Bu yil «Shaxtyor» (Donesk)ning CHLdagi ishlari umuman yurishmayapti - 4ta o‘yindan atigi 1 ochko. Boz ustiga, Ukraina klubi joriy turnirdagi gollari hisobini 4-turga kelibgina ochdi. Jamoaning braziliyalik hujumkor yarim himoyachisi Dentinyo (Bruno Ferreyra Bonfin) aynan Madridda «Real»ga qarshi kechgan 4-o‘yindan oldin Marca nashriga maxsus intervyu bergandi. Binobarin, bu futbolchi hozirda «Qirollik klubi» safida to‘p surishi ham hech gap emasdi.
- Dentinyo, katta o‘yinlarga tayyormisiz?
- Ha, kayfiyatim yaxshi. 27 oktyabr kuni «Chernomores»ga qarshi kechgan kubok bahsida safga qaytdim va gol ham urdim. Umid qilamanki, jarohatga bog‘liq noxush davr ortda qoldi, endi muntazam o‘ynashga mutlaqo tayyorman (Dentinyo Madriddagi uchrashuvning 86-daqiqasida jamoasining yagona goli muallifi Fernando o‘rniga maydonga tushdi va yakunda sariq kartochka oldi).
- Demak, jarohatdan batamom qutuldingiz, shundaymi?
- Ha. Hozir umumiy holat yaxshi, qaytishni gol bilan nishonlaganim ham o‘zimga nisbatan ishonch hissini oshirdi. To‘g‘ri, jarohatdan keyin ma’lum vaqt rosa qiynalganimni aytishim joiz. Muhimi, ayni payt hammasi zo‘r.
- O‘tgan yili Madridda katta shov-shuv ko‘targan edinglar...
- O, barchamiz uchun o‘zgacha o‘yin bo‘lgandi. Binobarin, koronavirus tufayli Madridga 7-8 nafar asosiy futbolchisiz kelgandik. O‘ynashdan boshqa chora yo‘qligini bilgach, Ispaniya poytaxtiga qandaydir vajohat bilan kelganimiz esimda. Asosiysi, vajohatimiz bejiz emasligini ko‘rsatib, ijobiy natijaga erishdik va jamoamiz ajoyib ekanligini isbotladik. To‘g‘ri, tanaffus oldidan tabloda porlab turgan 0:3 hisobini ko‘rib, ko‘zlarimga ishonmagandim.
- O‘sha o‘yin tanaffusida kiyinish xonasida nimalar ro‘y bergandi?
- Hammamiz jimgina o‘tirdik. Faqat bir-birimizning ko‘zimizga qaradik, chunki maydondagi voqealar haqiqat emasdek tuyulgandi. Qisqasi, o‘sha bo‘lim - g‘ayrioddiy hodisot. Aytishim mumkinki, futboldagi eng yaxshi xotiralarimdan biri. Axir «Real» o‘z nomi bilan «Real»da!
- «Shaxtyor» o‘sha muvaffaqiyatni qachon takrorlaydi?
- Hozir shu maqsadda tinimsiz ishlayapmiz. Shuning barobarida katta futbolda har qanday kichik xato ham qimmatga tushishi mumkinligini yaxshi bilamiz.
- «Santyago Bernabeu»da o‘ynash qanday?
- Bu - orzu! 2005 yili «Korintians» safida «Santyago Bernabeu»ga kelgandim. O‘sha vaqt olingan suratlarni hanuzgacha asrab-avaylayman. Stadion atrofini aylanganimiz, maydonga qanday qadam tashlaganimizni zavq bilan eslayman. O‘shandayoq kun kelib, bu stadionda rasmiy o‘yinda ham ishtirok etishni ko‘nglimga tugib qo‘ygandim. Umuman, Madrid va stadionni ilk ko‘rishdayoq sevib qolganman. Boz ustiga, «Real» vakillari meni kuzatib borishayotganidan xabardor edim va klub safiga qo‘shilishim ham hech gap emasdi...
- ...Biroq transferingiz amalga oshmadi. Qiziq, «Qirollik klubi» bilan shartnoma tuzishingizga aynan nima to‘sqinlik qilgandi?
- Oradan ko‘p vaqt o‘tdi, to‘g‘risi, ikki klub nega kelisholmagani sababini haligacha bilmayman. Aytishlaricha, transfer summasi masalasida bir to‘xtamga kelishning iloji topilmagan. Vaholanki, «Real» 2008 yili menga chindan ham, jiddiy qiziqqan va aniq taklif yuborgandi. Skautlar meni bevosita kuzatishgan «Korintians» - «Parana» o‘yinida gol urgandim, ammo... Darvoqe, Villian ham o‘sha jamoada edi va yakunda men kabi «Shaxtyor»dan qo‘nim topdi.
- Umuman, «Real»ga qarshi hamisha yaxshi o‘ynagansiz.
- Shunchaki, omadim kelgan. 2015 yili Ukrainada garchi 3:4 hisobida yutqazgan bo‘lsakda, o‘yinda madridliklar darvozasini nishonga olgandim. O‘tgan mavsum esa har ikki uchrashuvda g‘alaba qozondik, Kiyevdagisida yana gol urdim.
- Futbolchi sifatida Yevropa Superligasi g‘oyasi haqida qanday fikrdasiz?
- Ochig‘i, buning mohiyatini uncha tushunmayapman. Menimcha, faqat kuchlilar emas, barcha jamoalar haqida o‘ylash kerak. Shuningdek, futbolchilar va ularning orzularini ham inobatga olishsa, yaxshi bo‘lardi. O‘ylaymanki, bu borada hammasini mendan yaxshiroq tushunadigan mutaxassislar ko‘p.
- Kiyevda «Real»dan uchralgan 0:5 hisobli og‘ir mag‘lubiyat haqida nima deya olasiz?
- Vaziyat taqozosi... Aslida o‘yinni yaxshi boshladik, ammo oddiy holatda gol qo‘yib yubordik va shu bilan hammasi o‘zgarib ketdi. Qarshingizda Vinisius, Benzema yoki Modrich turganida, bir soniya ham bo‘shashmaslik talab etiladi. Ularni ko‘zdan qochirmaslik uchun hattoki, kiprik qoqishga ham haqqingiz yo‘q.
- «Real»ga umumiy munosabatingiz qanday? Bu klub siz uchun nimani anglatadi?
- «Real» bilan o‘ynash yoqimli. Shuningdek, jamoa safida ikki kumirim o‘ynagan: Ronaldo va Roberto Karlos. Har ikkisi bilan ham «Korintians»da birga shug‘ullanganman.
- Ko‘pchilik ayni payt Vinisiusni ko‘tarilayotgan yulduz sifatida maqtamoqda.
- Bunga qo‘shilaman! Ajoyib futbolchi. Uni «Flamengo»da o‘ynay boshlaganidan buyon kuzatib kelyapman. O‘shandayoq kuchli futbolchiga aylanishini sezgandim. Mana, Vinisius hamon o‘smoqda. Nihoyat, nega «Real» nazariga tushganini isbolashga tushdi. Chindan ham, katta iqtidor, hali buyuk futbolchilar qatoridan joy olishiga ishonaman.
- Bugungi Vinisius yulduzmi?
- U hozir shu yo‘lda. Chinakam yulduz maqomiga erishish uchun barcha xislatlarga ega. Misol uchun, Kiyevda «Shaxtyor» darvozasini ishg‘ol etishda buyuk o‘yinchilarga xos harakatlandi. Xullas, Vinisiusda haqiqiy yulduz bo‘lish imkoniyati katta. Ammo taraqqiyotdan to‘xtamaslik uchun kamtarlik bilan o‘z ustida ishlashda davom etishi kerak.
- Vinisiusning Braziliya milliy jamoasidagi o‘rnini qanday baholaysiz?
- Ayni holatga qarasak, u mamlakatimizning eng kuchli futbolchilari qatorida. Shunday ekan, milliy jamoada katta rol o‘ynashi kerak. Tite o‘z g‘oyalariga ega tajribali murabbiy, futbol bilimi juda baland. Agar Vinisius «Real»dagi samaradorlikni pasaytirmasa, terma jamoada ham yetakchilardan biriga aylanishi turgan gap. Unda bo‘lajak jahon chempionatida bosh rolga ko‘tarilish imkoniyati yetarli.
- Vinisiusdan tashqari, «Real»ning yana qaysi futbolchisiga hurmatingiz baland?
- Benzemaga! Eng ijobiy fazilatlarni o‘zida mujassam etgan, o‘yinni yaxshi tushunadigan hujumchi. Albatta, Marselo va Kazemironi ham e’tirof etishim kerak. Lekin avvalo, Benzemani tilga olaman. Hozir uning «Oltin to‘p»ga da’vogar ekanligi haqida ko‘p gapirilmoqda. Karimning so‘nggi yillarda qanday o‘ynaganini hisobga olsak, bu juda to‘g‘ri.
- 2011 yildan buyon Ukrainadasiz.
- Ha, allaqachon yarim ukrainalik bo‘lib qoldim. Lekin «Shaxtyor» bilan shartnomam 31 yanvar kuni tugaydi.
- Xo‘sh, nima qilmoqchisiz?
- Bilmayman. Takliflarni ko‘rib chiqishga tayyorman.
- Ispaniya futboliga yuz burishingiz mumkinmi?
- Ehtimol. Aslida «Real»da o‘ynashni xohlardim (kuladi).
- Ukrain tilida ham gapira olasizmi?
- Oz-moz. Mahalliy tilni yaxshi tushunaman, lekin kam gapiraman, chunki «Shaxtyor»da naq 14 nafar braziliyalik bor.
- Ukrainaga kelishdan oldin qorni ko‘rganmidingiz?
- Hech qachon. Doneskda ilk marta qorga duch kelganimizda, turmush o‘rtog‘im bilan juda hayajonlanganimiz esimda. Boshida rosa yayradik, ammo tez orada qor ko‘rishning dastlabki 5 daqiqasi zavqli ekanligini angladik. Chunki qordan keyin dahshatli sovuq boshlanadi.
- Ukrainada braziliyaliklar qanday yashashadi?
- Ukraina - ajoyib mamlakat, yaxshi tomonga o‘zgarish bor, bizda hammasi zo‘r. «Shaxtyor» esa chin professional klub. Ha, vatandan uzoqda yashaymiz, lekin oilamiz yonimizda, uyda brazilcha taomlar tayyorlaymiz. Birgina muammo - sovuq. Yaxshiki, issiq kunlar ham bor, qolaversa, oilangiz yoningizda bo‘lsa, hammasiga oson ko‘nikasiz. Ukrainada Braziliya taomlari uchun zarur deyarli barcha mahsulotlarni topish mumkin, ammo har gal vatanimizga borganimizda, ortga taom masalliqlariga to‘la ikki jomadon bilan qaytamiz, baribir.
- Dentinyo maydondan tashqarida qanday yigit?
- Juda xotirjam. Rafiqam Dani Souza va 3 nafar farzandimiz - Bruno Lukas, egizaklar Sofiya va Rafaella bilan uyda vaqt o‘tkazishdan zavqlanaman.
- Nikoh to‘yingizda afsonaviy Ronaldo ham ishtirok etgan ekan.
- Ha, ha. U - yaxshi do‘st, hayotimdagi muhim inson. Ronaldo «Korintians»da menga ko‘p g‘amxo‘rlik qilgan va undan bir umr minnatdorman. Kolumbiyadagi oxirgi o‘yinida esa, maydonda «so‘yloq» bilan tandem bo‘lib to‘p surgandim. Hozir ham ko‘p gaplashamiz. U menga o‘g‘lidek muomalada bo‘ladi.
- Demak, Ronaldoga «Shaxtyor» bilan shartnomangiz tugayotganini aytishingiz kerak, shunda sizni «Valyadolid»ga chorlashi mumkin.
- Umid qilamanki, Ronaldo bilan bu masalani muhokama qilishga hali ulguramiz (kuladi).
- Bolalikdagi kumiringiz haqida so‘rashga ham hojat qolmadi...
- Albatta, Ronaldo! Bolaligimda odamlar tishlarimiz o‘xshashligi uchunmi, meni «Ronalduning o‘g‘li» deyishardi. Bir kuni o‘ziga «ota», deya murojaat ham qilganman. Ronaldo - tarixdagi eng yaxshi futbolchi. Qarang, jiddiy jarohatdan keyin ham fenomenligicha qoldi. Futbolda bunday iqtidorni boshqa hech qachon ko‘rmasak kerak.
MUHAMMADXON tayyorladi
Neftchi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
