Xabaringiz bor, shu yilning 24 mart kuni poytaxtimizda Navro‘z umumxalq bayramiga bag‘ishlab I xalqaro Toshkent yarim marafoni o‘tkazildi.
Mazkur marafonda erishilgan yutuqlar, yo‘l qo‘yilgan kamchiliklar va marafon haqida xalqaro ekspertlar qanday fikrda ekanligini bilish maqsadida O‘zA muxbiri O‘zbekiston Respublikasi jismoniy tarbiya va sport vaziri Dilmurod Nabiyev bilan suhbatlashdi.
– Dilmurod Habibullayevich, bahor fasli yurtimiz sporti uchun barakali boshlandi, deyishga asos bor. Ilk bor Toshkentda yarim marafon bo‘lib o‘tdi. Bu tadbirdan ko‘nglingiz to‘ldimi?
– Umuman olganda, ha. Marafon saviyada yaxshi o‘tdi. Professional va havaskor sportchilarning ishtiroki marafonning qizg‘in o‘tishida muhim ahamiyat kasb etdi. Ular qatorida 5 kilometr masofada o‘tgan musobaqada biz ham o‘z kuchimizni sinab ko‘rdik. Yurtimizning chekka hududlaridan ham turli yosh toifasidagi oddiy insonlar qiziqish bildirib, ishtirok etgani, ayniqsa, quvonarli bo‘ldi. Eng muhimi O‘zbekiston har qanday nufuzli musobaqani o‘tkazishga qodirligini yana bir bor namoyon etdik.
– Marafon haqida xalqaro ekspertlarning fikri qanday?
– Tadbirda Xorvatiya va Turkiya kabi yengil atletika yaxshi rivojlangan bir qator davlatlardan tashrif buyurgan 10 nafar xalqaro toifadagi hakam ishtirok etdi. Xalqaro yengil atletika federasiyasi a’zolari mazkur tadbirga juda yuqori baho berishdi. Ular O‘zbekistonda sport, jumladan, Olimpiya o‘yinlari dasturidan joy olgan yengil atletikani rivojlantirishga doimiy e’tibor qaratilayotgani, mamlakatimizning nufuzli sport anjumanlarini yuqori saviyada o‘tkazish borasidagi boy tajribasi hamda zamonaviy sport infratuzilmasi mavjudligini inobatga olib, yurtimiz bir qator nufuzli musobaqalarni o‘tkazishga tayyor ekanini ta’kidlab o‘tdi.
Biz bu kabi marafonlarni an’anaviy tarzda o‘tkazib, Xalqaro yengil atletika federasiyalari uyushmasining (IAAF) “Brilliant liga” marafonlariga kiritilishiga erishishni maqsad qilganmiz. Xalqaro ekspertlarning fikricha, yilning aynan shu faslida uzoqqa yugurish uchun Toshkent shahri eng yaxshi, deb topildi, shuningdek, ko‘rsatilgan natijalar marafon o‘tgan yo‘l yuguruvchilar tili bilan aytganda “tez trassa” degan nomni oldi.
– Marafonni o‘tkazish jarayonida kamchiliklar ham ko‘zga tashlandimi?
– Ushbu tadbirni tashkillashtirish jarayonida juda ko‘p va katta muammolar yuzaga keldi. Biroq vazirligimiz, O‘zbekiston yengil atletika federasiyasi bir qator tashkilotchilar tomonidan barcha muammolar o‘z vaqtida hal etildi. Musobaqada federasiyaning 100 dan ortiq hakami, O‘zbekiston davlat jismoniy tarbiya va sport universitetining 300 dan ortiq ko‘ngillilari qatnashdi hamda yuzaga kelgan kamchiliklar bartaraf qilindi. Birincha marta o‘tkazilayotgan marafondan o‘zimizga kerakli xulosa chiqardik, kamchiliklarimizni bilib oldik. Kelgusida ro‘yxatdan o‘tish jarayonini yanada soddalashtirish, ijtimoiy tarmoqlarning imkoniyatlaridan samarali foydalanib, ishtirok etish shartlari haqida yanada kengroq ma’lumot berib borishimiz lozim bo‘ladi.
– Bu borada jahon tajribasi haqida nima deysiz?
– Albatta, jahon tajribasidan o‘rganishimiz lozim bo‘lgan jihatlar ko‘p. Hozirda tajribamiz biroz kam, lekin istiqbolda biz marafon o‘tkazish bo‘yicha direksiya ochishni reja qilayapmiz. Eng avvalo O‘zbekiston mutaxassislarining xalqaro marafonlarda hakam sifatida ishtiroki ta’minlanadi. Bundan tashqari, xalqaro federasiya tomonidan o‘tkaziladigan seminarlar, master-klasslarda hakamlarimizning tajriba orttirishi, malakasini oshirishni rejalashtirganmiz.
– Marafonda ishtirok etgan sportchilarimizning natijalari qoniqarli bo‘ldimi?
– Marafonchilarimizda 2020 yilda Tokioda bo‘lib o‘tadigan olimpiadaga lisenziya olish uchun yanada ko‘proq umid uyg‘ondi. Eng asosiysi, biz marafonni tashkillashtirayotganimizda 70 ga yaqin sportchi ishtirokini rejalashtirgan edik, lekin musobaqa kuni ularning coni 600 dan ortiq bo‘ldi. Bu esa mamlakatimizda mazkur sport turining ommalashishi to‘g‘ri yo‘lga qo‘yilganining yana bir isbotidir.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
