Xabaringiz bor, bir necha oydan beri boksning Tokio Olimpiadasi dasturidan o‘rin olishi, yoinki, chiqib ketishi borasida ko‘plab savollar tug‘ilayotgan edi. Kecha Xalqaro Olimpiya qo‘mitasi (XOQ) prezidenti Tomas Bax tashkilotning ijroqo‘m a’zolari bilan boksning Tokio Olimpiadasidan o‘rin olish masalasi va kvalifikasiya tizimi, bellashuvlarni qaysi tashkilot shafeligida o‘tkazilishi kabi masalalarga bag‘ishlgangan yig‘ilish o‘tkazdi.
Unga ko‘ra, boks Tokio Olimpiadasi dasturidan o‘rin oladi, ammo shu paytgacha boks bellashuvlarini o‘tkazgan AIBA tashkiloti Olimpiadaning saralash tizimiga aralashmaydi va tashkilotning Olimpiya o‘yinlaridagi roli butunlay to‘xtatiladi. Ushbu yig‘ilishda boks bellashuvlarini XOQ tomonidan tashkil qilinadigan maxsus komissiya o‘tkazishi va unga Xalqaro gimnastika federasiyasi prezidenti Morinari Vatanabe rahbarlik qilishi borasida xulosaga kelindi. Tokio Olimpiadasi uchun avvalgidek umumiy hisobda 286 ta kvota ajratilgan. Bunda erkaklar o‘rtasida 8, ayollar o‘rtasida 5 vazn toifalarida bellashuvlar bo‘lib o‘tadi. Biroq musobaqalar aynan qaysi vazn toifalarida o‘tkazilishi bo‘yicha aniq to‘xtamga kelinmagan.
Qayd etish joiz, bu yil Rossiyada bo‘lib o‘tadigan jahon chempionati XXXII Olimpiya o‘yinlariga yo‘llanma bermaydi. Tokio Olimpiadasiga lisenziya beradigan musobaqalar kelasi yilning yanvar va may oylari oralig‘ida o‘tkaziladi. Biroq bunga mezbonlik qiladigan davlatlar va turnir sanalari bo‘yicha hozircha aniq to‘xtamga kelinmagan. Yuzaga kelayotgan barcha masalalar bo‘yicha yakuniy qaror 24-26 iyun kunlari Lozannada o‘tkaziladigan XOQning navbatdagi Sessiyasida e’lon qilinadi.
Ma’lumot uchun, Rio-2016 Olimpiya o‘yinlarida boks bo‘yicha O‘zbekiston terma jamoasi 10 nafar sportchi bilan bahslarda ishtirok etib, yakunda ularning yettitasi sovrinli o‘rinlarga sazovor bo‘lgandi. Natijada 3 ta oltin, 2 ta kumush va 2 ta bronza medallari bilan O‘zbekiston terma jamoasi Olimpiya o‘yinlarini umumjamoa hisobida birinchi o‘rinda yakunlagandi.