Jonli efir. Televideniye tarixida undan yaxshisini o‘ylab topishmagan. O‘ylab topa olishmaydi ham. Lavhalar, ko‘rsatuvlar, shou-o‘yinlar, intellektual bahslar, yozib olingan eng zo‘r kliplar, ishoning, hamma-hammasi jonli efir oldida g‘aribgina bo‘lib qoladi.
Nafaqat tv, balki OAVning barcha qatlamida-da undan yaxshi, undan kuchli yo‘l mavjud emas. Ajoyib maqolalarni o‘qiymiz, hayratomuz tahlillarni mutolaa qilamiz, biroq jonli efir – u xoh radio, xoh televideniye bo‘lsin – barchasining vaznidan og‘irroq.
Jonli efirda chiqar ekansiz, siz olam bilan suhbatlashayotganingizni his etasiz. Shu paytning o‘zida, gapirayotgan paytingizda. Sizni hamma eshitayotgani gapirayotgan paytingizga to‘g‘ri keladi. Boshqa bunday imkoniyat bormi?!
Siz bir paytning o‘zida hech kimning to‘sig‘isiz va o‘zingizning ichki “men”ingiz nazoratida so‘zlash imkoniga faqat jonli efirda ega bo‘lasiz. Qolgan efirlarda teskarisi bo‘ladi: og‘zingizga kelgan hamma narsani aytishingiz va istalganini qirqib tashlashingiz mumkin – montaj qudrati zo‘r.
Jonli efirlarning ichida esa, eng zo‘ri, shubhasiz, futbol sharhlash bo‘lsa kerak. Umuman sport o‘yinlarini sharhlash, desak, to‘g‘riroq bo‘ladi. Chunki siz o‘yinning bir qismiga aylanasiz, dinamikada yashaysiz va o‘yin oxiriga qadar sportchilar bilan birga – ular qayoqqacha olib borishsa – birga boraverasiz.
Ruslarda “pryamoy efir” deyiladi. Inglizchadagi live so‘zi negadir menga ko‘p ma’qul. Chunki unda hayot so‘zi bor. Bizdagi “to‘g‘ridan to‘g‘ri efir”dan ko‘ra “jonli efir” chiroyliroq yangraydi. Jon bor, yashamoq bor, hayot bor.
Futboldagi “jonli efir” hayotimizga o‘xshagani uchun aytyapman yuqoridagi gapni: nima bo‘lishini oldindan bilmaymiz, o‘yin boshiga qarab xulosa bera olmaymiz, uchrashuvning oqibati butun o‘yindan-da muhimroq darajada!..
Ertaga “Paxtakor” jamoasi Qatarning “As Sadd” klubi bilan o‘ynaydi. Hozir u haqda nima desak ham taxmin yo oldindan bildirilgan fikr bo‘lib qolaveradi. O‘yinning o‘zi haqidagi tasavvurimiz faqat boshlanganida, “Sport” telekanali orqali translyasiya jonli efirda uzatila boshlanganida paydo bo‘ladi.
Birga kuzatamiz. Jonli efirda. 19:00dan boshlab, “Paxtakor” o‘yingohiga “jon” kiradi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
