Xabar berganimizdek, bugun tongda professional bokschimiz Fazliddin G‘oibnazarov AQSHning Arizona shtati Tuson shahrida o‘zining navbatdagi jangini o‘tkazdi.
Fazliddinga sakkizinchi jangida amerikalik Maykl Foks raqiblik qildi. O‘n raund to‘liq davom etgan jangda bokschimiz 92:96, 92:96, 93:95 hisobida imkoniyatni boy berib qo‘ydi.
Bu G‘oibnazarovning professional boksdagi ilk mag‘lubiyati edi. Shu yilning fevral oyida yana bir charm qo‘lqop ustamiz Shohjahon Ergashev aynan Maykl Foksni mag‘lubiyatga uchratgandi.
Bugungi jangdan so‘ng Fazliddinning murabbiyi, ham havaskor, ham prof boksdagi faoliyati davomida shogirdining yonida bo‘layotgan Abror Tursunpo‘latov saytimiz uchun o‘z fiklarini bayon etdi.
"Balki, bugungi mag‘lubiyat yaxshilikkadir. Lekin umumiy olganda, Fazliddin bugun mag‘lubiyatga munosib emasdi. Dastlabki uchta raund Fazlining foydasiga hal bo‘ldi. Hammasi rejamiz asosida ketayotgandi.
Ammo, to‘rtinchi raundda referi bokschimizga ogohlantirish berdi. Foksning bo‘yi ancha baland bo‘lgani uchun uning o‘zi klinchga kirib, Fazliddinni quchoqlab olaverdi. Shogirdim har safar chiqib ketishga harakat qildi.
Keyingi ikkita raundda taktikani o‘zgartirib, biz biroz tempni tushirdik. Odatda professional boksda shunday yo‘l tutiladi. Biroz nafas rostlab olib, keyin to‘liq kuch bilan hujumga o‘tiladi.
To‘qqizinchi raundga kelganda, men Fazliga raqibni faqat yiqitish evaziga mag‘lub eta olishini aytdim. Chunki, teng kurashlar ostida kechayotgan janglarda hakamlar g‘alabani hamisha mezbon bokschiga berishadi.
Shunda Fazliddin, Abror aka, raqibning bo‘yi haddan ziyod baland, zarbam manzilga yetib bormayapti, dedi. Nachora, yakunda men o‘ylagandek bo‘lib chiqdi. Hakamlar durangga tortadigan jangda g‘oliblikni mezbon bokschiga taqdim etishdi.
Foks bundan avvalgi jangida Shohjahonga yutqazgandi. Ergashevning ustun tomonlaridan biri Maykldan bo‘y borasida juda ham past emasdi. Fazliga aynan bo‘y tafovuti ham pand berdi.
Men jang yakunlanishi bilan TOP Rank menejeri bilan gaplashdim. Bizga yanada kuchliroq berishlarini so‘radim. Tavakkal qilib, kuchli raqib bilan jang o‘tkazishimiz kerak. Shunda reytingda tezda yuqorilab, chempionlik jangi uchun imkoniyat yuzaga keladi", - dedi saytimizga bergan eksklyuziv intervyusida Fazliddinning murabbiyi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
