Kecha tunda bo‘lib o‘tgan uchrashuv ko‘pchilikda ikki xil taassurot uyg‘otgan bo‘lsa, ajab emas. Bugun ushbu uchrashuvni tahlil qilishga urinib ko‘ramiz.
Simeone tanlagan taktika
«Atletiko Madrid» juda kam holatlarda ochiq futbol o‘ynaydi. Simeone shogirdlari himoyada bexato o‘ynab, o‘z imkoniyatlari va raqib xatosini kutadi. Mana bir necha yildirki, kerakli natijaga erishib kelmoqda. Kecha Simeone o‘z shogirdlarini 3 ta vazifa bilan maydonga tushirdi. Pozision hujumga o‘tmaslik, raqibni maydon markazida katta kuch bilan kutib olish, standartlardan maksimal darajada foydalanish. Ajablanarlisi shundaki, «matraschilar» bu ko‘rsatmani to‘liq bajarishdi. «Real Madrid»ga qarshi kechgan uchrashuvdan farqli o‘laroq jamoa tarkibda va taktikada kutilmagan o‘zgarishni amalga oshirdi. Bu uchrashuvda «Atletiko» raqibini to‘liq maydon markazida kutib oldi. Godin hatto Ronalduni «Yuve» maydonchasigacha bir necha bor ta’qib qilib bordi. «Atletiko» o‘z uslubidagi himoyadan pozision hujumga chiqishdan butunlay voz kechdi va o‘yin tizginini boshqa tomonga burib yubordi. Uchrashuv mobaynida Simeone shogirdlari chuqur himoyalanishmadi. Raqibni maydon markazida katta kuch bilan kutib olishgani uchun bunga hojat qolmagan edi. Aynan shu uslubga tayangan holda uyushtirilgan qarshi hujumni eslang. Agar Kosta o‘sha zarbani golga aylantira olganida, uchrashuvda yana ham yirikroq hisob qayd etilgan bo‘larmidi?
«Yuventus»
Allegri ushbu uchrashuv uchun klassik 4-3-3 taktikasini tanladi va Simeonega o‘yinni boy berdi. Allegri raqib hujumlarini buzishi uchun maydonga tushirgan Bentankur va Matyuydi deyarli o‘yinga qo‘shilishmadi. Sababi «Atletiko» pozision hujumga o‘tmadi va hujumni markazdan uyushtirmadi. Allegri ushbu uchrashuvda taktika ustasi bo‘lsa-da, Simeonening tuzog‘iga tushdi. O‘yin mobaynida «Yuve» hujumchilari maydon markazida o‘ynashga majbur bo‘lishdi.
Bu esa o‘z navbatida tezkor qarshi hujum uyushtirish uchun «keksa sinyora»ga imkon bermadi. Italiya "A" seriyasida chuqur hujumda o‘ynaydigan Manjukich "Metropolitano" stadionida markaziy yarim himoyachi bo‘lib o‘ynadi. Allegri Ronalduning ijodkorligiga umid qilgan bo‘lsa, Simeone aynan Roni uchun o‘z himoyachilarini o‘ta agressiv harakat qilishini talab qildi. Oqibatda, Dibala va Ronaldu uchrashuv mobaynida jarima maydonchasiga yetmasdan bir necha bor to‘xtatildi.
O‘yinni hal qilgan omil
Zaxiradan o‘yinga qo‘shilganlar uchrashuvni hal qilishdi desak, adashmagan bo‘lamiz. Allegri Emre Janni maydonga tushirdi va o‘yinni «o‘ldirish»ga urg‘u berdi. Simeone esa tayanch yarim himoyachisi Partining o‘rniga Lemarni maydonga tushirib, marraga yaqin qolganda tezlikni oshirdi. Morata va Kosta rakirovkasi ham standart vaziyatlardagi ustunlikni ta’minlab berdi. Kechagi o‘yindagi «Atletiko» yutug‘ining asosiy omili bo‘lmish g‘alabaga bo‘lgan kuchli xohish va istak o‘yinga so‘nggi nuqtani qo‘ydi.
Javob o‘yini
Katta ehtimol bilan Simeone keyingi uchrashuvda kechagi uslubni qo‘llamaydi. O‘z uslubiga xos tarzda sekinlik bilan o‘yin tempini pasaytirib boradi va oxirida to‘laqonli sindiradi. Allegri agar javob o‘yinida munosib yurish qilib hamkasbiga javob qaytara olmasa, biz «Yuventus»ni shu bosqichning o‘zida qolib ketishining guvohi bo‘lishimiz aniq.
Yahyoxo‘ja Ulug‘xo‘jayev
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
