Bugun YECHL 1/8 finali doirasida “Enfild”da jang bo‘ladi. Haqiqiy jang. Bugun nafaqat bugunning kuchli klublari, balki, kuchli murabbiylari ham o‘zaro to‘qnash keladi.
O‘yin oldidan “Atletiko”ning imkoniyatlarini yuqoriroq baholash mumkin. Birinchidan, Simeone shogirdlari Madriddagi jangda g‘alaba qozonishgan. Shuningdek, o‘z uylarida gol o‘tkazishmadi.
Javob o‘yinida vaziyat oddiy: agar “matraschilar” mehmonda amallab gol ura olishsa, “Liverpul” kamida uchta gol urishiga to‘g‘ri keladi. “Atletiko”ning-ku bitta gol urishiga ishonish mumkin, agar Simeone shogirdlari bu ishni uddalashsa, “qizillar”ning uchta to‘p kiritishi ancha mushkullashadi.
Vaziyatga boshqa tomondan yondashsak. O‘yinning ssenariysi ma’lum: “Liverpul” gol urishga majbur. Demakki, Yurgen Klopp o‘sha “uch mushketyor”ni jangga tashlaydi. Diyego Simeone esa o‘zi xush ko‘radigan va hadisini olgan “himoyadan hujumga” taktikasida harakat qiladi. Simeone Mourinyo emas himoyani qoyillatib, hujumning epini qilolmaydigan. U ham himoyani, ham hujumkorlikni eplay oladigan mutaxassis. “Atletiko”ning La Ligadagi holatiga e’tibor bermang. “Atletiko” shunday jamoaki, La Ligada chempionlik uchun kurasha olmay qolgan bir paytda YECHL finaliga qadar yetib boradi. Chunki Simeone zaxirasidagi kuch har ikkala turnirda birdek ishtirok etish imkonini bermaydi. O‘z o‘rnida argentinalik mutaxassis La Ligada chempion bo‘lish ishqida-ku yonyapti, ammo bu YECHLga bo‘lgan muhabbat oldida biroz haroratsizroq. Har holda, joriy mavsumda. Sababi, Simeone “Atletiko” bu mavsumda La Ligada chempion bo‘la olmasligini tushunib turibdi, shu bois bor e’tiborini YECHLga, ayni damda “Liverpul”ga qaratgan.
Agar “Atletiko”ning o‘rnida boshqa jamoa, hatto “Manchester Siti” yoki “Barselona” bo‘lganida ham “Liverpul”ning keyingi bosqichga chiqish imkoniyatlarini yaxshiroq baholash mumkin edi. Lekin “Atletiko” boshqa masala.
Bugun “Enfild”da hujumning hadisini olgan va himoyaviy falsafani mukammal yaratishga intilayotgan murabbiylar to‘qnashadi. Tarkiblarga qaramaymiz, natijalarga qaramaymiz, klublarning bugungi holatiga ham qaramaymiz. Eng muhim jihat shu — Klopp va Simeone. Bunday murabbiylar o‘rtasidagi har qanday o‘yin futbolning bezagi bo‘ladi, ayniqsa, u hal qiluvchi o‘yin bo‘lsa.
Xullas, bugun tungi birda haqiqiy jang boshlanadi. Uxlash yo‘q, o‘yin bunga arziydi ham.
Nizomjon ISLOMOV
Xorazm
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
