Avval xabar berganimizdek, Superliga bahslarida ishlaydigan va unga nomzod bo‘lgan hakamlar uchun o‘quv-mashg‘ulot yig‘ini bo‘lib o‘tdi. Toshkent shahrida o‘tkazilgan yig‘inda hakam va yordamchi hakamlardan normativ testlar olinib, o‘yin qoidalari bo‘yicha seminarlar olib borildi. Shuningdek, mashg‘ulotlar davomida VAR-simulyatorida mashg‘ulot tashkillashtirildi va hakamlar maxsus o‘rtoqlik uchrashuvlarida sinovdan o‘tkazildi.
Kecha O‘FA birinchi vise-prezidenti Ravshan Ermatov o‘quv-seminarga tashrif buyurdi.
“Professional futbol rivojlanishi uchun sifatli hakamlik zarur, buning uchun hakamlarimiz doimiy ravishda o‘z ustida ishlab, chempionat o‘yinlarini yuqori saviyada boshqarib, halol va albatta adolatli qarorlar chiqarishi lozim. Eng asosiy maqsadimiz — muxlislarning hakamlikdan rozi bo‘lishiga erishish. Faqat shu orqali hakamlik imidjini ko‘tarishimiz, hakamlikka bo‘lgan ishonchni oshirishimiz mumkin. Bu yo‘lda albatta bor imkoniyatimizni ishga solamiz. VAR tizimi qanchalik qimmat bo‘lishiga qaramasdan, adolatni ta’minlash uchun har qanday xarajatdan qochmagan holda ushbu texnologiyani milliy chempionatimizga tatbiq etayotganimiz ham futbolda shaffoflik va halollikni qaror toptirish yo‘lidagi qadamdir”, dedi Ravshan Ermatov.
Shuningdek, uchrashuv davomida joriy yilgi FIFA hakamlarining ro‘yxati tilga olindi. Reytingga ko‘ra, o‘zbekistonlik 9 nafar bosh hakam va 11 nafar yordamchi hakamlar bu yil xalqaro darajadagi uchrashuvlarni boshqarish uchun da’vogar hisoblanadi. Ravshan Ermatov ularning zimmasida katta mas’uliyat borligini aytdi. Bundan tashqari, mamlakatimizda bo‘lib o‘tadigan U-23 Osiyo chempionati bahslarini boshqarish uchun bir nechta o‘zbekistonlik hakamlar ham nomzod ekanligi, ular ham chempionatga qadar tinimsiz o‘z ustlarida ishlab borishlari kerakligi qayd etildi.
Ayol hakamlarimizning ham xalqaro miqyosda o‘z o‘rniga ega bo‘lib borayotganligi, Edita Mirabidova va Anna Sidorova kabi hakamlarimizga katta ishonch bildirilayotganligi e’tirof etildi. Ayollar chempionatida ham uchrashuvlarni ayol arbitrlar boshqarib borishini yo‘lga qo‘yish, ularning malakasini doimiy ravishda oshirib borish zamon talabi ekanligi ta’kidlandi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
