Coca Cola Superliga 11-turi doirasidagi AGMK – “Navbahor” jamoalari o‘rtasidagi o‘yinning dastlabki daqiqalaridayoq jamoamizning mahoratli yarim himoyachisi Abdujamol Isroilov oyog‘idan jiddiy jarohat olib, maydonni erta tark etishga majbur bo‘lgandi. Isroilov kuni kecha poytaxtimizdagi shifoxonalardan birida jarrohlik stoliga yotdi va amaliyot muvaffaqiyatli yakunlandi. Jarrohlik amaliyotidan so‘ng, biz Abdujamol Isroilovdan klubimiz rasmiy sayti uchun qisqacha intervyu oldik.
Abdujamol, ahvollar qanday, og‘riq bezovta qilmayaptimi?
Xudoga shukr, jarrohlik amaliyoti muvaffaqiyatli kechib, og‘riqlar ancha bosildi. Fursatdan foydalanib, meni shunday qiyin holatda qo‘llab-quvvatlayotgan “Navbahor” klubi rahbariyati, murabbiylar shtabi, jamoadoshlarim va muxlislarga o‘zim hamda oilamiz nomidan o‘z minnatdorchiligimni bildiraman. Ular har kuni qo‘ng‘iroq qilib, ahvolimdan xabardor bo‘lib turishibdi, kamchilik yo‘qmi, deb so‘rashyapti. Qisqasi, doimo holimdan xabar olib, yolg‘iz qo‘yishmayapti. Aytish joizki, mamlakatimizda o‘z nomi va obro‘siga ega, shuningdek, mehribon, g‘amxo‘r rahbarlari bor, futbolchilari ahil-inoq bo‘lgan “Navbahor” jamoasida o‘ynayotganimdan faxrlanaman hamda bundan xursandman. Garchi endi maydonga tusholmasamda, “lochinlar”ning o‘yinlarini televizor orqali tomosha qilib, jamoamizni g‘oyibona qo‘llab-quvvatlab turaman va “Navbahor”ga keyingi bahslarda omad yor bo‘lishini tilayman.
Ko‘pchilik muxlislarni qachon yashil maydonga qaytishingiz qiziqtiradi...
Shifokorlarning xulosalariga ko‘ra, 2 oydan so‘ng, mashg‘ulotlarda ishtirok eta olarkanman. O‘zim ham tezroq jarohatimdan forig‘ bo‘lib, “Navbahor”ning g‘alabalariga munosib hissamni qo‘shish umididaman.
“Lochinlar” so‘nggi 4ta bahsda durang natijani qayd etishdi. “Paxtakor”ga qarshi kechgan o‘yindagi durangni tushunsa bo‘ladi, ammo keyingi 3ta uchrashuvdagi natijalar borasida nima deya olasiz?
O‘z maydonimizdagi “Metallurg” va “Andijon” klublariga qarshi kechgan bahslarda yaxshi o‘yin namoyish etdik. Biroq yuzaga kelgan vaziyatlardan samarali tarzda foydalana olmadik. Bundan tashqari, mazkur jamoalar klubimizga munosib qarshilik ko‘rsatishdi. Natijada har ikki o‘yinda ham durangga imzo chekishga majbur bo‘ldik.
Olmaliqdagi uchrashuvda esa o‘zingizga ma’lum, jarohat olganligim bois, maydonni erta tark etishga majbur bo‘ldim. O‘sha o‘yinda jamoamiz 1:0 hisobida g‘alaba qozonayotib, qo‘shimcha vaqtda o‘z darvozasidan to‘p o‘tkazib yuborib, yutuqni qo‘ldan boy berganligi alamli bo‘ldi, albatta.
Muxlislarga shuni ta’kidlamoqchimanki, “Navbahor”ning oldiga joriy mavsumda yuksak maqsad qo‘yilgan. Shu bois, biz har bir bahsda maydonga g‘alaba ishtiyoqida tushamiz. Lekin ayrim o‘yinlarda imkoniyatlardan unumli foydalana olmayotganimiz, shuningdek, omadimiz kelmayotganligi bois, zafar qucha olmayapmiz. Umid qilamanki, “Buxoro”ga qarshi kechadigan uchrashuvda ushbu noxush an’ana, duranglar seriyasi o‘z yakuniga yetadi hamda jamoamiz g‘alabali odimini boshlaydi. Bo‘lajak bahsda ta’kidlaganimdek, men ham “Navbahor”ni g‘oyibona qo‘llab-quvvatlab, zafar quchishini tilab qolaman.
Jarohat to‘p uchun kurashda yuz berdimi yoki raqib futbolchisi sizga nisbatan atayin qo‘pollik ishlatdimi?
Jarohat olgan vaziyatda AGMK himoyachisi Sardor Rahmonov menga nisbatan atayin qo‘pollik ishlatmadi, menimcha. Shunchaki, to‘p uchun kurashda shunday holat yuz berdi. Futbolda esa bunday holatlar tez-tez yuz berib turadi. Sardor o‘yindan so‘ng, oldimga kelib, bilmay jarohat yetkazgani uchun afsuslanib, kechirim so‘radi. Shuningdek, shifoxonaga ham kelib, holimdan xabar oldi.
Jarohat – futbolning ajralmas qismi. Shuning uchun Sardor Rahmonovdan xafa emasman. Niyatim - jarohatimdan tezroq forig‘ bo‘lib, jamoa tarkibiga qaytish hamda “lochinlar”ning g‘alabalariga munosib hissa qo‘shish.
Biz ham sizning jarohatingizdan tezroq forig‘ bo‘lishingizni Allohdan tilab qolamiz...
Ezgu niyatlar uchun rahmat. So‘zim yakunida jamoamizga bo‘lajak o‘yinlarda omad yor bo‘lishi va muxlislarga o‘z yutuqlari bilan quvonch ulashishini tilab qolamiz. Menga Yaratgandan shifo tilayotgan barchaga katta rahmat, hammalari sog‘-salomat bo‘lishsin!
“Navbahor” PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
