandi. Barcha yosh toifalaridan muvaffaqiyatli o‘tgan Melo yoshlar jamoasidagi ikki yillik faoliyatdan so‘ng asosiy tarkibga o‘tish tadorigida edi. Biroq ayni o‘sha pallada Portu-Alegridan tashrif buyurgan Junior Shavar yosh iqtidor sohibining taqdirini tubdan o‘zgartirib yubordi. Bu mutaxassis «Gremio» va «San Paulu» klublarining skauti bo‘lgani bois, turnirlardan birida Arturni ko‘z ostiga olib qo‘ygandi. Taklif ham uzoq kuttirmadi. Melo esa janub jamoasini tanladi.
«Gremio»dagi yuksalish davri
«U juda intizomli va yoshiga xos bo‘lmagan darajada aqlli, fikrlashi asl professionalnikidan qolishmaydi. Ishonavering, tez orada u klub tarixidagi eng yaxshi futbolchi maqomiga erishadi» - «Gremio» rahbariyatini ishontira olgan Shavar shartnoma imzolanganidan keyin ham Meloga bo‘lgan e’tiborini susaytirmadi va debyutantning yangi jamoaga tezroq moslashishi uchun maxsus dastur yaratishga kirishdi. Tengdoshlari orasida «Goyyayense» taxallusi bilan tanilgan Arturga chindan ham oson bo‘lmadi. Ammo skaut ham u bilan shug‘ullanishni bo‘shashtirmadi: «Meloning «Gremio»dagi faoliyati va unga yaratilgan shart-sharoitlarni shaxsan o‘zim nazorat qildim, ovqatlanish tartibidan tortib, jismoniy va ruhiy holatigacha muntazam kuzatuvda bo‘ldi. Biz o‘ta murakkab jarayonni bosib o‘tdik va oxir-oqibat chinakam javohirga ega chiqdik. «Goyaslik» - metin iroda sohibi, o‘z vazifasiga mas’uliyat bilan yondashadi. Chinakam professional bo‘lishiga u hech qachon shubha qilmagan. Ana shu tirishqoqligi Arturni akademiyaning eng sara tarbiyalanuvchilari safiga olib chiqdi».
Futbolchining asosiy tarkibdagi debyuti 2015 yilning yanvarida amalga oshdi. O‘z uyidagi mundialda 4-o‘rin bilan kifoyalangan «pentakampeonlar»ni tark etgan va «mushketyorlar» boshqaruvini qo‘lga olgan Luis Felipe Skolari yosh shogirdiga bir necha daqiqa to‘p surish imkonini berdi. Shundan keyin debyutantning faolligi tobora oshib bordi: 2017 yilda «Gremio» Libertadores kubogini qo‘lga kiritdi, 20ga chiqib ulgurmagan Melo esa musobaqaning eng foydali o‘yinchisi sifatida e’tirof etildi.
Hayotga chanQoQ fermer
Yashil maydon tashqarisida Artur jiddiylik niqobini yechib, xushchaqchaq va yoqimtoy yigitchaga aylanadi, kameralarga tabassum bilan nigoh tashlaydi, dastxat va intervyu berishdan erinmaydi. Bir qarashda uni o‘zi yaratayotgan mo‘’jizaga ertak yoki lazzatli tush sifatida qarayotgan xayolparastga qiyoslash mumkin.
Futbolchi Kataloniya poytaxtiga ko‘chib o‘tganidan keyin tez orada onasi va akasi Paulo Enrikelar ham yetib kelishdi. Shuningdek, braziliyalik legioner Yevropaga bir nechta mushuk va kuchuklarini ham olib keldi. Braziliyada butun bir fermasi qolib ketganini aytganida, «Barselona» tasvirga olish guruhi a’zolarining hayrati yanada oshdi. Boshqa jonivorlardan tashqari, Goyaniyada poni tulpori va shoxdor qo‘chqori ham bor. «Bolaligimda ota-onam bilan fermaga borar va kunni jonivorlar yonida o‘tkazardim. Hatto ovqatlanib olishga ham vaqtimni qizg‘onardim», - deydi Artur.
O‘zining bo‘sh vaqtlarini Melo qandaydir bazmlar yoki tungi klublarda emas, oila davrasida o‘tkazadi. «Kompyuter o‘yinlari va film tomoshasini xush ko‘raman. Boshqa sport turlari - tennis, basketbol, ping-pong ham jonu-dilim», - deydi u. Mavzu jonajon Goyaniyaga ko‘chganida esa, Arturning yuzida sog‘inch alomatlari paydo bo‘ladi. Bu osuda go‘shada 1 mln.ga yaqin aholi yashaydi. Shaharda sayyohlar e’tiborini tortadigan inshootlar yo‘q. U «Sertaneju» musiqiy yo‘nalishi bilan nom qozongan. Jumladan, qahramonimiz Felipe Araujuning muxlisi, xonandaning yangi qo‘shiqlarini o‘tkazib yubormaydi.
«Kumirlar» e’tirofi
2018 yilning 28 aprelida Andres Inyesta maxsus matbuot anjumani tashkil etib, «Barselona»dagi faoliyatini yakunlaganini ma’lum qildi. Klub mutasaddilari esa uning o‘rnini to‘ldirish masalasini hal qilib ulgurishgan, ya’ni Artur Meloga ishonch bildirishgandi. Lionel Messi esa mavsumoldi yig‘inlari paytida bo‘lajak jamoadoshi sha’niga iliq fikrlarni bildirgandi: «Artur menda iliq taassurot qoldirdi. U jamoani kuchaytira oladi». Argentinalik daho haq: 22 yoshli yarim himoyachi ajoyib uzatmalar ustasi, aniqlik borasidagi ko‘rsatkichlari Inyestanikiga juda yaqin. Artur - himoya va hujum chiziqlari o‘rtasidagi muhim ijrochi. «Barselona»ga kelishidan avval «Gremio»ning barcha hujumlari u orqali tashkil etilardi. Bundan tashqari, Melo pressing uyushtirish chog‘ida jamoadoshlari xatolarini tuzatishni ham o‘rniga qo‘yadi. O‘z vaqtida Xavi bu vazifani a’lo darajada uddalardi. To‘g‘ri, ispaniyalik afsona jismoniy ko‘rsatkichlar bo‘yicha maqtana olmasdi. Hozirda «Al-Sadd» sharafini himoya qilayotgan yarim himoyachi Kataloniya radiosi orqali braziliyalik o‘rindoshiga shunday ta’rif berdi: «U menga juda o‘xshaydi, Artur siymosida o‘zimni ko‘rgandek bo‘laman. Uning maydondagi fikrlashi, aniq qarorlar qabul qilishi lol qoldiradi. U yetuk, aqlli futbolchini eslatadi, ulkan salohiyat sohibi».
«Barsa»ning tarixiy zafari bilan yakunlangan oxirgi «klasiko»dan keyin Transfermarkt yangi ma’lumotlarni e’lon qildi. Jumladan, Artur Meloning bahosi 50 mln. yevroga yetgani ma’lum bo‘ldi. Bu faqat boshlanishi, albatta. Lekin debyut mavsumning o‘zida narxning 20 mln.ga qimmatlashgani bejiz emas. Xullas, Kataloniyaga ortiqcha shov-shuvlarsiz, ohista kirib kelgan futbolchi uzoq yillar davomida bosh rollar ijrochisi bo‘lishi mumkin.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
